រាជធានីភ្នំពេញ ៖ ផលិតកម្ម Beijing Jinyi Celebration Cultural Promotion Co.Ltd នៃសាធារណៈរដ្ឋប្រជាមានិតចិន បានចាប់ផ្តើមសម្ពោធការថតរឿង «ឥទ្ធិពល នៃស្នេហ៍»។ ពិធីនេះ ធ្វើឡើងនៅសណ្ឋាគារណាហ្គាវើល កាលពីព្រឹកថ្ងៃទី២៥ កុម្ភៈ ២០១៤ ដោយមានការអញ្ជើញចូលរួមជាអធិបតីពី លោកបណ្ឌិត សភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងលោកជំទាវ លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ លោកជំទាវ ពូ ចានគូ ឯកអគ្គរដ្ឋទូតចិន ប្រចាំកម្ពុជា លោក ម៉ា មីងឆំាង អគ្គលេខាធិការមជ្ឈមណ្ឌលចិន-អាស៊ាន លោកស្រី យន់ ហ៊ួយ ប្រធានផលិតកម្ម Beijing Jinyi Celebration Cultural Promotion Co.Ltd លោក តាំង តាន់ស្រ៊ី បណ្ឌិត ឆេន លីបគង់ CEO នៃណាហ្គាវើល និងមានការអញ្ចើញចូលរួមជាកិត្តិយសពីភ្ញៀវជាតិ និងអន្តរជាតិ អ្នកដឹកនាំតារាសម្តែងរួម និងអ្នកសារព័ត៌មានជាច្រើនទៀត។
ខ្សែភាពយន្តខា្នតធំបែបមនោសញ្ចេតនា ដែលមានចំនួន ៣០ភាគ នេះ ជាការតែងនិពន្ធឡើងដោយផលិតកម្ម Beijing Jinyi Celebration Cultural Promotiom Co.Ltd និងដឹកនាំសម្តែងដោយ លោក Cao Dun ដែលជាអ្នកដឹនាំផលិតខ្សែភាពយន្តដ៏ល្បីមួយរូបប្រចាំសាធារណៈប្រជាមានិតចិន ហើយខ្សែភាពយន្តនេះ មានចំនួន ១០ភាគ ថតនៅក្នុងប្រទេសកម្ពុជា។ ក្នុងរឿងនេះ រួមសម្តែងដោយ លោក Huang Hai Bo ជាតួឯក និងអ្នកនាង Zhang Jing Chu ជាតួឯកស្រី។ ក្នុងសាច់រឿងនេះផងដែរ ក៏ឆ្លុះបញ្ចាំងពីជីវិតយុវវ័យពោរពេញដោយឧបសគ្គ និងដំណោះស្រាយក្នុងការរស់នៅ និងជីវិតស្នេហានៅក្នុងសង្គម ដែលមានភាពអភិវឌ្ឍន៍ដ៏ឆាប់រហ័ស។
តារាសម្តែង លោក Huang Hai Bo ធ្លាប់ទទួលបានពានរង្វាន់ជាច្រើន រីឯអ្នកនាង Zhang Jing Chu ជាតារាសម្តែងប្រកបដោយទេពកោសល្យ និងល្បីល្បាញធ្លាប់ត្រូវបានជ្រើសរើសឲ្យចូលរួមក្នុងកម្មវិធីពានរង្វាន់ប្រចាំឆ្នាំ Best Actress in 29th China Golden Rooster Awards ២០១៣។ លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា ដើម្បីធ្វើការសិក្សាស្វែងយល់រវាងវប្បធម៌ នៃប្រទេសកម្ពុជា-ចិន ឲ្យកាន់តែមានភាពស្និទ្ធស្នាលថែមទៀត ក្រសួងទេសចរណ៍ នៃព្រះរាជាណាចក្រកម្ពុជា បាននិងកំពុងសហការជាមួយមជ្ឈមណ្ឌលអាស៊ាន-ចិន China Center អនុញ្ញាតឲ្យក្រុមហ៊ុនផលិតខ្សែភាពយន្តដ៏ល្បីល្បាញឈ្មោះ Beijing Jinyi Celebration Cultural Promotion Co.Ltd នៃប្រទេសចិន ថតនូវខ្សែភាពយន្ត «ឥទ្ធិពល នៃស្នេហ៍» នៅតំបន់គោលដៅទេសចរណ៍ទាក់ទាញនានា នៃទីក្រុងភ្នំពេញ និងខេត្តសៀមរាបអង្គរ នៃព្រះរាជាណាចក្រកម្ពុជា។
លោកបន្តថា ការថតខ្សែភាពយន្តខ្នាតធំនេះ នឹងចាប់ផ្តើមនៅទឹកដីដ៏អស្ចារ្យរបស់យើងចាប់ផ្តើមថតពីថ្ងៃទី២៦ កុម្ភៈ ដល់ថ្ងៃទី៣០ មិនា ២០១៤ ដែលមានក្រុមបច្ចេកទេស និងតួសម្តែងរបស់ចិន ចំនួន ១០០នាក់ ហើយបន្ទាប់ពីការថតនៅកម្ពុជា ក្រុមការងារនឹងបន្តថតបញ្ចប់សាច់រឿងនៅក្រុងប៉េកាំង ប្រទេសចិន។ ក្នុងការថតរឿងនេះដែរ ក្រសួងសេដ្ឋកិច្ច បានជួយសម្រួលដល់ទីចាត់ការគយ និងស្ថាប័នពាក់ព័ន្ធ ជួយសម្រួលមិនយកពន្ធលើការនាំចូលជាបណ្តុះអាសន្ននូវឧបករណ៍ និងសម្ភារថត ការដឹកជញ្ជូន ការស្នាក់នៅ និងអនុញ្ញាតិឲ្យថតនៅទីកន្លែងសំខាន់ៗ និងរួមទាំងរមណីយដ្ឋាននានា នៅក្នុងប្រទេសកម្ពុជា។
លោកបន្តថា ខ្សែភាពយន្តខ្នាតធំនេះ គ្រោងនឹងចាក់បញ្ចាំងនៅក្នុងប្រទេសចិន និងសង្ឃឹមថា នឹងមានអ្នកចូលទស្សនារាប់រយលាននាក់ ក្នុងន័យនេះ ក្រសួងទេសចរណ៍ ដូចជារដ្ឋាភិបាលកម្ពុជា ក៏ឆ្លៀតយកឱកាសនេះ ដើម្បីបញ្ជ្រាបការផ្សព្វផ្សាយគោលដៅទេសចរណ៍កម្ពុជា ទៅកាន់ប្រទេសចិន ដូចជា ខិតខំរឹតចំណងសាមគ្គីភាព កិច្ចសហការរវាងប្រទេសទំាងពីរ កម្ពុជា-ចិន ឲ្យកាន់តែខ្លាំងក្លាថែមទៀត។
នៅឆ្នាំ២០១៣ កន្លងមក កម្ពុជាបានទទួលភ្ញៀវទេសចរណ៍ចិន ចំនួន ៤៦៣,១២៣នាក់ បើប្រៀបធៀបទៅនឹងឆ្នាំមុនមានការកើនឡើងប្រមាណ ៣៩ភាគរយ ឈរលំដាប់ទីពីរ នៃទីផ្សារទាំង១០ របស់កម្ពុជា ហើយនៅឆ្នាំ២០១៥ ក្រសួងទេសចរណ៍ បានព្យាករណ៍ថា ភ្ញៀវទេសចរណ៍ចិន ចូលមកទស្សនានៅកម្ពុជា ប្រមាណ ៨០ម៉ឺននាក់ និងរហូតដល់ឆ្នាំ២០២០ ភ្ញៀវទេសចរណ៍ចិន អាចចូលមកកម្ពុជា ប្រហែល ២លាននាក់។ លោកបន្ថែមថា តាមរយៈការចាក់បញ្ចំាងខ្សែភាពយន្តនេះ កម្ពុជារំពឹងថា នឹងកាន់តែទទួលបានភ្ញៀវទេសចរណ៍ និងអ្នកវិនិយោគិនចិន ជាច្រើនថែមទៀត។
លោកបណ្ឌិត សភាចារ្យ សុខ អាន បានមានប្រសាសន៍ថា លោកសូមគាំទ្រ និងស្វាគមន៍ចំពោះការថតខ្សែភាពយន្តនេះ ហើយហេតុអ្វីបានជាយើងគាំទ្រ និងសម្រួលដល់ខ្សែភាពយន្តនេះ? ព្រោះលោកយល់ថា នេះជាគម្រោងមួយ ដែលមានក្របខណ្ឌ និងមានជះឥទ្ធិពលយ៉ាងខ្លំាងទៅលើមតិសាធារណៈនៅសាធារណៈរដ្ឋប្រជាមានិតចិន ប្រជាជនចិន ព្រោះថា ការថតខ្សែភាពបែបជំនាញនេះ ជាមធ្យោបាយផ្សព្វផ្សាយដ៏មានប្រសិទ្ធភាពបំផុត។
លោកលើកឡើងថា ការកើនឡើងនូវចំនួនភ្ញៀវទេសចរ គឺជាការអភិវឌ្ឍន៍រីកចម្រើន នៃវិស័យទេសចរណ៍នៅកម្ពុជា ហើយវិស័យទេសចរណ៍បានចូលរួមចំណែកយ៉ាងខ្លំាងក្នុងការពង្រីកពង្រឹងខឿនសេដ្ឋកិច្ចជាតិ នាពេលបច្ចុប្បន្ន និងទៅអនាគត៕
ចែករំលែកព័តមាននេះ