ខេត្តក្រចេះ ៖ ឈើប្រណីតប្រភេទធ្នង់ជាង១រយកំណាត់មានតូចមានធំ ដែលលាក់ទុកនៅព្រៃខាងក្រោយឃុំរលួស ស្រុកសំបូរ បានត្រូវមន្ត្រីផ្នែករដ្ឋបាលព្រៃឈើក្រចេះ ចុះបង្ក្រាបនិងចាប់រឹបអូសទាំងស្រុង កាលពីរសៀលថ្ងៃទី២២ កុម្ភៈ ។
ខេត្តក្រចេះ ៖ ឈើប្រណីតប្រភេទធ្នង់ជាង១រយកំណាត់មានតូចមានធំ ដែលលាក់ទុកនៅព្រៃខាងក្រោយឃុំរលួស ស្រុកសំបូរ បានត្រូវមន្ត្រីផ្នែករដ្ឋបាលព្រៃឈើក្រចេះ ចុះបង្ក្រាបនិងចាប់រឹបអូសទាំងស្រុង កាលពីរសៀលថ្ងៃទី២២ កុម្ភៈ ។
មិនទាន់មានសេចក្តីរាយការណ៍ណាបញ្ជាក់ឱ្យច្បាស់ ថាឈើប្រណីតល្មើសច្បាប់ដែលសមត្ថកិច្ចបានចាប់រឹបអូសទាំងនេះ ជារបស់មេឈ្មួញណានោះទេ ដោយគ្រាន់តែដឹងថាឈើទាំងនេះគឺឈ្មួញបានទុកជាគំនរលាក់ក្នុងព្រៃជ្រៅ សម្រាប់រកឱកាសដឹកចេញ ។ បន្ទាប់ពីមានការរុករកឃើញឈើទាំងនេះ ដែលសុទ្ធសឹងជាឈើប្រណីតប្រភេទធ្នង់មានមុខកាត់តូចធំចំនួនជាង១រយកំណាត់ សមត្ថកិច្ចរដ្ឋបាលព្រៃឈើក៏យកមករក្សាទុកនៅស្ថានីយបណ្តុះកូនឈើខ្សារ ដើម្បីចាត់វិធានការតាមច្បាប់ និងវាស់វែង ។ មន្ត្រីផ្នែករដ្ឋបាលព្រៃឈើក្រចេះ បានឱ្យដឹងនៅថ្ងៃទី២៣ កុម្ភៈ ថា ឈើធ្នង់ជាង១រយកំណាត់ទាំងតូចទាំងធំនេះមាន បរិមាណស្មើនឹងជាង២០ម៉ែត្រគូប ។
តាមប្រភពព័ត៌មានបានបង្ហើបប្រាប់ថា ឈើទាំងនេះត្រូវបានឈ្មួញដឹកតាមរទេះគោ រទេះក្របី ចេញពីព្រៃជ្រៅៗ នៅខេត្តមណ្ឌលគិរី យកមកលាក់ទុកនៅតាមព្រៃមួយចំនួននៅក្នុងស្រុកសំបូរ ដើម្បីរកឱកាសដឹកចេញ ។
រយៈពេលប៉ុន្មានខែចុងក្រោយនេះ សកម្មភាពដឹកជញ្ជូនឈើប្រណីតរបស់ក្រុមឈ្មួញ បានកម្រើកឡើងវិញ បន្ទាប់ពីមានការស្ងប់ស្ងាត់មួយរយៈក្រោយពីទីផ្សារចុងក្រោយនៅប្រទេសវៀតណាម បានផ្អាកការទិញចូល ។ ការលួចដឹកជញ្ជូនរបស់ពួកឈ្មួញ គឺធ្វើឡើងគ្រប់រូបភាពតាមរថយន្តតូចធំ ពិសេសការដាក់បង្កប់ក្រោមបាវសណ្តែកឬបាវដំឡូងមី ដើម្បីបំភ័ន្តភ្នែកសមត្ថកិច្ច ។ លោក ព្រាប សុទ្ធារា៉ នាយផ្នែករដ្ឋបាលព្រៃឈើក្រចេះ បានឱ្យដឹងថា កម្លាំងសមត្ថកិច្ចបានប្រើប្រាស់កម្លាំងសរុបដែលរួមមានមេព្រៃ ប៉ូលិស និងប៉េអឹម ក្នុងការចុះរុករក និងចាប់រឹបអូសឈើប្រណីតខុសច្បាប់មួយករណីនេះ ។ លោកនាយផ្នែកបញ្ជាក់ថា មន្ត្រីរដ្ឋបាលព្រៃឈើកំពុងវាស់វែងឈើទាំងនេះឱ្យដឹងចំនួនពិតប្រាកដ និងកសាងសំណុំរឿងតាមនីតិវិធីស្តីពីព្រៃឈើ ។ មុននេះឈើប្រណីតជាច្រើនកំណាត់ដែលដឹកជញ្ជូនបែបលោតឆត្រ តាមរថយន្តកូរ៉េចំណុះ៥តោន បានត្រូវកម្លាំងមេព្រៃឃ្សឹមបង្ក្រាបកាលពីព្រឹកថ្ងៃទី១៧ កុម្ភៈ នៅលើផ្លូវជាតិលេខ៧ ក្នុងភូមិស្រែរនាម ឃុំឃ្សឹម ស្រុកស្នួល ។ មិនទាន់មាន
សេចក្តីរាយការណ៍ណាមួយបញ្ជាក់ថា រថយន្តដឹកឈើ និងឈើប្រណីតរាប់សិបកំណាត់នេះជាកម្មសិទ្ធិរបស់ជនណាទេ ។ មានការវាយតម្លៃថា ការដឹកជញ្ជូនឈើជាលក្ខណៈទ្រង់ទ្រាយធំបែបនេះ មិនមែនជនសាមញ្ញអាចធ្វើទៅបាននោះទេ ។
បន្ទាប់ពីមានការចាប់ឃាត់រួចមក រថយន្តកូរ៉េចំណុះ៥តោនមានផ្ទុកឈើប្រណីតពេញព្រៀបនេះ ត្រូវបានកម្លាំងសមត្ថកិច្ចនាំយកទៅរក្សាទុកបណ្តោះអាសន្ននៅសង្កាត់រដ្ឋបាលព្រៃឈើឃ្សឹម ក្នុងឃុំឃ្សឹម ស្រុកស្នួល ។ ឈើទាំងនេះត្រូវគេសន្និដ្ឋានថា សុទ្ធសឹងជាឈើប្រណីតប្រភេទធ្នង់ និងនាងនួន មានមុខកាត់ធំៗចំនួនរាប់សិបកំណាត់ និងមានបរិមាណជិតដប់ម៉ែត្រគូប និងតម្លៃរាប់មុឺនដុល្លារ ។
មន្ត្រីរដ្ឋបាលព្រៃឈើសង្កាត់ឃ្សឹមបញ្ជាក់ថា ពុំមានជនណាម្នាក់ត្រូវចាប់ខ្លួនក្នុងជំនួញដឹកជញ្ជូនឈើខុសច្បាប់នេះទេ ដោយគ្រាន់តែមានរថយន្តដឹកឈើធុនធំមួយគ្រឿង និងឈើប្រណីតរាប់សិបកំណាត់ត្រូវចាប់ឃាត់ទុកតែប៉ុណ្ណោះ ។ កម្លាំងជំនាញនឹងស្ទូចឈើទាំងនេះចេញពីរថយន្ត ដើម្បីវាស់វែងនិងកសាងសំណុំរឿងចាត់វិធានការបន្ត ។ រីឯជនជាម្ចាស់ឈើប្រណីតទាំងនេះ កម្លាំងសមត្ថកិច្ចនឹងបន្តស្រាវជ្រាវរកមុខឱ្យមកទទួលខុសត្រូវ ៕
ចែករំលែកព័តមាននេះ