រាជធានីភ្នំពេញ ៖ ក្រុមយុវជនដែលជានិស្សិតឆ្នាំទី១និងទី២មកពីសាលាផ្សេងគ្នា ដែលកំពុងសិក្សាទៅលើជំនាញអគ្គិសនីនិងបច្ចេកទេសចង់ឃើញវិស័យកសិកម្មកម្ពុជានៅខាងមុខនេះឈានទៅការប្រើប្រាស់បច្ចេកវិទ្យា ជំនួសឱ្យការធ្វើកសិកម្មដោយកម្លាំងពលកម្មទាំងទៅលើការស្រោបស្រពទឹកនិងការប្រមូលផល។
ផ្នែកទៅលើគំនិតចង់ធ្វើឱ្យប្រជាកសិករធ្វើកសិកម្មកាន់តែមានភាពងាយស្រួល ក្រុមយុវជនមានគ្នាប្រមាណ៧នាក់បានបង្កើតឡើងនូវឧបករណ៍សម្រាប់ស្រោចស្របទឹកលើដំណាំដោយបំពាក់នូវបច្ចេកវិទ្យាដោយបញ្ជាតាមទូរស័ព្ទដៃ។ លោក ញ៉ សុភា អ្នកគ្រប់គ្រងផ្នែកបច្ចេកទេសនៃ Smart Farm Assistance បានឱ្យដឹងកាលពីថ្មីៗនេះបានឱ្យដឹងថា មូលហេតុដែលធ្វើឱ្យក្រុមយើងបង្កើតឡើងនូវឧបករណ៍បញ្ជាបិទ-បើកទឹក ក្នុងវិស័យកសិកម្មនេះឡើងដោយសារមើលឃើញប្រជាកសិករនៅក្នុងតំបន់(ខេត្តបាត់ដំបង) គាត់ទៅស្រោចទឹក ឬទៅមើលដំណាំរបស់ពួកគាត់ចំណាយពេលវេលាទាំងស្រុងទៅលើការមើលថែចំការ។
ពួកគាត់គ្មានពេលវេលាទៅធ្វើអ្វីផ្សេងសម្រាប់ពង្រីកមុខរបរបន្ថែម ក្រៅពីការធ្វើកសិកម្ម។ ពីមួយខែទៅមួយខែ ពីមួយឆ្នាំទៅមួយឆ្នាំដំណើរការរបស់ពួកគាត់នៅតែដំណើរដដែល ហើយលទ្ធផលដែលទទួលបាននៅតែដដែលឬអាចនឹងមានការធ្លាក់ចុះ។ ផ្អែកលើទស្សនៈចង់ឃើញវិស័យកសិកម្មប្រជាកសិករឈានដល់ការប្រើប្រាស់បច្ចេកវិទ្យាបង្កើនផលិតភាព កាត់បន្ថយការចំណាយខ្ពស់លើកម្លាំងពលកម្ម លោក ញ៉ សុភា បញ្ជាក់ថា ឧបករណ៍ Smart Farm Assistance នេះអាចធ្វើការបញ្ជាបិទ ឬបើកប្រព័ន្ធទឹកពីចម្ងាយបាន ។ ឧបករណ៍ Smart Controller យើងអាចភ្ជាប់វាជាមួយម៉ូទ័របូមទឹកដោយផ្ទាល់ ដោយក្នុងឧបករណ៍នេះមានបំពាក់នូវស៊ីមកាតចង់បញ្ជាវាតាមរយៈផ្ញើរសារទៅកាន់ឧបករណ៍។
លោកបានបន្តថា «អ្វីដែលក្រុមយើងចង់ឃើញបំផុតនោះគឺនៅក្នុងប្រទេសកម្ពុជាឈានទៅរកកសិកម្មបែបទំនើប កសិករអាចប្រើប្រាស់បច្ចេកវិទ្យាទំនើបផ្សេងៗក្នុងការប្រមូលផល។ បើសិនកសិករជ្រើសរើសបច្ចេកវិទ្យាប្រើក្នុងវិស័យកសិកម្ម គាត់អាចត្រូវចំណាយច្រើនតែនៅគ្រាដំបូង តែនៅគ្រាបន្ទាប់កសិកម្មនឹងទទួលបានផលចំណេញច្រើនត្រលប់មកវិញ។ បើកសិករបន្តធ្វើកសិកម្មតាមបែបប្រពៃណីពីមុនៗវាអាចនឹងធ្វើឱ្យទិន្នផលធ្លាក់ចុះ រីឯការចំណាយនៅតែខ្ពស់។ ប៉ុន្តែបើ កសិករប្រើម៉ាស៊ីន ឬឧបករណ៍ទំនើបផ្សេងៗគាត់ចំណាយតែម្តង ហើយគ្រាបន្ទាប់គាត់ទទួលបានទិន្នផល ហើយមិនសូវចំណាយលើពលកម្មច្រើននោះទេ»។
យោងតាមរបាយការណ៍របស់ក្រសួងកសិកម្ម រុក្ខាប្រមាញ់និងនេសាទបង្ហាញថា គិតត្រឹមឆមាសទី១ឆ្នាំ២០១៩នេះល្បឿននៃការបង្កបង្កើនផលដំណាំស្រូវវស្សាមាន ផ្ទៃដីភ្ជួររាស់សម្រេចបានជាង១,៥៤លានហិកតា ៕ កែសម្រួលដោយ ៖សុឃាក់
ចែករំលែកព័តមាននេះ