ខេត្តបន្ទាយមានជ័យ ៖ កម្ពុជានៅមានផ្ទៃដីសង្ស័យថាមានមីនប្រមាណ ២០០០គីឡូម៉ែត្រក្រឡា ដែលត្រូវបោសម្អាត និងត្រូវការថវិកាគំាទ្រប្រមាណ ៤៥០លានដុល្លារ នេះបើតាមការលើកទ្បើងរបស់ ឯកឧត្ដម ជុំ ប៊ុនរ៉ុង អគ្គលេខាធិការអាជ្ញាធរមីនកម្ពុជា ក្នុងពិធីរំលឹកខួបលើកទី១៥ ទិវាជាតិយល់ដឹងពីមីន ២៤ កុម្ភៈ ២០១៤ នៅក្នុងវិទ្យាល័យស្វាយចេក ទីរួមស្រុកស្វាយចេក ខេត្តបន្ទាយមានជ័យ ដោយមានការចូលរួមពីមន្ត្រីរាជការ ជនពិការ ពលរដ្ឋជាង ១ពាន់នាក់។
លោក អ៊ឹម ភាន់សុផល អភិបាលរងខេត្តបន្ទាយមានជ័យ បានលើកទ្បើងថា ដោយសារខេត្តបន្ទាយមានជ័យ មានភូមិសាស្រ្តជាប់ព្រំដែនកម្ពុជា-ថៃ និងប្រវត្តិសាស្រ្តធ្លាប់មានសង្រ្គាមរុំារ៉ៃជាង ៣ទសវត្ស បង្កឲ្យមានផលប៉ះពាល់ដោយសារមីន និងសំណល់ជាតិផ្ទុះយ៉ាងសន្ធឹកសន្ធាប់ដូចបណ្តាខេត្តស្ថិតនៅភាគខាងលិច នៃផ្ទៃប្រទេស។ ក្រោមការយកចិត្តទុកដាក់ពីរដ្ឋាភិបាល និងដៃគូសប្បុរសនានា អង្គភាពដោះមីនបានធ្វើសកម្មភាពដោះមីនបាន ១១៣គីទ្បូម៉ែត្រក្រទ្បា នៅសល់ផ្ទៃដីប្រមាណ ២២៧គីទ្បូម៉ែត្រក្រទ្បា ទៀត។
លោក អ៊ឹម ភាន់សុផល បន្តថា តាមរយៈការបោសសម្អាតមីនធ្វើឲ្យការគ្រោះថ្នាក់ ឬផលប៉ះពាល់ដោយសារមីនមានការថយចុះបន្តបន្ទាប់ពីមួយឆ្នាំទៅមួយឆ្នាំ ជាក់ស្តែងនៅឆ្នាំ២០១៣ មានជនរងគ្រោះដោយសារមីនតែ ៦នាក់ ធៀបទៅឆ្នាំ២០១២ មានអ្នករងគ្រោះ ១៧នាក់។ បន្ទាប់ពី ឯកឧត្តម នេត ផល ទីប្រឹក្សាអាជ្ញាធរមីនកម្ពុជា អានសារ សម្តេចអគ្គសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា រួចមក ឯកឧត្តម ជុំ ប៊ុនរ៉ុង បានមានប្រសាសន៍ថា ទិវាជាតិយល់ដឹងពីមីនត្រូវបានប្រារព្ធធ្វើទ្បើងតាំងពីឆ្នាំ១៩៩៩ ហើយបានបន្តធ្វើជារៀងរាល់ឆ្នាំ។
គោលបំណង នៃការរៀបចំទិវាជាតិនេះឡើង គឺដើម្បីពញ្ញាក់ស្មារតីដល់ប្រជាពលរដ្ឋទូទាំងប្រទេសឲ្យមានការប្រុងប្រយ័ត្នចំពោះគ្រោះថ្នាក់ដោយសារមីន និងសំណល់ជាតិផ្ទុះពីសង្រ្គាម។ ចាប់ពីឆ្នាំ១៩៩២ ដល់ឆ្នាំ២០១៣ កម្ពុជាបានបោសសម្អាតមីន និងកាកសំណល់សង្រ្គាមលើផ្ទៃដីចំនួនជាង ១០០០គីទ្បូម៉ែត្រក្រទ្បា រកឃើញ និងកំទេចចោលគ្រាប់មីន និងគ្រាប់មិនទាន់ផ្ទុះចំនួនជាង ២លានគ្រាប់។ សមិទ្ធផលទាំងនេះ បានរួមចំណែកយ៉ាងសំខាន់នៅការបង្កើនសុខសុវត្តិភាពជូនប្រជាពលរដ្ឋរស់នៅដ៏សុខសាន្ត និងជំរុញការអភិវឌ្ឍសង្គមជាតិ។ ម្យ៉ាងទៀត បានរំដោះដីជូនប្រជាពលរដ្ឋធ្វើស្រែចម្ការ រៀបចំភូមិឋាន ផ្លូវផ្នល់ សាលារៀន និងវត្តអារាម។
ឯកឧត្តមអគ្គលេខាធិការ បានបញ្ជាក់ថា តាមរបាយការណ៍របស់អាជ្ញាធរមីន បានបង្ហាញអំពីការធ្លាក់ចុះជាបន្តបន្ទាប់ នៃចំនួនជនរងគ្រោះដោយសារមីន និងសំណល់ជាតិផ្ទុះពីសង្រ្គាម ដែលនៅឆ្នាំ១៩៩៦ មានប្រមាណជាង ៤០០០នាក់ ហើយធ្លាក់ជាបន្តបន្ទាប់មកត្រឹម ១៨៦នាក់ នៅឆ្នាំ២០១២ និង ១១១នាក់ នៅឆ្នាំ២០១៣ កន្លងទៅនេះ។ ឆ្នាំ១៩៧៩ ដល់ឆ្នាំ២០១៣ ចំនួនអ្នករងគ្រោះដោយសារគ្រោះថ្នាក់មីន និងគ្រាប់មិនទាន់ផ្ទុះមានប្រមាណ ៦៤.៣១៤នាក់។
នាឱកាសនោះដែរ គណៈអធិបតី ក៏បានអញ្ជើញចែកអំណោយដល់តាជី យាយជី ចំនួន ២០នាក់ ម្នាក់ៗ ក្រណាត់ស ១ដុំ ថវិកាចំនួន ២ម៉ឺនរៀល ប្រជាពលរដ្ឋចំនួន ២០០នាក់ ម្នាក់ៗ អាវយឺត១ ថវិកា ២ម៉ឺនរៀល ជនពិកាចំនួន ៣០នាក់ ម្នាក់ៗ អាវយឺត១ ថវិកា ៤ម៉ឺនរៀល កងកម្លាំងប្រដាប់អាវុធមាននគរបាល កងរាជអាវុធហត្ថ និងយោធាស្រុកស្វាយចេក ចំនួន ៦០នាក់ ម្នាក់ៗ អាវយឺត១ ថវិកា ២ម៉ឺនរៀល មន្ត្រីរាជការ អាជ្ញាធរដែនដី ចំនួន ៣០នាក់ ម្នាក់អាវយឺត១ ថវិកា ២ម៉ឺនរៀល លោកគ្រូ អ្នកគ្រូ ចំនួន ៥០នាក់ ម្នាក់អាវយឺត១ ថវិកា ២ម៉ឺនរៀល សិស្សានុសិស្សចំនួន ៤៥០នាក់ ម្នាក់អាវយឺត១ ថវិកា ១ម៉ឺនរៀល កាយរិទ្ធចំនួន ៥០នាក់ ម្នាក់អាវយឺត១ ថវិកា ២ម៉ឺនរៀល កម្លាំងការពារសន្តិសុខថវិកាចំនួន ៦០ម៉ឺនរៀល និងការិយាល័យអប់រំយុវជន និងកីឡាស្រុក បាល់ចំនួន ៥០៕
ចែករំលែកព័តមាននេះ