រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោកអុិត សំហេង បានជំរុញឱ្យមានការរៀបចំសេចក្តីព្រាងច្បាប់ស្តីពីសហជីព ដើម្បីស្នើសុំការអនុម័តពីរដ្ឋសភានៅក្នុងឆ្នាំ២០១៤ នេះ ។
រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោកអុិត សំហេង បានជំរុញឱ្យមានការរៀបចំសេចក្តីព្រាងច្បាប់ស្តីពីសហជីព ដើម្បីស្នើសុំការអនុម័តពីរដ្ឋសភានៅក្នុងឆ្នាំ២០១៤ នេះ ។ ការជំរុញនេះ បានធ្វើឡើងក្នុងជំនួបជាមួយក្រុមការងារគណៈកម្មការទី៨ នៃរដ្ឋសភា ដឹកនាំដោយលោកជំទាវ ហូ ណូន ប្រធានគណៈកម្មការនេះ កាលពីរសៀលថ្ងៃទី១៨ កុម្ភៈ នៅទីស្តីការក្រសួង ។
ក្នុងជំនួបពិភាក្សានេះ លោកអិុត សំហេង បានលើកឡើងអំពីផែនការយុទ្ធសាស្ត្រអភិវឌ្ឍន៍វិស័យការងាររបស់ក្រសួងឆ្នាំ២០១៤-២០១៨ ជាអាទិភាពទាំង៥មាន ៖ ១-ការអភិវឌ្ឍ និងការលើកកម្ពស់លក្ខខណ្ឌការងារ ២-ការអភិវឌ្ឍការអប់រំបណ្តុះបណ្តាលបច្ចេកទេស និងវិជ្ជាជីវៈ ៣-ការអភិវឌ្ឍមុខរបរ និងការងារ ៤-ការអភិវឌ្ឍរបបសន្តិសុខសង្គមសម្រាប់ជនទាំងឡាយដែលស្ថិតនៅក្រោមបទប្បញ្ញតិ្តនៃច្បាប់ស្តីពីការងារ និង៥-ការពង្រឹងអភិបាលកិច្ចល្អ ។ លោករដ្ឋមន្ត្រីបន្តថា ក្នុងនីតិកាលទី៥ នៃរដ្ឋសភា ក្រសួងការងារ និងបណ្តុះបណ្តាលវិជ្ជាជីវៈមានផែនការធ្វើកំណែទម្រង់ជាច្រើនដូចដែលមានរំលេចក្នុងផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ឆ្នាំ២០១៤-២០១៨ ។ ក្រសួងនឹងកែសម្រួលនូវលិខិតបទដ្ឋានបង្កើតច្រកចេញចូលតែមួយ ដើម្បីពង្រឹងការជ្រើសរើសពលករ ដោយតម្រូវឱ្យភ្នាក់ងារជ្រើសរើសឯកជនត្រូវតែមានការអនុញ្ញាតពីក្រសួងជាមុន ទើបអាចចុះជ្រើសរើសពលករនៅតាមមូលដ្ឋាន ដោយមានការសហការពីមន្ទីរការងាររាជធានី-ខេត្ត សំដៅធ្វើយ៉ាងណាកាត់បន្ថយការឆបោកពលករពីសំណាក់ជនខិលខូចមួយចំនួន ។
លើសពីនេះ ក្រសួងនឹងបង្កើនគុណភាពនៃការផ្តល់សេវាឱ្យបានល្អប្រសើរ ដើម្បីបង្កលក្ខណៈងាយស្រួលដល់អ្នកដែលទទួលសេវា ។ លោកអុិត សំហេង បញ្ជាក់ថា ក្រសួងនឹងកែទម្រង់ការធ្វើអធិការកិច្ចការងារដោយបង្កើតជាក្រុមអធិការកិច្ចឯកភាពមួយដែលមានសមាសភាពមកពីគ្រប់នាយកដ្ឋានពាក់ព័ន្ធ ដោយប្រើប្រាស់នូវបញ្ជីត្រួតពិនិត្យរួម សំដៅកាត់បន្ថយបន្ទុករបស់និយោជកដែលត្រូវរងអធិការកិច្ច ។ លើសពីនេះ ក្រសួងនឹងបន្តជំរុញការរៀបចំសេចក្តីព្រាងស្តីពីសហជីពដើម្បីស្នើសុំការអនុម័តពីរដ្ឋសភានៅក្នុងឆ្នាំ២០១៤ នេះ និងធ្វើវិសោធនកម្មលើកិច្ចសន្យាការងារដែលមិនទាន់មានលក្ខណៈគ្រប់ជ្រុងជ្រោយ និងបង្កឱ្យមានការជជែកវែកញែករវាងនិយោជក និងកម្មករនិយោជិត ។ លោករដ្ឋមន្ត្រីបន្ថែមថា សម្រាប់របបសន្តិសុខសង្គម ក្រសួងបានអនុវត្ត មានរបបធានារ៉ាប់រងហានិភ័យការងារ ដែលរហូតមកដល់ពេលនេះក្រសួងបានចុះបញ្ជិការោងចក្រ-សហគ្រាសចំនួន៦ពាន់ និងមានកម្មករនិយោជិតជាង៨០ម៉ឺននាក់ ។ ដោយឡែក នៅឆ្នាំ២០១៤ ក្រសួងនឹងចាប់ឱ្យដំណើរការរបបធានារ៉ាប់រងសុខភាពកម្មករនិយោជិតដែលមានអត្រាភាគទាន៣,៥%នៃប្រាក់ខែ និងតម្រូវឱ្យកម្មករនិយោជិតបង់ចំនួន៥០% និងនិយោជកបង់៥០% ។ ក្នុងឆ្នាំ២០១៥ ក្រសួងនឹងដាក់ឱ្យដំណើរការរបបសោធននិវត្តន៍ខាងផ្នែកឯកជន ។
លោកអុិត សំហេង ឱ្យដឹងទៀតថា ពេលនេះក្រសួងកំពុងខិតខំសិក្សាស្រាវជ្រាវលម្អិតអំពីការគ្រប់គ្រងរបបប្រាក់សោធននិវត្តន៍ ក៏ដូចជាការកំណត់នូវអត្រានៃការបង់ភាគទានជាដើម ។ ជាក់ស្តែង ក្រសួងបានជួបពិភាក្សាគ្នាលើចំណុចនេះជាមួយក្រុមហ៊ុន HITACHI ពាក់ព័ន្ធនឹងគម្រោងជំនួយបច្ចេកទេសប្រព័ន្ធគ្រប់គ្រងរបបប្រាក់សោធននិវត្តន៍ កាលពីថ្ងៃទី១៧ កុម្ភៈ កន្លងមកថ្មីៗនេះ ។ ក្នុងផ្នែកសហប្រតិបត្តិការអន្តរជាតិ ក្រសួងនឹងរៀបចំពង្រឹងសមត្ថភាពមន្ត្រីឱ្យអនុវត្តតួនាទី កាតព្វកិច្ចជាសមាជិកនៃអង្គការអន្តរជាតិនានា ពិសេសអង្គការអន្តរជាតិខាងការងារ ។ ក្រសួងក៏នឹងពង្រឹងការផ្តល់សេវាជូនប្រជាពលរដ្ឋអ្នកប្រើប្រាស់សេវាទាំងថ្នាក់ជាតិ និងថ្នាក់ក្រោមជាតិ ។ បន្ទាប់ពីស្តាប់ការលើកឡើងរបស់លោករដ្ឋមន្ត្រី លោកជំទាវ ហូ ណូន ប្រធានគណៈកម្មការទី៨ នៃរដ្ឋសភាបានថ្លែងអំណរគុណ និងសន្យារួមគ្នាថា នឹងខិតខំប្រឹងប្រែងឱ្យអស់ពីកម្លាំងកាយចិត្តដើម្បីបម្រើប្រជាជន និងជួយកសាងជាតិមាតុភូមិឱ្យមានការអភិវឌ្ឍប្រកបដោយនិរន្តរភាព ។
គួររំឭកថា បច្ចុប្បន្ននេះកម្ពុជាមិនទាន់មានច្បាប់ស្តីពីសហជីពនៅឡើយទេ គឺមានតែច្បាប់ស្តីពីការងារ ហើយក្នុងច្បាប់នេះមានមាត្រាមួយចំនួនបានចែងអំពីតួនាទីសហជីពផងដែរ បុ៉ន្តែគេមិនទាន់ដឹងថា ច្បាប់ស្តីពីសហជីពដែលក្រសួងការងារគ្រោងនឹងរៀបចំ ហើយស្នើសុំឱ្យរដ្ឋសភាអនុម័តក្នុងឆ្នាំ២០១៤ នេះមានបុ៉ន្មានជំពូក និងបុ៉ន្មានមាត្រានៅឡើយទេ ៕
ចែករំលែកព័តមាននេះ