វត្តលិចលង់មិនធ្លាប់មាន…បានស្រកវិញអស់ហើយ
- រតនគិរី
ខេត្តរតនគិរី ៖ វត្តខ្លះនៅក្នុងឃុំសិរីមង្គលលិចលង់មិនធ្លាប់មាន ប៉ុុន្តែក៏បានស្រកអស់ហើយ ។ លោកទេសរដ្ឋមន្ត្រី គន់ គីម បានប្រាប់ឱ្យដឹងថា ជំនន់ទឹកភ្លៀងដែលបានជន់លិច…
ខេត្តរតនគិរី ៖ វត្តខ្លះនៅក្នុងឃុំសិរីមង្គលលិចលង់មិនធ្លាប់មាន ប៉ុុន្តែក៏បានស្រកអស់ហើយ ។ លោកទេសរដ្ឋមន្ត្រី គន់ គីម បានប្រាប់ឱ្យដឹងថា ជំនន់ទឹកភ្លៀងដែលបានជន់លិច នៅស្រុកកូនមុំ និងស្រុកលំផាត់ បានស្រកទៅវិញហើយ ។ ចំណែកប្រជាពលរដ្ឋក៏បានត្រឡប់ទៅផ្ទះសម្បែងរបស់ខ្លួនវិញខ្លះៗហើយ នៅព្រឹកថ្ងៃទី១១ សីហា ។
ទោះបីជាបែបណាសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា គឺនៅតែយកចិត្តទុកដាក់ជាបន្តបន្ទាប់ទៀតនៅតែតាមដានស្ថានភាពទឹកជំនន់ នៅខេត្តរតនគិរីនេះដដែល ។ ប្រជាពលរដ្ឋ ប្រមាណ៧០០គ្រួសារដែលរស់នៅឃុំសិរីមង្គល ស្រុកកូនមុំបានត្រឡប់ចូលគេហដ្ឋានរៀងខ្លួនវិញហើយដែរ ។ នេះបើតាមការឱ្យដឹងពីអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ។
លោកទេសរដ្ឋមន្ត្រីមានប្រសាសន៍ថា បើទោះបីទឹកស្រកក៏ពិតមែន តែសម្ដេចតេជោ និងសម្ដេចកិត្តិព្រឹទ្ធបណ្ឌិតបានបន្តតាមដានខ្ពស់បំផុតនូវសុខទុក្ខរបស់ប្រជាពលរដ្ឋយើង ដោយបានបញ្ជាឱ្យចុះអន្តរាគមន៍ ជួយប្រជាពលរដ្ឋនៅកន្លែងប្រឈម ដោយទឹកជំនន់ គឺឃុំសេរីមង្គលស្រុកកូនមុំ ដែលទឹកបានជន់លិចវត្តដែលពេលនេះបានស្រក ជាង២ម៉ែត្រកន្លះហើយ ។ វត្តក្នុងឃុំសិរីមង្គលលិចទាំងស្រុងកម្ពស់ទឹកជាងមួយម៉ែត្រ សូម្បីភូមិនៅជុំវិញវត្តក៏លិចដែរ ប៉ុន្តែបានស្រកអស់វិញហើយ ។ ប្រជាពលរដ្ឋប្រមាណជាង៧០០គ្រួសារក៏បានវិលត្រឡប់ចូលផ្ទះសម្បែងវិញដែរ ដើម្បីបោសសម្អាត ធ្វើអនាម័យផ្ទះសម្បែងការពារជំងឺផ្សេងៗ ទោះបីកន្លែងខ្លះនៅទឹកដក់តិចតួចក្តី ។
លោកទេសរដ្ឋមន្ត្រីបន្តថា នៅពេលប្រជាពលរដ្ឋបានវិលត្រឡប់ចូលផ្ទះវិញបែបនេះ កម្លាំងអាជ្ញាធរនិងកម្លាំងសមត្ថកិច្ចនៅតែបន្តផ្គត់ផ្គង់ទឹកស្អាត ជូនពួកគាត់ប្រើប្រាស់តាមតម្រូវការចាំបាច់ដដែល និងបានណែនាំប្រជាពលរដ្ឋទាំងអស់ឱ្យបង្កើនការប្រុងប្រយ័ត្នខ្ពស់ ពិសេសបញ្ហាអនាម័យផ្ទះសម្បែងដើម្បីកុំឱ្យប្រឈមនឹងជំងឺដង្កាត់ផ្សេងៗ ដែលអាចកើតមានជាយថាហេតុ ។ បញ្ហាទឹកស្អាតសម្ដេចតេជោ និងសម្ដេចកិត្តិព្រឹទ្ធបណ្ឌិតបានឧបត្ថម្ភធុងដាក់ទឹកចំនួន១.០០០តាមរយៈលោក ចែកជូនប្រជាពលរដ្ឋប្រើប្រាស់តាមតម្រូវការជាក់ស្តែង ។
ចំពោះទឹកស្អាតវិញខាងស្នងការនគរបាលខេត្ត បានដឹកជញ្ជូនបន្តបន្ទាប់ ចែកជូនប្រជាពលរដ្ឋ ដែលកំពុងជួបការលំបាកដោយគ្រោះទឹកជំនន់នេះ ។ នៅព្រឹកថ្ងៃទី១២ សីហា លោកទេសរដ្ឋមន្ត្រី គន់ គីម បាននាំយកអំណោយចែកជូនជាបន្តបន្ទាប់ដល់ប្រជាពលរដ្ឋរួមមានអង្ករនិងឃីតជា ដើមដើម្បីដោះស្រាយបញ្ហាខ្វះខាតរបស់ប្រជាពលរដ្ឋដែលរងគ្រោះដោយសារទឹកជំនន់នាឆ្នាំនេះ ៕ (សម្រួលដោយ៖ ស្រីណា)
ចែករំលែកព័តមាននេះ