រាជធានីភ្នំពេញ ៖ គិតត្រឹមតែរយៈពេល៥ខែដើមឆ្នាំ២០១៩ ការពាណិជ្ជកម្មទ្វេភាគីរវាងកម្ពុជានិងជប៉ុនមានទំហំពាណិជ្ជកម្មសរុបជាង ២ពាន់លានដុល្លារអាមេរិក ដែលមានសន្ទុះកើនឡើងខ្លាំង បើប្រៀបធៀបការធ្វើពាណិជ្ជកម្មពេញមួយឆ្នាំកាលពីឆ្នាំ២០១៨។ ការកើនឡើងនេះត្រូវបានគេកត់សម្គាល់ឃើញថាការវិនិយោគពីជប៉ុននៅកម្ពុជាហាក់កំពុងប្រដេញប្រសងនិងប្រទេសចិនផងដែរ ។
ថ្លែងជំរាបជូនសម្តេចតេជោហ៊ុន សែន នាយករដ្ឋមន្ត្រីកម្ពុជា ក្នុងជំនួបពិភាក្សាការងារកាលពីថ្ងៃទី ១៣ ខែសីហា លោក Hidehisa Hironouchi ឯកអគ្គរាជទូតជប៉ុន ដែលត្រូវចប់បេសកកម្មការទូតនៅព្រះរាជាណាចក្រកម្ពុជា បានសម្តែងនូវសេចក្ដីសោមនស្សរីករាយយ៉ាងខ្លាំង បន្ទាប់ពីសង្កេតឃើញនៅក្នុងរយៈពេល៣ឆ្នាំ ក្នុងការបំពេញបេសកកម្មការទូត នៅកម្ពុជា សេដ្ឋកិច្ចកម្ពុជា បានរីកចម្រើន និងអភិវឌ្ឍយ៉ាងឆាប់រហ័សជាទីបំផុតក្នុងនោះមានកំណើនយ៉ាងខ្លាំងលើវិស័យវិនិយោគ ពាណិជ្ជកម្ម និងទេសចរណ៍។ ក្នុងន័យនេះលោកបានសូមគោរពសំដែងនូវការគោរពនិងកោតសរសើរដល់វីរភាពនៃការដឹកនាំរបស់សម្ដេចតេជោ។
ក្នុងឱកាសនោះសម្ដេចតេជោ ហ៊ុនសែន បានមានប្រសាសន៍ថា ជាការពិតការវិនិយោគពាណិជ្ជកម្ម ក៏ដូចជាទេសចរណ៍ បានកើនឡើងយ៉ាងខ្លាំង នោះសោតគឺទទួលបានអំពីការប្រឹងប្រែងរបស់ឯកអគ្គរាជទូតជប៉ុននៅព្រះរាជាណាចក្រកម្ពុជា ចូលរួមចំណែកយ៉ាងធំ នៅក្នុងបញ្ហានេះ។ សម្តេចតេជោ ហ៊ុនសែនគូសបញ្ជាក់ថា «ជាក់ស្ដែងជាលទ្ធផលនៃការវិនិយោគនិងពាណិជ្ជកម្មរវាងប្រទេសទាំងពីរកាលពីឆ្នាំ ២០១៨ ជប៉ុននាំចូលមកកម្ពុជា មានទំហំទឹកប្រាក់ប៉ុន្មាន ៤៤០លានដុល្លារតែប៉ុណ្ណោះ។ ប៉ុន្តែនៅឆ្នាំ២០១៩នេះ ក្នុងរយៈពេលត្រឹមតែ៥ខែប៉ុណ្ណោះ ជប៉ុនបាននាំចូលមកកម្ពុជាយើងចំនួន ៤៤០លានដុល្លារស្រេចទៅហើយ។
ដោយឡែកនៅឆ្នាំ ២០១៨ កម្ពុជាបាននាំចេញទៅប្រទេសជប៉ុនមានទំហំទឹកប្រាក់ប្រមាណ ១.៦០០លានដុល្លាអាមេរិក។ ក្នុងឆ្នាំ ២០១៩នេះវិញ រយៈពេលត្រឹមតែ ៥ខែប៉ុណ្ណោះ ទំហំពាណិជ្ជកម្មកម្ពុជានាំចេញទៅជប៉ុនបានកើនឡើងដល់ ១.៧០០លានដុល្លារសហរដ្ឋអាមេរិក នេះគឺជាជោគជ័យដ៏ធំនៅក្នុងបេសកកម្មការទូតរបស់ ឯកអគ្គរាជទូតក្នុងការពង្រឹងទំនាក់ទំនង ហើយជំរុញពាណិជ្ជកម្ម វិនិយោគ និងទេសចរណ៍ ដែលជាមូលដ្ឋានគ្រឹះ នៃទំនាក់ទំនងរវាងប្រទេសទាំងពីរកម្ពុជា និងជប៉ុន»។ លោក ស៊ាង ថៃ មន្ត្រីអ្នកនាំពាក្យក្រសួងពាណិជ្ជកម្ម មានប្រសាសន៍ថានៅប៉ុន្មានឆ្នាំចុងក្រោយនេះថ្នាក់ដឹកនាំកម្ពុជាបានទៅចូលរួមកម្មវិធីនៅប្រទេសជប៉ុនជាបន្តបន្ទាប់ដើម្បីពង្រឹងទំនាក់ទំនងពាណិជ្ជកម្ម និងទាក់ទាញវិនិយោគិនជប៉ុនឱ្យមកបណ្តាក់ទុននៅកម្ពុជា។ជាក់ស្តែងមកដល់ឆ្នាំ២០១៩ វិនិយោគិនជប៉ុនតាមការសង្កេតបានចូលមកបណ្តាក់ទុននៅ
កម្ពុជាមានចំនួនច្រើនគួរឱ្យកត់សម្គាល់បើប្រៀបធៀបទៅនិងឆ្នាំមុនៗ។ ផ្នែកលើកំណើន
វិនិយោគិនចូលមកបណ្តាក់ទុននៅកម្ពុជាជាបន្តបន្ទាប់នេះ រំពឹងថាការធ្វើពាណិជ្ជកម្មទ្វេភាគីរវាងប្រទេសទាំងពីរកម្ពុជានិងជប៉ុននឹងបន្តកើនឡើងបន្ថែមទៀត។
លោក ជា សុផារ៉ា ឧបនាយករដ្ឋមន្ត្រីនិងជារដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ធ្លាប់មានប្រសាសន៍ថា គិតមកដល់ត្រឹមឆ្នាំ២០១៩ វិនិយោគិនជប៉ុនបានបណ្តាក់ទុនវិនិយោគលើវិស័យសំណង់មានទឹកប្រាក់ប្រមាណ៣៨២លានដុល្លារអាមេរិក ក្លាយជាប្រទេសឈរនៅលំដាប់លេខ៣ បន្ទាប់ពីចិន និងកូរ៉េ នៅកម្ពុជា ៕ កែសម្រួលដោយ ៖ សុឃាក់
ចែករំលែកព័តមាននេះ