រាជធានីភ្នំពេញ៖ តារាចម្រៀងអូ រស្មី តែងតែបង្ហោះសកម្មភាពច្រៀងនៅលើផេកហ្វេសប៊ុកផ្ទាល់ខ្លួនរបស់នាង ហើយទទួលបានការចាប់អារម្មណ៍ពីបណ្តាអ្នកលេងហ្វេសប៊ុក និងអ្នកគាំទ្ររបស់នាង ហើយគេក៏ចង់ឃើញនាងច្រៀងតាមឆាកតន្ត្រីនានាផងដែរ ។ មហាជនមន្ទិលថានាងអូ រស្មី…
រាជធានីភ្នំពេញ៖ តារាចម្រៀងអូ រស្មី តែងតែបង្ហោះសកម្មភាពច្រៀងនៅលើផេកហ្វេសប៊ុកផ្ទាល់ខ្លួនរបស់នាង ហើយទទួលបានការចាប់អារម្មណ៍ពីបណ្តាអ្នកលេងហ្វេសប៊ុក និងអ្នកគាំទ្ររបស់នាង ហើយគេក៏ចង់ឃើញនាងច្រៀងតាមឆាកតន្ត្រីនានាផងដែរ ។
មហាជនមន្ទិលថានាងអូ រស្មី បានរួចទោសហើយ ឬយ៉ាងណា ក្នុងពេលដែលរូបភាព ថ្មីៗនៃការច្រៀងរបស់នាងតែងតែបង្ហោះជាបន្តបន្ទាប់ ។
តាមពិតនោះគឺតារាចម្រៀងនាងអូ រស្មី បានរួចផុតពីទោសទណ្ឌហើយ ។ ពេលនេះនាងកំពុងតែចាប់អាជីពចម្រៀងជាថ្មីឡើងវិញ តែនៅមិនទាន់បង្ហាញមុខតាមកញ្ចក់ទូរទស្សន៍នៅឡើយទេ ។ នាងច្រៀងតែនៅតាមភោជនីយដ្ឋានក្នុងរាជធានីភ្នំពេញប៉ុណ្ណោះ។
ពាក់ព័ន្ធរឿងនេះតារាចម្រៀង និងអតីតប្រធានសមាគមសិល្បករខ្មែរលោក សុះ ម៉ាច បានប្រាប់កោះសន្តិភាពតាមសារអេឡិចត្រូនិកកាលពីពេល ថ្មីៗកន្លងមកថា នាងអូ រស្មី បានចេញពីពន្ធនាគារប្រមាណជាងមួយឆ្នាំមកហើយ ។ លោកក៏ធ្លាប់ហៅនាងទៅច្រៀងនៅក្នុងភោជនីយដ្ឋានរបស់លោកផងដែរ ។ ទោះជាយ៉ាងណារហូតមកដល់បច្ចុប្បន្ននេះលោកមិនបានដឹងទេថានាងកំពុងប្រកបអាជីពចម្រៀងនៅទីកន្លែងណាឲ្យបានច្បាស់លាស់ទេ ដ្បិតលោកមិនសូវបានទាក់ទងជាមួយនាង ដោយសាររវល់ការងាររៀងខ្លួន ។
តារាចម្រៀងនាងអូ រស្មី ត្រូវនគរបាលការិយាល័យប្រឆាំងការជួញដូរមនុស្សចាប់ឃាត់ខ្លួននៅផ្ទះរបស់នាងក្នុងសង្កាត់ចោមចៅ ខណ្ឌពោធិ៍សែនជ័យ កាលពីថ្ងៃទី១៨ ខែមករា ឆ្នាំ២០១៤ ដោយជាប់ចោទពីបទលួងលោមក្មេងស្រីយកទៅឲ្យរួមភេទជាមួយអ្នកមានប្រាក់ជាថ្នូរនឹងការសន្យាថាជួយឲ្យក្មេងស្រីនោះក្លាយជាតារាល្បី ។ នេះបើតាមការចោទប្រកាន់របស់ម្តាយក្មេងស្រីរងគ្រោះនោះ ។ សមត្ថកិច្ចទម្លាយឲ្យដឹងថា អូ រស្មី ជាមុខសញ្ញាចាស់ដែលប៉ូលិសតាមស៊ើបជាយូរមកហើយ ។
មុនពេលចាប់ខ្លួនអូ រស្មី ជិះរថយន្តឡិចស៊ីស ៤៧០ ថ្មីសន្លាង និងមានផ្ទះល្វែងស្កឹមស្កៃមួយ ស្ថិតក្នុងបុរីពិភពថ្មីក្បែរផ្លូវវ៉េង ស្រេង ។
ទោះជាយ៉ាងណាក្ដីក្នុងអំឡុងពេលជំនុំជម្រះក្ដីនាងអូ រស្មី បានបដិសេធនូវការចោទប្រកាន់ ដោយបញ្ជាក់ថា រឿងនេះកើតឡើងពីម្ដាយក្មេងស្រីដែលខឹងនាងទាក់ទងនឹងខ្សែដៃមាសមួយដែលនាងខ្ចីពីគាត់ ។ នាងបានខ្ចីខ្សែដៃមាសទម្ងន់ប្រហែល១តម្លឹងតម្លៃប្រហែល២០០០ដុល្លារ ដើម្បីពាក់ក្នុងគោលបំណងថតចម្រៀងខារ៉ាអូខេ ។ ការខ្ចីខ្សែដៃមាសនេះសម្រាប់ការផ្លាស់ប្ដូរជាមួយនឹងការបង្រៀនក្មេងស្រីនោះឲ្យក្លាយទៅជាតារាចម្រៀងដែលមានជំនាញវិជ្ជាជីវៈ និងធ្វើការនៅក្នុងផលិតកម្មរបស់នាង ។
តារាចម្រៀងនាងអូ រស្មី ត្រូវតុលាការកាត់ទោសឲ្យជាប់ពន្ធនាគារ៥ឆ្នាំ និងសងជំងឺចិត្ត១០លានរៀលទៅជនរងគ្រោះ ៕ (កែសម្រួលដោយ ៖ បុប្ផា)
ចែករំលែកព័តមាននេះ