ទីក្រុងម៉ូស្គូ៖ វិមានក្រឹមឡាំងកាលពីយប់មិញបានប្រកាសស្វាគមន៍យ៉ាងមហោឡារិកចំពោះការអំពាវនាវរបស់លោកដូណាល់ត្រាំដែលស្នើសុំឱ្យអ៊ុយក្រែនផ្អាកវាយប្រហារទីតាំងផលិតប្រេងម៉ាស៊ូតរបស់រុស្ស៊ី។ កាលពីថ្ងៃអាទិត្យ លោកត្រាំអំពាវនាវឱ្យលោកហ្សេឡិនស្គីឈប់វាយប្រហារទីតាំងប្រេងម៉ាស៊ូតរុស្ស៊ីព្រោះបណ្ដាលឱ្យបរិមាណប្រេងម៉ាស៊ូតកាន់តែតិចទៅៗ ហើយធ្វើឱ្យប៉ះពាល់ទីផ្សារពិភពលោក។ សកម្មភាពវាយប្រហារដោយប្រើប្រាស់ដ្រូនរបស់អ៊ុយក្រែនទៅលើរោងចក្រចម្រាញ់ប្រេងរុស្ស៊ីនារយៈពេលប៉ុន្មានខែចុងក្រោយនេះធ្វើឱ្យរុស្ស៊ីថយចុះសមត្ថភាពផលិតប្រេង ហើយធ្វើឱ្យរុស្ស៊ីខ្វះខាតប្រេងឥន្ធនៈសម្រាប់ប្រើប្រាស់ រួមទាំងសាំងផងដែរ។
អ៊ុយក្រែនអះអាងថាការវាយប្រហាររោងចក្រប្រេងរុស្ស៊ីធ្វើឱ្យប្រទេសនេះបង់នូវតម្លៃដ៏ខ្ពស់ចំពោះអំពើឈ្លានពានរបស់ពួកគេមកលើអ៊ុយក្រែន។ អ្នកនាំពាក្យវិមានក្រឹមឡាំង លោកប៉េស្កូស ថ្លែងថាលោកស្វាគមន៍ជានិច្ចរាល់ការអំពាវនាវឱ្យរដ្ឋាភិបាលទីក្រុងកៀវឈប់វាយប្រហារហេដ្ឋារចនាសម្ព័ន្ធស៊ីវិល។ ប្រភពខ្លះឱ្យដឹងថាប្រទេសរុស្ស៊ីខ្វះខាតសាំងនៅតំបន់ជាច្រើន។ បញ្ហាខ្វះខាតនេះធ្វើឱ្យប៉ះពាល់សតិអារម្មណ៍របស់ប្រជាជន ខណៈដែលការបោះឆ្នោតសភានៅរុស្ស៊ីកាន់តែកៀកមែនទែនហើយនៅសល់តែប៉ុន្មានថ្ងៃទៀតប៉ុណ្ណោះនឹងរៀបចំចាប់ពីថ្ងៃទី១៨-២០ ខែកញ្ញា។ លោកប៉េស្កូសថ្លែងថាវិបត្តិនៃការផ្គត់ផ្គង់ថាមពល (ប្រេង និងហ្គាស) ទៅកាន់ទីផ្សារពិភពលោកគឺបណ្ដាលមកពីបញ្ហាអស្ថិរភាព និងការផ្ទុះសង្គ្រាមកាន់តែខ្លាំងនៅតំបន់ឈូងសមុទ្រពែក្ស។ លោកអះអាងថារុស្ស៊ីត្រូវតែបិទការនាំចេញប្រេងម៉ាស៊ូតដើម្បីជួយលើកស្ទួយទីផ្សារក្នុងស្រុក។
ឆ្លើយតបទៅនឹងការលើកឡើងរបស់លោកដូណាល់ត្រាំ និងអ្នកនាំពាក្យវិមានក្រឹមឡាំង លោកហ្សេឡិនស្គីហាក់ដូចជាមិនជំទាស់នោះទេ។ លោកថាអ៊ុយក្រែនត្រៀមខ្លួនរួចជាស្រេចដើម្បីផ្អាកវាយប្រហារចូលទឹកដីរុស្ស៊ី។ សំខាន់ឱ្យតែក្រុមប្រទេសសម្ព័ន្ធមិត្តផ្ដល់ការធានាថារុស្ស៊ីឈប់វាយប្រហារហេដ្ឋារចនាសម្ព័ន្ធសំខាន់ៗរបស់អ៊ុយក្រែន។ ការថ្លែងដូច្នេះបន្ទាប់ពីលោកត្រាំបង្ហោះសារនៅលើបណ្ដាញសង្គមថារុស្ស៊ី និងអ៊ុយក្រែនយល់ព្រមឈប់វាយប្រហារទីតាំងថាមពលគ្នាទៅវិញទៅមក។ ប៉ុន្តែលោកមិនបានផ្ដល់សេចក្ដីលម្អិតដើម្បីគាំទ្រអំណះអំណាងរបស់លោកទេ។
លោកត្រាំកំពុងតែបារម្ភមិនតិចនោះទេចំពោះបញ្ហាប្រេងឡើងថ្លៃព្រោះវាធ្វើឱ្យប៉ះពាល់អារម្មណ៍របស់ពលរដ្ឋអាមេរិកាំងដែលជាម្ចាស់ឆ្នោតមុនការបោះឆ្នោតសភានាខែវិច្ឆិកាខាងមុខនេះ។ លោកអះអាងថាសង្គ្រាមអ៊ុយក្រែនជាកត្តាធំបំផុតដែលធ្វើឱ្យប្រេងឡើងថ្លៃ។ ចំណែកសង្គ្រាមអុីរ៉ង់លោកអះអាងថាមិនមានចំណែកនៅក្នុងរឿងនេះទាល់តែសោះ។ នៅក្នុងការបង្ហោះសារតាមបណ្ដាញសង្គមរបស់លោក ហ្សេឡិនស្គីសរសេររៀបរាប់ថាក្រុមប្រទេសជាដៃគូគួរតែជំរុញឱ្យមានបទឈប់បាញ់។ លោកថា ទីតាំងផលិតថាមពលរបស់អ៊ុយក្រែន កំពង់ផែ កន្លែងព័ស្តុភារ ស្បៀងអាហារ និងឃ្លាំងស្តុកទុកគ្រឿងបរិក្ខារពេទ្យសុទ្ធតែជាគោលដៅនៃការវាយប្រហាររបស់រុស្ស៊ីជារៀងរាល់ថ្ងៃ។ លោកទាមទារឱ្យបញ្ឈប់សង្គ្រាមនៅក្នុងពេលនេះ។ ជាដំណាក់កាលដំបូង ត្រូវបញ្ឈប់ការវាយប្រហារហេដ្ឋារចនាសម្ព័ន្ធសំខាន់ៗ៕ ប្រភព៖ Reuters និង AP
ចែករំលែកព័តមាននេះ