ខេត្តព្រះសីហនុ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា កន្លងទៅមានការបិទតូបលក់ដូរខ្លះឱ្យកូនចៅត្រឡប់ទៅស្រុកដោយសារតែនាំគ្នាជ្រួលជ្រើមនឹងបាតុកម្ម ។ ប៉ុន្តែឥឡូវបាតុកម្មមានពីរហើយ អ្នកគាំទ្រក៏មានសិទ្ធិ អ្នកប្រឆាំងក៏មានសិទ្ធិ គឺសិទ្ធិដូចគ្នា សិទ្ធិទល់សិទ្ធិ ។
ខេត្តព្រះសីហនុ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា កន្លងទៅមានការបិទតូបលក់ដូរខ្លះឱ្យកូនចៅត្រឡប់ទៅស្រុកដោយសារតែនាំគ្នាជ្រួលជ្រើមនឹងបាតុកម្ម ។ ប៉ុន្តែឥឡូវបាតុកម្មមានពីរហើយ អ្នកគាំទ្រក៏មានសិទ្ធិ អ្នកប្រឆាំងក៏មានសិទ្ធិ គឺសិទ្ធិដូចគ្នា សិទ្ធិទល់សិទ្ធិ ។
សម្តេចតេជោនាយករដ្ឋមន្ត្រីមានប្រសាសន៍បែបនេះ កាលពីព្រឹកថ្ងៃទី២៥ កុម្ភៈ នៅស្រុកស្ទឹងហាវ ខេត្តព្រះសីហនុ ក្នុងឱកាសអញ្ជើញជាអធិបតីភាពក្នុងពិធីសម្ពោធស្ថានីយអគ្គិសនីដុតធ្យូងថ្មកម្លាំង១០០ម៉េហ្គាវ៉ាត់ ខេត្តព្រះសីហនុ និងខ្សែបណ្តាញបញ្ជូនអគ្គិសនី២៣០គីឡូវ៉ុល ភ្នំពេញ-កំពង់ចាម របស់ក្រុមហ៊ុនLeader មកពីប្រទេសម៉ាឡេស៊ី ដែលប្រើប្រាស់ទុនវិនិយោគសរុប១៩៥,៤លានដុល្លារអាមេិក មានរយៈពេលសម្បទាន៣៣ឆ្នាំ ក្នុងនោះ៣ឆ្នាំសម្រាប់សាងសង់ និង៣០ឆ្នាំសម្រាប់ធ្វើអាជីវកម្ម ។ ទាក់ទិននឹងបញ្ហាខាងលើសម្តេចតេជោមានប្រសាសន៍ថា ព្រោះបញ្ហានេះកុំឱ្យមានតែម្ខាង សិទ្ធិទល់សិទ្ធិ ឆន្ទៈទល់នឹងឆន្ទៈ ។ អ្វីៗតែងតែលើកឡើងពីឆន្ទៈរាស្ត្រ បើដូច្នេះខាងអ្នកគាំទ្រក៏មានឆន្ទៈរាស្ត្រដែរ ។ បើបក្សប្រឆាំងមានសិទ្ធិជួបជុំ អ្នកគាំទ្រក៏មានសិទ្ធិជួបជុំដែរ ។ ប៉ុន្តែខ្ញុំជានាយករដ្ឋមន្ត្រីនៃព្រះរាជាណាចក្រកម្ពុជា ខ្ញុំត្រូវតែធានាសុវត្ថិភាពឱ្យទាំងអស់គ្នា ធានាទាំងសិទ្ធិជួបជុំទាំងអស់គ្នា ។
បើសិនជាត្រូវទៅទីលានប្រជាធិបតេយ្យ បើសិនទាំងសងខាងសុំទៅទីលានប្រជាធិបតេយ្យ សាលារាជធានីភ្នំពេញ ត្រូវត្រៀមចែកកន្លែងជាពីរឱ្យហើយទៅ ។ ម្ខាងអ្នកគាំទ្រ និងម្ខាងអ្នកប្រឆាំង ច្បាស់លាស់នៅពេលខាងមុខនេះនឹងមានស្នើសុំធ្វើបាតុកម្មហើយរឿងនេះវានឹងកើតមានហើយ ។ ព្រោះបញ្ហាធ្វើបាតុកម្ម គឺមិនបណ្តោយបើកឱ្យធ្វើបាតុកម្មតាមចិត្តទៀតទេ ។ ដូច្នេះសាលារាជធានីភ្នំពេញ ឬសាលាខេត្តព្រះសីហនុត្រូវត្រៀមឱ្យហើយទៅ ព្រោះខ្ញុំឮសំឡេងហើយ ។ បើអ្នកឯងមានសិទ្ធិធ្វើបាតុកម្ម អ្នកគាំទ្រក៏មានសិទ្ធិសុំធ្វើបាតុកម្មដែរ ។ ទីលានប្រជាធិបតេយ្យត្រូវត្រៀមចែកជាពីរទៅ បើមិនឱ្យ មិនឱ្យទាំងពីរទៅ ។ នៅខេត្តព្រះសីហនុក៏ដូចគ្នាដែរ បើសុំធ្វើបាតុកម្មតែងមានចរិតនយោបាយ ហើយបើមានចរិតនយោបាយគឺតែងមានអ្នកគាំទ្រនិងអ្នកប្រឆាំងហើយ ។ បើឱ្យត្រូវតែឱ្យទាំងពីរ បើកុំ កុំទាំងពីរ គឺជាការល្អ ។ បើឱ្យតែមួយដូចកាលកន្លងទៅ យើងហាមឃាត់គេដល់គេខឹង…។
សម្តេចតេជោមានប្រសាសន៍បន្តទៀតថា ខ្ញុំមិនសំណូមពរធ្វើបាតុកម្មទេ តែខ្ញុំគ្រាន់តែមិនឃាត់ សិទ្ធិមានដូចគ្នា អ្នកប្រឆាំងក៏មានសិទ្ធិ អ្នកគាំទ្រក៏មានសិទ្ធិ ខ្ញុំក៏មិនធ្វើតាមប្រធានាធិបតីវេណេហ្សុ៊យអេឡាដែរ ដែលអំពាវនាវឱ្យអ្នកគាំទ្រគាត់ចេញមកធ្វើបាតុកម្ម ។ ឯខ្ញុំអត់អំពាវនាវទេ ខ្ញុំគ្រាន់តែផ្តល់សិទ្ធិស្មើគ្នាតែប៉ុណ្ណោះ …។
សម្តេចបានផ្តាំផ្ញើដល់អាជ្ញាធរនៅគ្រប់ទីកន្លែងឱ្យហើយ បើក្រុមប្រឆាំងគេមានសិទ្ធិ ក្រុមអ្នកគាំទ្រក៏មានសិទ្ធិដែរ ។ បើសិនជាអនុញ្ញាតឱ្យធ្វើ ភ្នំពេញមានតែមួយកន្លែងគឺទីលានប្រជាធិបតេយ្យ មិនដឹងបញ្ចៀសទៅកន្លែងណា ។ បើដូច្នេះ ទាល់តែទីលានប្រជាធិបតេយ្យត្រូវធ្វើរបងថ្មឃាំងម្ខាងម្នាក់ទើបបាន យកកម្លាំងនគរបាលទៅការពារប្រហែលជាពិបាកហើយ បើដូច្នេះត្រូវត្រៀមឱ្យហើយទៅរបងថ្ម របងដែក …ម្ខាងបាតុកម្មគាំទ្រ និងម្ខាងធ្វើបាតុកម្មប្រឆាំង ត្រៀមធ្វើរបងឱ្យហើយទៅ ខ្ញុំឱ្យជាយោបល់ទេ ហើយក៏ឱ្យអ្នកដទៃភ្លឺភ្នែកដែរ កុំឱ្យចេះប្រើសិទ្ធិតែឯង ស្អីឆន្ទៈរាស្ត្រៗ!…។
ទាក់ទិននឹងការអភិវឌ្ឍវិស័យអគ្គិសនី សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា នៅពេលខាងមុខយើងត្រូវប្រឹងប្រែងថែមទៀត ដើម្បីសម្រេចឱ្យការផលិតអគ្គិសនី ដើម្បីបម្រើឱ្យសេចក្តីត្រូវការនៃការកើនឡើងរបស់ប្រជាពលរដ្ឋយើង ។ នេះជាចំណុចទី១ត្រូវខិតខំ ។ ចំណុចទី២- គឺការតភ្ជាប់បណ្តាញ ។ ក្នុងការតភ្ជាប់បណ្តាញនេះមាន៣ប្រភេទបណ្តាញដែលត្រូវតភ្ជាប់ ៖
បណ្តាញទី១-គឺបណ្តាញជាតិ ដែលឥឡូវការតភ្ជាប់បាន១៣ខេត្តហើយ នៅខ្វះខេត្តមួួយចំនួនទៀត ។ បើសិនជាមានអគ្គិសនី ហើយអត់បណ្តាញចែកចាយក៏វាទៅមិនដល់ក្នុងការប្រើប្រាស់អគ្គិសនីដែរ ។ ដូច្នេះត្រូវប្រឹងជំរុញការតភ្ជាប់បណ្តាញចែកចាយនេះឱ្យទៅគ្រប់ខេត្តដែលមិនទាន់មានបណ្តាញចែកចាយ ។ បណ្តាញទី២-គឺបណ្តាញរង ដែលត្រូវធ្វើយ៉ាងណាក្នុងមួយឆ្នាំៗត្រូវផ្តល់ថវិកា ទាំងថវិកា ក្រុមហ៊ុនអគ្គិសនីកម្ពុជា និងទុនរបស់រដ្ឋមួយចំនួនបន្ថែមទៀត ដើម្បីបញ្ជូនបណ្តាញរងតភ្ជាប់ទៅកាន់មូលដ្ឋានសម្រាប់តភ្ជាប់ទៅឱ្យប្រជាពលរដ្ឋ ។ ព្រោះមានសំណូមពរច្រើនណាស់ ដើម្បីរុញអគ្គិសនីរបស់រដ្ឋឱ្យទៅដល់ជំនួសអគ្គិសនីឯកជនដែលកំពុងប្រើតម្លៃខ្ពស់ ។ បណ្តាញទី៣-គឺភ្ជាប់បណ្តាញជាមួយប្រទេសជិតខាង ។ បណ្តាញរបស់យើងមានរួចហើយ ដែលបានធ្វើ ដែលទាញភ្លើងពីវៀតណាមមកកាន់កម្ពុជា ។ ប៉ុន្តែក៏នៅមានបណ្តាញតូចៗមួយចំនួនទៀត ដែលទាញភ្លើងពីវៀតណាមយកមកប្រើ ក៏ត្រូវខិតខំតភ្ជាប់បណ្តាញនេះដែរ ។ ពេលអគ្គិសនីនៅសល់យើងលក់ឱ្យវៀតណាម ពេលដែលខ្វះយើងទិញពីវៀតណាមវិញ ។ វារីអគ្គិសនីនៅរដូវវស្សា យើងអាចលក់ឱ្យវៀតណាមបាន១០០មេហ្គាវ៉ាត់ ជាមួយថៃបានតភ្ជាប់រុញមក១២០មេហ្គាវ៉ាត់ តាមច្រកធំរវាងប៉ោយប៉ែតមកសៀមរាប ប៉ុន្តែនៅមានបណ្តាញកោះកុង-ប៉ៃលិន អូរស្មាច់ និងបណ្តាញដទៃទៀត ដែលត្រូវតភ្ជាប់ ។
ដូច្នេះការតភ្ជាប់មាន៣បែប គឺតភ្ជាប់ផ្ទៃក្នុងតាមបណ្តាញ២៣០គីឡូវ៉ុល មួយទៀតបណ្តាញរងសម្រាប់ផ្ទៃក្នុង មួយទៀតជាមួយឡាវត្រូវតែរកការតភ្ជាប់ពីប៉ាក់សេ មកស្ទឹងត្រែង ។ ក៏មានការតភ្ជាប់មកខេត្តព្រះវិហារផងដែរ ដោយទិញពីឡាវ ត្រូវរកការបណ្តាក់ទុនដើម្បីមកផ្គត់ផ្គង់ឱ្យខេត្តព្រះវិហារ ។ សម្តេចតេជោមានប្រសាសន៍ថា ការអភិវឌ្ឍប្រទេសគឺយ៉ាងដូច្នេះ ទាមទារឱ្យមានការគិតគូរសព្វគ្រប់បែបយ៉ាង គ្រប់គ្រងប្រទេសយ៉ាងដូចម្តេចបានសេចក្តីសុខ …។ ក្នុងរបាយការណ៍របស់លោកស៊ុយ សែម រដ្ឋមន្ត្រីក្រសួងរែ៉ និងថាមពល បានឱ្យដឹងថា គោលដៅនៃការអភិវឌ្ឍស្ថានីយអគ្គិសនីដុតធ្យូងថ្មនេះ ក៏ដើម្បីទាញកម្ពុជាឱ្យងាកចេញពីការពឹងផ្អែក ទាំងស្រុង លើការប្រើប្រាស់ប្រេងក្នុងការផលិតថាមពលអគ្គិសនីដែរ ។ តាមការសិក្សារបស់អ្នកសេដ្ឋកិច្ច ធ្យូងថ្មមានតម្លៃថោកជាងប្រេង បន្ថែមពីលើនេះទៅអនាគតខាងមុខ ទីផ្សារធ្យូងថ្មអាចមានស្ថិរភាពជាងទីផ្សារប្រេងឥន្ធនៈ ។
លោករដ្ឋមន្ត្រីបន្តថា គម្រោងស្ថានីយអគ្គិសនីធ្យូងថ្មនេះមានហេដ្ឋារចនាសម្ព័ន្ធសំខាន់ៗចំនួន៣គឺ ៖
១-ស្ថានីយអគ្គិសនីដុតធ្យូងថ្មកម្លាំង១០០មេហ្គាវ៉ាត់ (៥០មេហ្គាវ៉ាត់ចំនួន២គ្រឿង) ដោយប្រើបច្ចេកវិទ្យាធ្យូងថ្មស្អាតអាចផលិតថាមពលបានប្រមាណ៧៥៣លានគីឡូវ៉ាត់ម៉ោងក្នុង១ឆ្នាំ។
២-ស្ពានផែសមុទ្រនិងប្រព័ន្ធដឹកជញ្ជូនធ្យូងថ្មប្រវែង៥០០ម៉ែត្រ ទៅក្នុងសមុទ្រនិងហេដ្ឋារចនាសម្ព័ន្ធបន្ទាប់បន្សំផ្សេងៗទៀត ។
៣-ខ្សែបណ្តាញបញ្ជូនអគ្គិសនី២៣០គីឡូវ៉ុលប្រវែង១.៧០០ម៉ែត្រ ដែលតភ្ជាប់ពីរោងចក្រផលិតអគ្គិសនីទៅអនុស្ថានីយស្ទឹងហាវ របស់អគ្គិសនីកម្ពុជានៅខាងក្រៅ ។ គម្រោងនេះប្រើប្រាស់ទុនវិនិយោគសរុប១៩៥,៤លានដុល្លារអាមេរិក រយៈពេលសម្បទាន៣៣ឆ្នាំ ក្នុងនោះ៣ឆ្នាំសម្រាប់សាងសង់ និង៣០ឆ្នាំសម្រាប់ធ្វើអាជីវកម្ម ៕
ចែករំលែកព័តមាននេះ