ពិតមែន!!! បុរសកើតជំងឺទឹកនោមផ្អែម អាចប្រឈមនឹងការអត់កូន?

ថ្ងៃទី ១៤ ខែ សីហា ឆ្នាំ ២០១៩2019-08-14T17:00:00+00:00
ម៉ោង ១៧:០០
សហការី

ជំងឺទឹកនោមផ្អែមត្រូវបានគេស្គាល់យ៉ាងច្បាស់ថា ជាការលើសជាតិស្ករក្នុងឈាម ដូច្នេះបើសិនជាអ្នកមានជំងឺនេះហើយ គ្រូពេទ្យតែងតែណែនាំឲ្យគ្រប់គ្រងជាតិស្ករជាទៀងទាត់។ ម្យ៉ាងវិញទៀត បើសិនជាអ្នកមានគម្រោងបង្កើតគ្រួសារមែននោះ ជំងឺនេះអាចនឹងប៉ះពាល់ដល់ជីវិតផ្លូវភេទបានដែរ។ ស្ត្រីអាចមានជំងឺទឹកនោមផ្អែមក្នុងពេលមានផ្ទៃពោះ ដែឡវាអាចធ្វើឲ្យស្ត្រីខ្លួនឯង និងទារកប្រឈមនឹងជំងឺនេះនៅថ្ងៃអនាគតបាន ប៉ុន្តែការដែលើសជាតិស្ករក្នុងឈាមចំពោះបុរស (បើសិនជាមិនបានគ្រប់គ្រង ឬព្យាបាល) ក៏អាចធ្វើឲ្យគេមិនងាយមានកូនបានដែរ។

មិនសូវមានមនុស្សច្រើនទេដែលដឹងថា បុរសដែលកើតជំងឺទឹកនោមផ្អែមអាចនឹងត្រូវការពេលយូរជាងស្ត្រីទៅទៀតក្នុងការមានកូន។ ជំងឺទឹកនោមផ្អែមប៉ះពាល់ដល់លទ្ធភាពមានកូនរបស់មនុស្សយើងដោយផ្ទាល់តែម្តង ហើយឱកាសនោះគឺខ្ពស់ជាងស្ត្រីទៅទៀត។ នេះដោយសារតែ ជាតិស្ករដែលឡើងខ្ពស់នឹងដាក់សម្ពាធអុកស៊ីតកម្មដែលអាចបំផ្លាញ DNA របស់មេជីវិតឈ្មោលបាន។

ដូច្នេះកាលណាកោសិកាដែលខូច DNA ហើយគឺមិនអាចបង្កកំណើតបានឡើយ។ លើសពីនេះទៅទៀត ជំងឺទឹកនោមផ្អែមដែលមិនបានគ្រប់គ្រង ឬព្យាបាលអាចប៉ះពាល់ដល់សរសៃឈាមតូចៗ និងសរសៃប្រសាទដែលមាននាទីបាញ់ទឹកកាម ដូច្នេះ វាងាយនឹងធ្វើឲ្យលិង្គរបស់អ្នកជំងឺក្រឡើងរឹងបានណាស់។ ការលើសជាតិស្ករក្នុងឈាមអាចបន្ថយចំនួនអ័រម៉ូនភេទប្រុសតេស្តូស្តេរ៉ូន ដូច្នេះអ្នកជំងឺងាយនឹងបាត់បង់ចំណង់ផ្លូវភេទថែមទៀត។

ម្យ៉ាងវិញទៀត បើសិនជាប្រពន្ធអ្នកមានផ្ទៃពោះជាមួយនឹងជំងឺទឹកនោមផ្អែមប្រភេទទី១ និងទី២ នាងប្រហែលជាប្រឈមខ្ពស់នឹងការរលូតកូន។ ចំពោះទារកដែលកើតពីម្តាយដែលមានជំងឺទឹកនោមផ្អែមកំពុងតែមានផ្ទៃពោះ ទំនងជាអាចស្លាប់ក្នុងផ្ទៃ ឬកង្វះអាហារូបត្ថម្ភ។

តើអាចគ្រប់គ្រងបានទេ?

ជំងឺទឹកនោមផ្អែមគឺជាជំងឺរ៉ាំរ៉ៃ ដែលបណ្តាលមកពីលំពែងមិនអាចផលិតអាំងស៊ុយលីនគ្រប់គ្រាន់ និងកោសិកាក្នុងរាងកាយមិនអាចប្រើប្រាស់អាំងស៊ុយលីនបាន។ យ៉ាងណាមិញ ជំងឺនេះអាចគ្រប់គ្រងបានតាមរយៈការផ្លាស់ប្តូររបៀបរស់នៅដូចជា ញ៉ាំអាហារផ្តល់សុខភាព និងហាត់ប្រាណជាទៀងទាត់។ យកល្អគួរតែធ្វើយ៉ាងណារក្សាកម្រិតជាតិស្ករក្នុងឈាមឲ្យនៅធម្មតាសិនមុននឹងវាប៉ះពាល់ដល់ជីវិតផ្លូវភេទ រហូតដល់មិនអាចមានកូន។

ការដែលលិង្គមិនងាយឡើងរឹង អាចគ្រប់គ្រងបានតាមរយៈការប្រើថ្នាំសម្រាប់ពង្រឹងដល់លំហូរឈាមទៅសរីរាង្គប្រដាប់បន្តពូជ។ យ៉ាងណាមិញ ដើម្បីដោះស្រាយរឿងនេះ យកល្អគួរតែស្វែងយល់អំពីរោគសញ្ញាជំងឺទឹកនោមផ្អែម ហើយគ្រប់គ្រងវា។ បើសិនជាអ្នកអាយុចាប់ពី ៣០ឆ្នាំឡើង ធាត់ ឬធាត់ជ្រុលដែលមានសន្ទស្សទម្ងន់ធៀបនឹងកម្ពស់ ២៣ ទៅ ២៤.៩ ឬ គ្រួសារធ្លាប់មានប្រវត្តិកើតជំងឺទឹកនោមផ្អែមហើយ យកល្អគួរតែស្វែងរកការពិគ្រោះជាមួយគ្រូពេទ្យដើម្បីទទួលបានដំបូន្មានមុននឹងវាវិវដ្តន៍ទៅជាផលវិបាកធ្ងន់ធ្ងរ (ប្រភពពី៖ Health.com.kh)៕ (កែសម្រួលដោយ ៖ បុប្ផា)