ខេត្តប៉ៃលិន ៖ ចោរមួយក្រុមមានគ្នាពី៤ទៅ៥នាក់ ប្រដាប់ដោយកាំភ្លើងខ្លីមួយដើម និងពាក់ម៉ាស់បិទមុខជិត បានធ្វើសកម្មភាពចូលភ្ជង់ប្លន់ផ្ទះចម្ការរបស់ប្រជាពលរដ្ឋមួយកន្លែង ខណៈពួកគាត់ពីរនាក់ប្តីប្រពន្ធកំពុងសម្រាន្តលង់លក់នាពេលយប់ ចំណែកកូនៗជាប់រវល់ចេញទៅធ្វើការនៅកាសុីណូអស់ ។
ខេត្តប៉ៃលិន ៖ ចោរមួយក្រុមមានគ្នាពី៤ទៅ៥នាក់ ប្រដាប់ដោយកាំភ្លើងខ្លីមួយដើម និងពាក់ម៉ាស់បិទមុខជិត បានធ្វើសកម្មភាពចូលភ្ជង់ប្លន់ផ្ទះចម្ការរបស់ប្រជាពលរដ្ឋមួយកន្លែង ខណៈពួកគាត់ពីរនាក់ប្តីប្រពន្ធកំពុងសម្រាន្តលង់លក់នាពេលយប់ ចំណែកកូនៗជាប់រវល់ចេញទៅធ្វើការនៅកាសុីណូអស់ ។
ក្នុងសកម្មភាពប្លន់នេះ ក្រុមចោរបានយកប្រាក់ដែលលាក់ទុកនៅក្រោមខ្នើយក្បាលដំណេកអស់ចំនួន១១ម៉ឺនបាត (ប្រាក់ថៃ) ដែលជាប្រាក់គាត់ចងការពីគ្រឹះស្ថានមីក្រូហិរញ្ញវត្ថុហត្ថាកសិករ បម្រុងនឹងយកទៅជួលត្រាក់ទ័រភ្ជួរដី និងរកកម្មករដាំដំឡូងមីក្នុងចម្ការ ។ ហេតុការណ៍នេះ កើតឡើងកាលពីវេលាម៉ោង១០ និង៣០នាទីយប់ ថ្ងៃទី២២ កុម្ភៈ នៅក្នុងភូមិអូររអិល ឃុំស្ទឹងកាច់ ស្រុកសាលាក្រៅ។ ជនរងគ្រោះជាប្តីឈ្មោះ នេត សំអន ហៅចក់ អាយុ៦២ឆ្នាំ ឯប្រពន្ធឈ្មោះ ជា ស៊ូណៃ អាយុ៦១ឆ្នាំ មានស្រុកកំណើតនៅភូមិពង្រ ឃុំឪឡោក ស្រុកអង្គស្នួល ខេត្តកណ្តាល បច្ចុប្បន្នរស់នៅក្នុងភូមិខាងលើ ។ ប្រភពព័ត៌មានពីបុរសជាប្តីឈ្មោះ នេត សំអន ហៅចក់ និយាយថា មុនពេលកើតហេតុ កាលពីថ្ងៃទី២០ កុម្ភៈ គាត់លក់ដំឡូងមីស្ងួតដែលដាក់ហាលនៅក្បែរផ្ទះក្នុងចម្ការបានប្រាក់ជាង១សែនបាត ហើយក៏យកទៅបង់សងថ្លៃការធនាគារ និងអង្គការផ្សេងៗដែលគាត់បានខ្ចីកាលពីឆ្នាំកន្លងទៅរួចរាល់អស់ហើយ ។ លុះនៅរសៀលថ្ងៃទី២១ កុម្ភៈ គាត់បានទៅចងការប្រាក់ពីគ្រឹះស្ថានមីក្រូហិរញ្ញវត្ថុហត្ថាកសិករបន្ថែមទៀត ដើម្បីចំណាយទៅលើការជួលត្រាក់ទ័រ និងកម្មករដាំដំឡូងមីក្នុងចម្ការបន្ត ។
ប្រភពព័ត៌មានដដែលបន្តថា នៅវេលាម៉ោង៨ និង៣០នាទីយប់ ថ្ងៃកើតហេតុ គាត់ និងប្រពន្ធបានសម្រាកនៅក្នុងផ្ទះចម្ការ ដោយកូនៗខ្លះជាប់រវល់ទៅធ្វើការពេលយប់ និងខ្លះទៀតទៅដេកនៅផ្ទះបងប្អូន ។ ស្រាប់តែដល់ពេលយប់ជ្រៅបន្តិច មានជនមិនស្គាល់មុខចំនួន៣នាក់ បានមកទាញជើងគាត់ទាំងពីរនាក់ប្តីប្រពន្ធឱ្យក្រោកឡើង ហើយជនម្នាក់យកកាំភ្លើងខ្លីភ្ជង់ក្បាលពួកគាត់ជាប់ និងសួររកលុយ ។ ពេលនោះ គាត់ឆ្លើយថាគ្មានលុយទេ ព្រោះលុយដែលលក់ដំឡូងមីបាននោះ យកទៅសងអង្គការ និងធនាគារអស់ហើយ ។ ចំណែកជន២នាក់ទៀត បានយកពិលឆ្លុះបញ្ចាំងមើលរើកកាយខោអាវ និងទូក្នុងផ្ទះ ព្រមទាំងបើកកន្ទេលក្បាលដំណេកគាត់ ឃើញថង់ប្រាក់ ក៏ប្រមូលយកទៅទាំងអស់ ហើយនាំគ្នាគេចខ្លួនបាត់ស្រមោលទៅទិសខាងជើង ។ ខណៈពេលដែលជនទាំង៣នាក់សម្លុតគាត់នោះ ក៏ឮសំឡេងជនម្នាក់ទៀតក្អកនៅមុខផ្ទះគាត់ដែរ ។
បន្ទាប់ពីក្រុមចោរទាំងនេះចេញបាត់អស់ គាត់ និងប្រពន្ធភ័យញ័រអស់ខ្លួនប្រាណ ស្ទើរនិយាយអ្វីមិនចេញ ក៏ឱ្យប្រពន្ធទូរស័ព្ទទៅមេភូមិ ដើម្បីប្តឹងសមត្ថកិច្ចឱ្យជួយអន្តរាគមន៍ ។ លុះប្រមាណ២០នាទីក្រោយមក ក៏មាននគរបាលស្នងការដ្ឋានខេត្ត និងនគរបាលប៉ុស្តិ៍ឃុំស្ទឹងកាច់ មកដល់កន្លែងកើតហេតុ ដើម្បីសាកសួរពីភិនភាគចោរ រួចនាំគ្នាស្ទាក់រកមើល ប៉ុន្តែមិនដឹងជាពួកចោរទាំងនោះទៅដល់ណានោះទេ ។ ផ្ទះរបស់ជនរងគ្រោះមិនមានចិញ្ចឹមឆ្កែ ដើម្បីឱ្យព្រុសផ្តល់សញ្ញាឱ្យដឹងជាមុនទេ ហើយផ្ទះរបស់គាត់ក៏ពុំមានរបងព័ទ្ធជុំវិញដែរ ដោយសំអាងថា គាត់រស់នៅជាង១០ឆ្នាំមកហើយ មិនធ្លាប់មានបញ្ហាអ្វីកើតឡើងនោះទេ ។ សូមបញ្ជាក់ថា កាលពីឆ្នាំ២០១១-២០១២កន្លងទៅ នៅក្នុងភូមិអូររអិលនេះ ក៏ធ្លាប់មានករណីប្លន់ប្រដាប់អាវុធផ្ទះប្រជាពលរដ្ឋម្តងរួចមកហើយ ដោយប្លន់យកប្រាក់អស់ជាច្រើន ហើយក្រុមចោរមានគ្នាពី៤ទៅ៥នាក់ដែរ ។ ទាក់ទិននឹងករណីប្លន់នេះ សមត្ថកិច្ចសង្ស័យថា ជាមុខសញ្ញាចាស់ ព្រោះឱ្យតែពេលរដូវប្រមូលផល ខណៈពេលសមត្ថកិច្ច និងប្រជាពលរដ្ឋភ្លេចខ្លួន ក្រុមចោរឆ្លៀតឱកាសធ្វើសកម្មភាពប្លន់តែម្តង ។
ក្រុមចោរដែលបិទមុខ មានន័យថា ខ្លាចម្ចាស់ផ្ទះស្គាល់មុខ ហើយក៏ជាការពិតណាស់ លំនៅឋានដែលស្នាក់នៅនោះ ចោរពីចម្ងាយពិតជាមិនចូលប្លន់នោះទេ ទាល់តែចោរដឹងថាផ្ទះនោះខ្លឹម ទើបចូលប្លន់បាន ។ ដូច្នេះ ក្រុមចោរអាចដឹងថា គាត់បើកប្រាក់ពីធនាគាររាប់ម៉ឺនបាត តើចោរជិត ឬចោរឆ្ងាយ ?
ចែករំលែកព័តមាននេះ