រាជធានីភ្នំពេញ ៖ នៅឆ្នាំ២០១៤ នេះ តម្លៃម្រេចខេត្តកំពត មានការប្រែប្រួលកើនឡើងលើសឆ្នាំ២០១៣ តិចតួច ដោយម្រេចខ្មៅតម្លៃ១១ដុល្លារក្នុងមួយគីឡូក្រាម ម្រេច.សតម្លៃ១៨ដុល្លារក្នុងមួយគីឡូក្រាម និងម្រេចក្រហមតម្លៃ២០ដុល្លារក្នុងមួយគីឡូក្រាម ខណៈពេលដែលឆ្នាំ២០១៣ ម្រេចខ្មៅ១១ដុល្លារក្នុងមួយគីឡូក្រាម ម្រេច.ស១៨ដុល្លារ និងម្រេចក្រហម១៥ដុល្លារក្នុងមួយគីឡូ
រាជធានីភ្នំពេញ ៖ នៅឆ្នាំ២០១៤ នេះ តម្លៃម្រេចខេត្តកំពត មានការប្រែប្រួលកើនឡើងលើសឆ្នាំ២០១៣ តិចតួច ដោយម្រេចខ្មៅតម្លៃ១១ដុល្លារក្នុងមួយគីឡូក្រាម ម្រេច.សតម្លៃ១៨ដុល្លារក្នុងមួយគីឡូក្រាម និងម្រេចក្រហមតម្លៃ២០ដុល្លារក្នុងមួយគីឡូក្រាម ខណៈពេលដែលឆ្នាំ២០១៣ ម្រេចខ្មៅ១១ដុល្លារក្នុងមួយគីឡូក្រាម ម្រេច.ស១៨ដុល្លារ និងម្រេចក្រហម១៥ដុល្លារក្នុងមួយគីឡូក្រាម ។ នេះបើយោងតាមសម្តីរបស់លោកងួន ឡាយ ប្រធានសមាគមលើកកម្ពស់ម្រេចខេត្តកំពត ។
លោកងួន ឡាយ បានមានប្រសាសន៍ទៀតថា ឆ្នាំនេះតម្លៃម្រេចដែលលក់នៅក្នុងសមាគមលើកកម្ពស់ខេត្តកំពត មានការកើនឡើងតិចតួចដែរ ហើយចំពោះចំនួននៃការបញ្ជាទិញរបស់អ្នកបញ្ជាទិញមានច្រើន ដោយសារអ្នកបញ្ជាទិញចង់បានផលិតផលម្រេចរបស់ខេត្តកំពតច្រើនតែខាងសមាគម ក៏ដូចជាផលិតករពុំមានលទ្ធភាពផលិតម្រេចឱ្យបានគ្រប់ចំនួនដែលអ្នកបញ្ជាទិញត្រូវការនោះទេ ។ ឆ្នាំនេះ សមាគមបានកំណត់ចំនួនឱ្យអ្នកបញ្ជាទិញរួចហើយ គឺនៅចន្លោះពី២៦ទៅ២៧តោន ដោយរាល់ឆ្នាំខាងសមាគមបានផលិតម្រេចឱ្យអ្នកបញ្ជាទិញ តែចំនួនជុំវិញ២០តោនប៉ុណ្ណោះ តែសម្រាប់ឆ្នាំនេះ ខាងសមាគមសង្កេតឃើញថា ចំនួននៃអ្នកផលិតដែលចូលក្នុងសមាគម និងម្រេចនៅក្នុងសមាគមមានការកើនឡើងច្រើនជាងឆ្នាំមុន ដូចនេះ សមាគមក៏បានធានាថា នឹងអាចផលិតម្រេចឱ្យបាន២៦ទៅ២៧តោន ។
លោកបន្តថា ដំណាំម្រេចជាដំណាំមួយប្រភេទដែលត្រូវការរយៈពេលយូរក្នុងការទទួលផល គឺរយៈពេលចាប់ពីដាំរហូតដល់ទទួលផលត្រូវការពេល៣ឆ្នាំ ។ ហើយសព្វថ្ងៃនេះ ផ្ទៃដីដំណាំម្រេចខេត្តកំពតនៅក្នុងសមាគមមានប្រហែលជា៩០ហិកតា តែផ្ទៃដីដែលទទួលផលមានតែជាង១២ហិកតាប៉ុណ្ណោះ ដូចនេះវាហាក់ដូចជានៅតិចតួចដែរ ហើយនៅឆ្នាំ២០១៥-២០១៦ ផ្ទៃដីទទួលផលនៅក្នុងសមាគមមានចំនួនច្រើន និងអាចផលិតបានច្រើនផងដែរ សម្រាប់អ្នកបញ្ជាទិញ ។
លោកបន្ថែមថា សព្វថ្ងៃនេះ ទីផ្សារម្រេចខេត្តកំពត បាននាំចេញទៅក្រៅបាន២៤ប្រទេស ដែលអ្នកបញ្ជាទិញបានទិញពីសមាគម ក្នុងនោះភាគច្រើនបាននាំចេញទៅប្រទេសបារាំង និងសហរដ្ឋអាមេរិក ហើយនៅបណ្តាប្រទេសអាស៊ីមួយចំនួនទៀតផងដែរ ។
ចែករំលែកព័តមាននេះ