រាជធានីភ្នំពេញ ៖ លោកស៊ិន វិសាល ចៅក្រមសាលាដំបូងរាជធានីភ្នំពេញ កាលពីព្រឹកថ្ងៃទី១៧ កុម្ភៈ ២០១៤ បានប្រកាសសាលក្រមលើសំណុំរឿងពុករលួយឆបោកមានស្ថានទម្ងន់ទោស ដោយផ្តន្ទាទោសឈ្មោះកែវ សុផល អាយុ៤៨ឆ្នាំ ជាមន្ត្រីនគរបាលបេតិកភណ្ឌក្រសួងមហាផ្ទៃ និងឈ្មោះនួន សារ៉ាត់ ភេទប្រុស អាយុ៤២ឆ្នាំ ជាអតីតមន្ត្រីក្រសួងយុត្តិធម៌ ដាក់ពន្ធនាគារម្នាក់ៗរយៈពេល៣ឆ្នាំ តែអនុវត្តទោស២ឆ្នាំនៅក្នុងពន្ធនាគារ និងបង្គាប់ឱ្យសងជំងឺចិត្តទៅជនរងគ្រោះដែលជាភាគីដើមបណ្តឹងម្នាក់ៗ១.២០០ដុល្លារអាមេរិក។
លោកចៅក្រម ស៊ិន វិសាល បានបន្តថា ជនជាប់ចោទទាំង២នាក់មានសិទ្ធិប្តឹងជំទាស់នឹងសេចក្តីសម្រេចនេះទៅសាលាឧទ្ធរណ៍ក្នុងរយៈពេល៣០ឆ្នាំ គិតចាប់ពីថ្ងៃប្រកាសសាលក្រមនេះ។
លោកចៅក្រមបានបញ្ជាក់ថា ជនជាប់ចោទទាំង២នាក់ត្រូវបានចោទប្រកាន់ពីតំណាងអយ្យការពីបទឆបោកប្រព្រឹត្តដោយអ្នករាជការសាធារណៈ តាមមាត្រា៣៧៥ និង៣៨០នៃក្រមព្រហ្មទណ្ឌ និងត្រូវបានចាប់ខ្លួនដោយអង្គភាពប្រឆាំងអំពើពុករលួយកាលពីថ្ងៃទី១ មិថុនា ២០១៣ ពាក់ព័ន្ធនឹងការប្រព្រឹត្តអំពើពុករលួយ ទទួលសំណូកជាប្រាក់ចំនួន២.៥០០ដុល្លារអាមេរិកពីស្ត្រីម្នាក់ឈ្មោះសាន យ៉េន រស់នៅស្រុកឈូក ខេត្តកំពត ដោយសន្យាថា នឹងយកលុយនោះទៅរត់ការក្នុងការដោះលែងជនជាប់ចោទ(ប្តីជនរងគ្រោះ)ដែលកំពុងជាប់ពន្ធនាគារព្រៃស។ ប៉ុន្តែការរត់ការមិនបានសម្រេច និងបានស៊ីដាច់លុយរបស់ជនរងគ្រោះ៕
ចែករំលែកព័តមាននេះ