រាជធានីភ្នំពេញ ៖ ស្ថានអាកាសស្ទឹងមានជ័យ ដែលបានបើកការដ្ឋានស្ថាបនាកាលពីថ្ងៃទី២៦ វិច្ឆិកា ២០១២ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនោះ ពេលនេះស្ថាបនាបាន៧៥% ហើយ ។ បច្ចុប្បន្នក្រុមការងារបាននិងកំពុងសម្រុកទាំងយប់ទាំងថ្ងៃជំរុញឱ្យរួចរាល់ អាចឱ្យប្រជាពលរដ្ឋធ្វើដំណើរបានក្នុងអំឡុងខែតុលា ២០១៤ ខាងមុខនេះមុនផែនការគ្រោងទុក ដែលគ្រោងបញ្ចប់នៅក្នុងខែមីនា ឆ្នាំ២០១៥ ។
នេះបើតាមការអះអាងរបស់មន្ត្រីមន្ទីរសាធារណការរាជធានីភ្នំពេញ ។ កាលពីថ្ងៃសៅរ៍ ទី២២ កុម្ភៈ លោកប៉ា សុជាតិវង្ស អភិបាលរាជធានីភ្នំពេញ បានដឹកនាំមន្ត្រីជំនាញចុះពិនិត្យការដ្ឋានសំណង់ស្ពានអាកាសស្ទឹងមានជ័យនេះ ដែលក្រុមការងារបាននិងកំពុងស្ថាបនាយ៉ាងសស្រាក់សស្រាំ ជាពិសេសការដ្ឋាននេះឈានដល់ការជីកកាយធ្វើផ្លូវក្រោមដីដែលស្ថាបនាបានប្រមាណ៤០% ហើយ ។ លោកសាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញឱ្យដឹងថា ការដ្ឋានសាងសង់ស្ពានអាកាសស្ទឹងមានជ័យ រហូតមកដល់ពេលនេះស្ថាបនាបាន៧៥% ហើយ ។ ដោយមានការជំរុញ និងណែនាំពីលោកប៉ា សុជាតិវង្ស ក្រុមការងារស្ថាបនាស្ពាននេះបានសម្រុកធ្វើទាំងយប់ទាំងថ្ងៃ និងឱ្យរួចរាល់ក្នុងខែតុលាខាងមុខនេះអាចឱ្យប្រជាពលរដ្ឋធ្វើដំណើរបាន ។ ក្នុងពេលចុះពិនិត្យការដ្ឋានស្ថាបនាស្ពានអាកាសស្ទឹងមានជ័យនេះ លោកប៉ា សុជាតិវង្ស បានណែនាំដល់មន្ទីរជំនាញ និងក្រុមហ៊ុនដែលទទួលការស្ថាបនាសម្រុកឱ្យបានលឿន និងរួចរាល់មុនគម្រោង ។ នៅក្នុងពេលឆាប់ៗខាងមុខនេះ បន្ទាប់ពីស្ថាបនាស្ពានអាកាសស្ទឹងមានជ័យ ផ្លូវជើងឯក ផ្លូវលេខ៣៧១ និងផ្លូវចោមចៅរួចរាល់នោះ ធ្វើឱ្យតំបន់ទាំងនោះកាន់តែប្រសើរឡើង ជាពិសេសតំបន់ស្ពានស្ទឹងមានជ័យនេះតែម្តងនឹងលែងកកស្ទះចរាចរណ៍ទៀតហើយ ។
គួររំលឹកថា ស្ពានអាកាសស្ទឹងមានជ័យនេះសាងសង់ជា៣ដំណាក់កាលដោយមានចំនួន៥ខ្សែ មួយខ្សែត្រូវសាងសង់មុជក្រោមដីត្រង់ចំណុចស្តុបស្ទឹងមានជ័យ ២ខ្សែទៀតសាងសង់ឡើងហោះលើកំណាត់វិថីព្រះមុនីរ៉េត ។ ចំណែក២ខ្សែផ្សេងទៀតសាងសង់ឡើងបំបែកខ្នែងចេញពីស្ពានអាកាសធំលើប្រឡាយស្ទឹងមានជ័យ។ ការស្ថាបនាស្ពានអាកាសស្ទឹងមានជ័យនេះ ត្រូវប្រើប្រាស់រយៈពេល២៨ខែគិតចាប់ពីថ្ងៃបើកការដ្ឋានទៅ ក្រោមការត្រួតពិនិត្យបច្ចេកទេសពីមន្ទីរសាធារណការ និងដឹកជញ្ជូនរាជធានីភ្នំពេញ អនុវត្តដោយក្រុមហ៊ុន OCIC ក្នុងគម្រោងទឹកប្រាក់ប្រមាណ១៧លានដុល្លារអាមេរិក ដែលជាកញ្ចប់ថវិកាបានមកពីការវិនិយោគតំបន់អភិវឌ្ឍន៍ជ្រោយចង្វារបស់ក្រុមហ៊ុន OCIC៕
ចែករំលែកព័តមាននេះ