ខេត្តព្រះវិហារ ៖ កសិករនៅខេត្តព្រះវិហារបាននិយាយថា ឆ្នាំនេះពួកគាត់អាចមានសង្ឃឹមច្រើនពីការទទួលផលស្រូវដោយសារតែពេលនេះអំណោយផលទឹកភ្លៀងមានគ្រប់គ្រាន់សម្រាប់ពួកគាត់ដកស្ទូងគ្រប់ទីកន្លែងដោយមិនព្រួយបារម្ភនឹងការខ្វះខាតទឹកដកស្ទូងដូចកាលពីឆ្នាំមុនឡើយ ។
លោក សោម ជឹម ជាកសិកររស់នៅភូមិរំដោះ ឃុំរក្សា ស្រុករវៀង ខេត្តព្រះវិហារ បានឲ្យដឹថា កាលពីឆ្នាំមុនគាត់បង្កបង្កើនផលស្រូវ ពុំសូវទទួលបានផលច្រើននោះទេ ដោយសារតែនៅពេលស្រូវកំពុងលូតលាស់ ល្អបែរជា ជួនរាំង ជួនភ្លៀង ធ្វើឲ្យបរិមាណផលមានការថយចុះ ។
កសិករបន្តថា តែឆ្នាំនេះ បើទោះបីជាការដកស្ទូងរបស់ពួកគាត់មានភាពយឺតយ៉ាងបន្តិចបន្តួចក្តីតែចាប់តាំងពីដើមខែសីហាមកអំណោយផលទឹកភ្លៀងបានធ្លាក់មក ជាបន្តបន្ទាប់នៅតាមស្រែរបស់ គាត់ក៏ដូចជាកសិករដទៃទៀតដែរ ដែលអាចឲ្យពួកគាត់មានទឹកគ្រប់គ្រាន់សម្រាប់ដកស្ទូងដោយមិនព្រួយបារម្ភ ពីបញ្ហាខ្វះខាតទឹកឡើយ ។ កសិករបានរំពឹងទុកថា ឆ្នាំនេះភោគផលស្រូវរបស់គាត់នឹងអាចមានការកើនឡើងជាងឆ្នាំមុន ព្រោះថានៅតាមស្រែរបស់គាត់មានទឹកគ្រប់គ្រាន់សម្រាប់ឲ្យដំណាំនេះលូតលាស់បានល្អ ។
លោក ពឹង ទ្រីដា ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រះវិហារបានលើកឡើងថា គិតមកត្រឹម សប្តាហ៍ទី២ ខែសីហា នេះ នៅទូទាំងខេត្តព្រះវិហារ ការដកស្ទូងរបស់កសិករ សម្រេចបានប្រមាណ ជា៨០%ហើយ ដោយឡែកការដកស្ទូងដែលនៅសេសសល់ កសិករកំពុងតែមមាញឹក ធ្វើយ៉ាងណាឲ្យរួចរាល់ ១០០% នៅសប្តាហ៍ទី៣ខាងមុខនេះ ។
លោកថា បើទោះបីជានៅតាមបណ្តាខេត្តមួយចំនួន ខ្លះជួបបញ្ហារាំងស្ងួត ខ្លះទៀតជួបបញ្ហាជំនន់ទឹកភ្លៀងលិចស្រែ ក៏ដោយសម្រាប់ខេត្តព្រះវិហារវិញ ពុំមានបញ្ហាទាំងនេះ ធ្វើឲ្យមានការព្រួយបារម្ភដល់កសិករកំពុងដាំដុះស្រូវនោះទេ គិតត្រឹមសប្តាហ៍ទី២នេះ កម្រិតទឹកភ្លៀង បានធ្លាក់មក កម្រិត ៨៥០មីល្លីម៉ែត្រហើយ ។
យោងតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ ក្នុងឆ្នាំ២០១៩នេះ បង្ហាញថា ផ្ទៃដីដាំដុះស្រូវវស្សានៅទូទាំងខេត្តព្រះវិហារមានប្រមាណជិត៩ម៉ឺនហិកតាបើធៀបទៅនឹងរយៈពេលដូចគ្នា ឆ្នាំ២០១៨ មានការកើនឡើងបន្តិចបន្តួចប៉ុណ្ណោះ ៕
ចុចអាន ៖ ថាខេត្តព្រះសីហនុទៅគ្រោះធំដោយសារជំនន់ ងាកទៅខេត្តសៀមរាបវិញរងគ្រោះរាំងស្ងួតទៀត
កែសម្រួលដោយ ៖ សំណាង
ចែករំលែកព័តមាននេះ