រាជធានីភ្នំពេញ ៖ មន្ដ្រីជាន់ខ្ពស់ក្រសួងយុត្ដិធម៌ បានអះអាងថា ការចុះបញ្ជីកិច្ចសន្យាទ្រព្យសម្បត្ដិប្ដី-ប្រពន្ធ បានផ្ដល់នូវសារសំខាន់ណាស់សម្រាប់ជួយការពារទ្រព្យសម្បត្ដិ និងសហព័ទ្ធរៀងៗខ្លួន នៅពេលដែលគូភាគីទាំងពីរមានវិវាទកើតឡើង ដើម្បីងាយស្រួលក្នុងការដោះស្រាយតាមផ្លូវតុលាការ ។
រាជធានីភ្នំពេញ ៖ មន្ដ្រីជាន់ខ្ពស់ក្រសួងយុត្ដិធម៌ បានអះអាងថា ការចុះបញ្ជីកិច្ចសន្យាទ្រព្យសម្បត្ដិប្ដី-ប្រពន្ធ បានផ្ដល់នូវសារសំខាន់ណាស់សម្រាប់ជួយការពារទ្រព្យសម្បត្ដិ និងសហព័ទ្ធរៀងៗខ្លួន នៅពេលដែលគូភាគីទាំងពីរមានវិវាទកើតឡើង ដើម្បីងាយស្រួលក្នុងការដោះស្រាយតាមផ្លូវតុលាការ ។
ថ្លែងក្នុងសិក្ខាសាលាផ្សព្វផ្សាយប្រកាសស្ដីពីនីតិវិធីនៃការចុះបញ្ជីកិច្ចសន្យាទ្រព្យសម្បត្ដិប្ដី-ប្រពន្ធ នាថ្ងៃទី២៤ កុម្ភៈ នៅសណ្ឋាគារសាន់វេលោក សូរ ចាន់ធី អនុរដ្ឋលេខាធិការក្រសួងយុត្ដិធម៌ មានប្រសាសន៍ថា ការផ្សព្វផ្សាយប្រកាសនេះគឺដើម្បីបង្ហាញពីទំនាក់ទំនងរវាងបុគ្គលនិងបុគ្គលដែលបានរៀបអាពាហ៍ពិពាហ៍ និងបុគ្គលដែលត្រូវរៀបអាពាហ៍ពិពាហ៍ជាមួយគ្នា ដែលមាននូវធនធានទ្រព្យសម្បត្ដិជាចលនវត្ថុក្ដី ឬជាអចលនវត្ថុក្ដី ដើម្បីបញ្ជាក់ឱ្យបានច្បាស់លាស់អំពីសិទ្ធិទៅលើទ្រព្យសម្បត្ដិនោះ ថាតើធនធានទ្រព្យសម្បត្ដិណាខ្លះជារបស់រួម ហើយធនធានទ្រព្យសម្បត្ដិណាខ្លះជាសិទ្ធិផ្ដាច់មុខរបស់ភាគីណាមួយ ។
លោកបញ្ជាក់ថា ការរៀបចំប្រកាសនេះឡើងគឺមានលក្ខណៈល្អ ដែលជាការវិវត្ដមួយសម្រាប់ប្រជាពលរដ្ឋអាចទទួលយកបាន ហើយរៀបចំនៅក្នុងក្រមរដ្ឋប្បវេណី សម្រាប់ផ្ដល់ភាពងាយស្រួលដល់ប្រជាពលរដ្ឋក្នុងការចុះបញ្ជី និងជួយការពារនូវទ្រព្យសម្បត្ដិដែលគូភាគីបានរៀបការជាមួយគ្នា ។ ជាមួយនេះបញ្ជាក់ឱ្យបានច្បាស់អំពីអ្វីដែលជាទ្រព្យសម្បត្ដិរួម និងអ្វីដែលជាទ្រព្យសម្បត្ដិដោយឡែក ដែលនីតិវិធីនេះធ្វើឡើងសម្រាប់ការពារនៅពេលដែលគូភាគីទាំងពីរមានវិវាទកើតឡើង ដើម្បីងាយស្រួលក្នុងការដោះស្រាយតាមផ្លូវតុលាការ ។ លោកអនុរដ្ឋលេខាធិការបន្ដថា ប្រកាសទាក់ទិននឹងនីតិវិធីចុះបញ្ជីទ្រព្យសម្បត្ដិប្ដី-ប្រពន្ធ គឺជាប្រកាសនីតិវិធីសម្រាប់គ្រប់គ្រងលើការចុះបញ្ជីកិច្ចសន្យាទាំងឡាយណាដែលបង្កើតឡើងដោយប្ដី-ប្រពន្ធ ទាក់ទងនឹងទ្រព្យសម្បត្ដិ ។
ជាគោលការណ៍ប្រព័ន្ធទ្រព្យសម្បត្ដិប្ដីប្រពន្ធតាមច្បាប់នៃប្រទេសកម្ពុជាគឺជាប្រព័ន្ធទ្រព្យសម្បត្តិរួមដែលអនុញ្ញាតឱ្យប្ដីប្រពន្ធមានកម្មសិទ្ធិរួមគ្នាលើកម្មសិទ្ធិទាំងអស់ ដែលពួកគាត់ ទាំងពីរធ្វើលទ្ធកម្មនៅក្រោយពេលអាពាហ៍ពិពាហ៍ ។ លោកអនុរដ្ឋលេខាធិការចាត់ទុកថា តាមរយៈការផ្សព្វផ្សាយប្រកាសនេះ នឹងក្លាយទៅជាឧបករណ៍គតិយុត្ដយ៉ាងសំខាន់ដែលផ្ដល់សិទ្ធិ និងបើកឱកាសឱ្យប្ដី-ប្រពន្ធឬបុគ្គលដែលនឹងត្រូវរៀបអាពាហ៍ពិពាហ៍ជាមួយគ្នាមានចំណងទាក់ទងក្នុងការចុះបញ្ជី អាចធ្វើការចុះបញ្ជីអំពីកិច្ចសន្យាទ្រព្យសម្បត្ដិប្ដី-ប្រពន្ធបាន ហើយឈានទៅបង្កើតការទាក់ទងរវាងបុរសនិងស្រ្ដីឱ្យមានភាពច្បាស់លាស់ និងតម្លាភាពពាក់ព័ន្ធទៅនឹងបញ្ហាទ្រព្យសម្បត្តិ និងចូលរួមចំណែកក្នុងការពង្រឹងគោលការណ៍សមភាពយេនឌ័រនៅក្នុងសង្គមកម្ពុជា ។ កញ្ញា អុីសូអិ មីហា ទីប្រឹក្សាច្បាប់របស់ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន បានលើកឡើងថា ប្រកាសស្តីពីនីតិវិធីនៃកិច្ចសន្យាទ្រព្យសម្បត្តិប្តី-ប្រពន្ធនេះ ផ្តល់នូវសារសំខាន់ណាស់សម្រាប់ការពារផលប្រយោជន៍របស់ប្រជាពលរដ្ឋក្នុងការគ្រប់គ្រងទ្រព្យសម្បត្តិ ឬអចលនវត្ថុដែលជាទ្រព្យសម្បត្តិដោយឡែក និងរួមរបស់ប្តី ឬប្រពន្ធដែលបានចុះបញ្ជីរួចហើយ ដើម្បីងាយស្រួលក្នុងការដោះស្រាយទៅតាមផ្លូវច្បាប់ នៅពេលដែលគូភាគីទាំង២មានបញ្ហា និងមានជម្លោះកើតឡើង ។
ជាមួយគ្នានេះ ក្រសួងយុត្តិធម៌ បានធ្វើការសិក្សាជាមួយអ្នកជំនាញការនៃអង្គការចៃកា(JICA) ក្នុងការរៀបចំប្រកាសទម្រង់គំរូចុះបញ្ជី និងពាក្យសុំដែលតាមរយៈការផ្សព្វផ្សាយនេះ ក្រសួងបានត្រៀមខ្លួនរួចជាស្រេចក្នុងការទទួលពាក្យសុំចុះបញ្ជីកិច្ចសន្យាទ្រព្យសម្បត្តិប្តីប្រពន្ធ ចាប់ពីពេលនេះតទៅ ។ មាត្រា៩៧២ នៃក្រមរដ្ឋប្បវេណីឆ្នាំ២០០៨ ចែងថា ទ្រព្យសម្បត្តិដោយឡែក គឺជាទ្រព្យសម្បត្តិដែលស្ថិតនៅក្រោមកម្មសិទ្ធិរបស់សហព័ទ្ធណាម្នាក់ក្នុងនោះមាន ៖
១-ទ្រព្យសម្បត្តិដែលសហព័ទ្ធមាននៅមុនពេលរៀបអាពាហ៍ពិពាហ៍ ។
២-ទ្រព្យសម្បត្តិដែលសហព័ទ្ធទទួលបានដោយប្រទានកម្ម សន្ដតិកម្ម អច្ចយទាន នៅក្នុងអំឡុងពេលអាពាហ៍ពិពាហ៍ ។
៣- ទ្រព្យជាតម្លៃតប ដែលទទួលបានពីការចាត់ចែងនៃចំណុចទី១និង២ ។
ចំណែកមាត្រា៩៧៣ នៃក្រមរដ្ឋប្បវេណីបានចែងពីទ្រព្យសម្បត្តិរួមនិងបានឱ្យនិយមន័យថា ទ្រព្យរួមគឺជាទ្រព្យទាំងឡាយណាដែលប្ដីប្រពន្ធទាំងសងខាងឬតែម្ខាងទទួលបាននៅក្នុងអំឡុងពេលអាពាហ៍ពិពាហ៍ លើកលែងតែទ្រព្យសម្បត្តិដែលកំណត់ដោយចំណុចទី២និងទី៣ ត្រង់មាត្រា៩៧២ នៃក្រមរដ្ឋប្បវេណី ។ គួរបញ្ជាក់ថា ក្រសួងយុត្តិធម៌បានផ្សព្វផ្សាយប្រកាសស្ដីពីនីតិវិធីនៃការចុះបញ្ជីកិច្ចសន្យាទ្រព្យសម្បត្តិប្ដី-ប្រពន្ធជាលើកដំបូងនៅក្នុងប្រទេសកម្ពុជា ដើម្បីឱ្យប្រជាពលរដ្ឋមានការយល់ដឹងនិងជ្រួតជ្រាបព័ត៌មានកាន់តែច្បាស់ ទាក់ទិននឹងតម្លៃ និងអត្ថប្រយោជន៍សម្រាប់ការពារទ្រព្យសម្បត្តិស្របច្បាប់រវាងប្ដី និងប្រពន្ធ ខណៈពេលដែលអ្នកទាំងពីរមានបញ្ហាឬវិវាទកើតឡើងការលែងលះគ្នាក្នុងគ្រួសារ និងការប្ដឹងទាមទារទ្រព្យសម្បត្តិពីតតិយជននាពេលខាងមុខ ៕
ចែករំលែកព័តមាននេះ