សេដ្ឋវិទូ ៖ ការភ័យខ្លាចចំពោះសង្គ្រាមពាណិជ្ជកម្មប្រទេសទាំង២ នាំឱ្យមានវិបត្តិសេដ្ឋកិច្ច
សហរដ្ឋអាមេរិក ៖ ក្រុមហ៊ុន Goldman Sachs Group Inc (GS.N) បាននិយាយកាលពីថ្ងៃអាទិត្យថា ការភ័យខ្លាចចំពោះសង្គ្រាមពាណិជ្ជកម្មសហរដ្ឋអាមេរិក…
សហរដ្ឋអាមេរិក ៖ ក្រុមហ៊ុន Goldman Sachs Group Inc (GS.N) បាននិយាយកាលពីថ្ងៃអាទិត្យថា ការភ័យខ្លាចចំពោះសង្គ្រាមពាណិជ្ជកម្មសហរដ្ឋអាមេរិក…
សហរដ្ឋអាមេរិក ៖ ក្រុមហ៊ុន Goldman Sachs Group Inc (GS.N) បាននិយាយកាលពីថ្ងៃអាទិត្យថា ការភ័យខ្លាចចំពោះសង្គ្រាមពាណិជ្ជកម្មសហរដ្ឋអាមេរិក – ចិនដែលនាំឱ្យមានវិបត្តិសេដ្ឋកិច្ចកំពុងកើនឡើងខ្ពស់ ហើយសេដ្ឋវិទូរបស់ Goldman មិនរំពឹងទៀតទេថាកិច្ចព្រមព្រៀងពាណិជ្ជកម្មរវាងប្រទេសដែលមានសេដ្ឋកិច្ចធំជាងគេទាំងពីរនឹងសម្រេចបានមុនការបោះឆ្នោតប្រធានាធិបតីអាមេរិកឆ្នាំ ២០២០ ។ នេះបើយោងតាមការចុះផ្សាយរបស់ភ្នាក់ងារ Reuters ចុះថ្ងៃទី ១២ ខែសីហា ម្សិលមិញនេះ ។
«យើងរំពឹងថា ពន្ធគយដែលកំណត់គោលដៅលើការនាំចូលរបស់សហរដ្ឋអាមេរិកពីប្រទេសចិនចំនួន ៣០០ ប៊ីលានដុល្លារនឹងចូលជាធរមានពិតប្រាកដ»។ នេះបើយោងតាមលិខិតរបស់ក្រុមហ៊ុន Goldman Sachs Group Inc (GS.N) ដែលបានផ្ញើជូនអតិថិជនរបស់ខ្លួន។ សូមបញ្ជាក់ថា Goldman Sachs Group Inc គឺជាធនាការវិនិយោគនិងសេវាកម្មពហុជាតិរបស់អាមេរិកដែលមានទីស្នាក់ការនៅទីក្រុងញូវយ៉ក និងជាក្រុមហ៊ុនផ្តល់ជូននូវសេវាកម្មក្នុងការគ្រប់គ្រងការវិនិយោគមូលប័ត្រ ការគ្រប់គ្រងទ្រព្យសម្បត្តិក្រុមហ៊ុនអន្តរការី និងមូលប័ត្រធានាទិញមូលប័ត្រ។
ប្រធានាធិបតីសហរដ្ឋអាមេរិកលោក ដូណាល់ ត្រាំ បានប្រកាសនៅថ្ងៃទី ១ ខែសីហាថាលោកនឹងដាក់ពន្ធ ១០ ភាគរយលើការនាំចូលចុងក្រោយរបស់ចិនដែលមានតម្លៃ ៣០០ ប៊ីលានដុល្លារអាមេរិក ដោយការអនុវត្តពន្ធថ្មីបន្ថែមនេះនឹងអនុវត្តចាប់ពីថ្ងៃទី ១ ខែកញ្ញា តទៅ ដែលបានបណ្តាលឲ្យប្រទេសចិនបានសម្រេចបញ្ឈប់ការទិញផលិតផលកសិកម្មរបស់សហរដ្ឋអាមេរិកផងដែរ ។
សហរដ្ឋអាមេរិកក៏បានប្រកាសថាចិនជាអ្នករៀបចំនូវសហត្ថាករណ៍រូបិយវត្ថុ (ការក្រឡុករូបិយប័ណ្ណ/រូបិយវត្ថុ) បន្ទាប់ពីចិនបានសម្រេចធ្វើឲ្យលុយយន់ចិនចុះថោកជាងមុន តែប្រទេសចិនបានបដិសេធថាខ្លួនមិនបានកេងប្រាក់យ័នដើម្បីទទួលបានជ័យជម្នះនៃការប្រកួតប្រជែងនេះទេ។ ជម្លោះពាណិជ្ជកម្មដែលមានរយៈពេលជាងមួយឆ្នាំនេះបានបង្កើតជាបញ្ហា ដូចជាពន្ធគយការឧបត្ថម្ភធនបច្ចេកវិទ្យា កម្មសិទ្ធិបញ្ញានិងសន្តិសុខអ៊ិនធឺណិតក្នុងចំណោមបញ្ហាផ្សេងទៀត។
យ៉ាងណាមិញ ក្រុមហ៊ុន Goldman Sachs បាននិយាយថាខ្លួនបានទម្លាក់ការព្យាករណ៍កំណើនសេដ្ឋកិច្ចសហរដ្ឋអាមេរិកនៅត្រីមាសទីបួនរបស់ខ្លួនត្រឹម ២០ ពិន្ទុ ស្មើនឹង ១,៨ ភាគរយលើផលប៉ះពាល់ធំជាងការរំពឹងទុកពីការវិវត្តនៃភាពតានតឹងពាណិជ្ជកម្ម។
ក្រុមហ៊ុនមួយនេះបាននិយាយនៅក្នុងកំណត់ចំណាំដែលសរសេរដោយអ្នកសេដ្ឋកិច្ចបីរូបរបស់ខ្លួនគឺលោក Jan Hatzius, Alec Phillips និង David Mericle ថា «សរុបមកយើងបានបង្កើនការប៉ាន់ស្មានរបស់យើងអំពីផលប៉ះពាល់នៃសង្គ្រាមពាណិជ្ជកម្ម”»។ កំណត់ចំណាំបានលើកឡើងថាការកើនឡើងថ្លៃដើមពីការរំខានដល់ចង្វាក់ផ្គត់ផ្គង់អាចនាំឱ្យក្រុមហ៊ុនអាមេរិកកាត់បន្ថយសកម្មភាពក្នុងស្រុករបស់ពួកគេ។ ក្រុមសេដ្ឋវិទូបានបន្ថែមថា «ភាពមិនប្រាកដប្រជានៃគោលនយោបាយ» នេះក៏អាចធ្វើឱ្យក្រុមហ៊ុនកាត់បន្ថយការចំណាយរបស់ខ្លួនផងដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ