ខេត្តរតនគិរី ៖ សេចក្តីរាយការណ៍បឋមបានឲ្យដឹងថា មនុស្ស៣នាក់ រងរបួសធ្ងន់ និងស្រាលដោយសារជិះ និងបើកបរគោយន្តកន្ត្រៃតាឡេថងត្រឡប់មកពីស្រែវិញ ដល់ចំនុចឡើងភ្នំមិនប្រយ័ត្នអស់ប្រេងម៉ាស៊ុតក៏រអិលថយក្រោយក្រឡាប់ដោយខ្លួនឯងតែម្តង ។ ហេតុការណ៍គ្រោះថ្នាក់គោយន្តនេះបានកើតឡើងនៅវេលាម៉ោង១៤និង៣០នាទី ថ្ងៃទី១២ ខែសីហានេះ ត្រង់ចំនុចផ្លូវចូលទៅឃុំសេសាន ផ្លូវឡើងភ្នំ ក្រោយវត្ដប៉ក់ធំ ឃុំប៉កញ៉ៃ ស្រុកអូរយ៉ាដាវ ខេត្ដរតនគីរី ។
សេចក្តីរាយការណ៍បានបន្តថា តាមប្រភពបានឱ្យដឹងថា អ្នកបើកបរគោយន្តតាឡេថងនោះឈ្មោះ ប៉ូយ ទូ ភេទប្រុស អាយុ២៥ឆ្នាំ ជនជាតិចារាយ រងរបួសស្រាល និងអ្នករួមដំណើរពីរនាក់ទៀត ។ ទី១- ឈ្មោះ រចំ និក ភេទប្រុស អាយុ៥២ឆ្នាំ ជនជាតិចារាយ រងរបួសធ្ងន់ត្រង់ចង្កេះ និងក្បាល ។ ទី២-ឈ្មោះ ពូយ ជាតិ ភេទប្រុស អាយុ៦ឆ្នាំ ជនជាតិចារាយ រងរបួសធ្ងន់ជើងខាងឆ្វេងដាច់ស្បែកសរសៃកែង ដែលទាំង៣នាក់មានទីលំនៅភូមិប៉កធំ ឃុំប៉កញ៉ៃ ស្រុកអូរយ៉ាដាវ ខេត្ដរតនគីរី ។
ក្រោយកើតហេតុ អ្នករងរបួសខាងលើត្រូវបងប្អូនជូនទៅព្យាបាលគ្រូបុរាណខ្មែរ នៅភូមិសោមកានិញ ឃុំសោមធំ ស្រុកអូរយាដាវ ៕ កែសម្រួលដោយ ៖ សុឃាក់
ចែករំលែកព័តមាននេះ