ទីក្រុងរីយ៉ាត៖ ក្រុមហ៊ូទីដែលជាសម្ព័ន្ធមិត្តរបស់អ៊ីរ៉ង់បានបើកការវាយប្រហារជាថ្មីម្ដងទៀតទៅលើមូលដ្ឋាននានានៅប្រទេសអារ៉ាប៊ីសាអូឌីត ហើយទន្ទឹមនឹងនោះ ពួកគេបន្តវាយលុកចូលកាន់តែជ្រៅទៅក្នុងតំបន់មាត់សមុទ្រខាងលិចប្រទេសយេម៉េនស្ថិតនៅតាមបណ្ដោយសមុទ្រក្រហម។ នេះបើយោងតាមការបង្ហើបឱ្យដឹងពីមន្ត្រីរដ្ឋាភិបាលយេម៉េន។ ឥឡូវនេះ អារ៉ាប៊ីសាអូឌីតកំពុងតែដុតដៃដុតជើងដើម្បីធ្វើយ៉ាងណាឆ្លើយតបទៅនឹងការវាយលុកយ៉ាងឆាប់រហ័សនេះ។
បណ្ដារដ្ឋទាំងឡាយនៅឈូងសមុទ្រពែក្សផ្អាករាល់ការចរចាទាំងអស់ជាមួយអ៊ីរ៉ង់ ដែលជាហេតុធ្វើឱ្យគេព្រួយបារម្ភកាន់តែខ្លាំងថាជម្លោះនៅមជ្ឈិមបូព៌ាអាចនឹងផ្ទុះឡើងកាន់តែខ្លាំងឡើងៗ ហើយអាចនឹងគំរាមកំហែងកាន់តែខ្លាំងចំពោះការផ្គត់ផ្គង់ប្រេងទៅកាន់ទីផ្សារពិភពលោក។ ក្រុមហ៊ូទីបានបាញ់មីស៊ីលរាប់សិបគ្រាប់ និងបញ្ជូនដ្រូនរាប់សិបគ្រឿងវាយប្រហារបន្ទាយទាហាននៅខាមីស មូសាអ៊ីត (Khamis Mushait) នៃប្រទេសអារ៉ាប៊ីសាអូឌីតភាគខាងត្បូង។ គោលដៅសំខាន់របស់ពួកគេគឺវាយប្រហារឃ្លាំងដាក់យន្តហោះ ប្រព័ន្ធរ៉ាដា ផ្លូវយន្តហោះចុះចត និងឃ្លាំងរំសេវដើម្បីឆ្លើយតបទៅអារ៉ាប៊ីសាអូឌីតដែលវាយប្រហារប្រទេសយេម៉េន។
សង្គ្រាមផ្ទុះឡើងជាថ្មីនៅយេម៉េនគឺជាវិញ្ញាសាដ៏ធំមួយសម្រាប់លោកដូណាល់ត្រាំ។ អារ៉ាប៊ីសាអូឌីតចង់ឱ្យអាមេរិកប្រឡូកនៅក្នុងសង្គ្រាមនេះដោយផ្ទាល់ជាជាងបានត្រឹមតែផ្ដល់ការគាំទ្រផ្នែកស៊ើបការណ៍សម្ងាត់តែមួយមុខ។ ប៉ុន្តែលោកដូណាល់ត្រាំមិនទាន់យល់ព្រមតាមសំណើនេះទេ។ នេះបើយោងតាមប្រភពបីនាក់ដែលដឹងកិច្ចការផ្ទៃក្នុងរបស់អាមេរិក។ កាលពីចុងសប្ដាហ៍កន្លងទៅនេះ លោកត្រាំមានប្រសាសន៍ថាលោកបានសន្ទនាជាមួយរាជទាយាទអារ៉ាប៊ីសាអូឌីត ព្រះអង្គម្ចាស់ប៊ីនសាលម៉ាន់។ លោកថាក្រុមហ៊ូទីក៏បានទាក់ទងទៅទីក្រុងវ៉ាស៊ីនតោនផងដែរ (តាមរយៈភាគីទីបី) ដើម្បីជំរុញឱ្យអាមេរិកកុំចូលពាក់ព័ន្ធនៅក្នុងជម្លោះនេះ។ សារព័ត៌មានរបស់រដ្ឋអារ៉ាប៊ីសាអូឌីតផ្សាយថារាជទាយាទប៊ីនសាលម៉ាន់ទើបតែជួបមេបញ្ជាការកងទ័ពអាមេរិកប្រចាំតំបន់មជ្ឈិមបូព៌ា ឧត្ដមនាវីប្រេតឃូបផឺ (Brad Cooper)។
សូមជម្រាបថាអារ៉ាប៊ីសាអូឌីត និងអ៊ីរ៉ង់គឺជាសត្រូវលាក់មុខនឹងគ្នាជាយូរមកហើយ។ នៅក្នុងបញ្ហាប្រទេសយេម៉េន អារ៉ាប៊ីសាអូឌីតគាំទ្ររដ្ឋាភិបាលយេម៉េនដែលទទួលស្គាល់ដោយអង្គការសហប្រជាជាតិ ប៉ុន្តែជារដ្ឋាភិបាលដែលមានកម្លាំងទ័ពទន់ខ្សោយដូចប្រទេសលីបង់ដែរ។ ចំណែកអ៊ីរ៉ង់គាំទ្រក្រុមហ៊ូទីដែលជាចលនាឧទ្ទាមប្រឆាំងរដ្ឋាភិបាលយេម៉េន។ ថ្វីដ្បិតរូបភាពជាឧទ្ទាម ប៉ុន្តែពួកគេមានកម្លាំងទ័ពខ្លាំង និងវាយកាន់កាប់បានទឹកដីយេម៉េនមួយផ្នែកធំ។ មែនទែនទៅ កងទ័ពអារ៉ាប៊ីសាអូឌីតខ្លួនឯងក៏មិនខ្លាំងប៉ុន្មានដែរ។ ប៉ុន្តែពួកគេត្រូវតែឈឺឆ្អាលនៅក្នុងរឿងនេះ។ អារ៉ាប៊ីសាអូឌីតមិនចង់ឃើញរដ្ឋាភិបាលយេម៉េនដួលរលំនោះទេព្រោះវានឹងធ្វើឱ្យឥទ្ធិពលរបស់អ៊ីរ៉ង់កាន់តែរីកសាយភាយនៅក្នុងតំបន់៕
ចែករំលែកព័តមាននេះ