ខេត្តសៀមរាប ៖ សំណុំរឿងបង្ក្រាបអំពើរត់ពន្ធឆ្លងដែននូវសំណាកសត្វព្រៃជិតផុតពូជនៅព្រលានយន្តហោះអន្តរជាតិសៀមរាប កាលពីពេលថ្មីៗនេះបាននាំឱ្យចៅក្រមស៊ើបសួរសម្រេចចេញដីកាបង្គាប់ឱ្យឃុំខ្លួនជនជាប់ចោទជនជាតិវៀតណាម២នាក់ដាក់ពន្ធនាគារជាបណ្តោះអាសន្ន ខណៈវត្ថុតាងបទល្មើសភ្លុកដំរីទម្ងន់ជិត៨០គីឡូក្រាមកំពុងស្ថិតក្នុងការប្រទាញប្រទង់ធ្វើជាម្ចាស់គ្រប់គ្រងបណ្តោះអាសន្នរវាងរដ្ឋបាលព្រៃឈើ និងជំនាញគយ និងរដ្ឋាករនៅឡើយ។
ប្រធានស្តីទីសាលាដំបូងខេត្តសៀមរាប លោកឌុច សុខសារិន ចៅក្រមស៊ើបសួរក្នុងសំណុំរឿងខាងលើបានមានប្រសាសន៍នៅព្រឹកថ្ងៃទី១៨ កុម្ភៈ នេះថា លោកបានសម្រេចចេញដីកាបង្គាប់ឱ្យឃុំខ្លួនជនជាប់ចោទទាំង២នាក់នេះដាក់ពន្ធនាគារបណ្តោះអាសន្នកាលពីរសៀលម្សិលមិញ បន្ទាប់ពីតំណាងអយ្យការចោទប្រកាន់ពីបទនាំចូលសំណាកសត្វព្រៃដែលកម្រ និងជិតផុតពូជដែលជាបទល្មើសមានបញត្តិនៅក្នុងមាត្រា៩៨នៃច្បាប់ស្តីពីព្រៃឈើកម្ពុជា។
ជនជាតិវៀតណាមជាប់ចោទដែលត្រូវនាំដាក់គុកបណ្តោះអាសន្នទាំង២នាក់នោះ ម្នាក់ឈ្មោះផាម ខ្វានទ្រៀង ភេទប្រុស អាយុ២៣ឆ្នាំ កាន់លិខិតឆ្លងដែនលេខB៥៤៨០៦៨៤ និងម្នាក់ទៀតឈ្មោះបួយ វ៉ាន់ទៀង ភេទប្រុស អាយុ៤៥ឆ្នាំ កាន់លិខិតឆ្លងដែនលេខB៥៣៨១៩៩២។
គួររំលឹកថា ជនជាតិវៀតណាមទាំង២នាក់ត្រូវបានកម្លាំងចម្រុះប្រចាំអាកាសយានដ្ឋានអន្តរជាតិសៀមរាបចាប់ខ្លួនកាលពីយប់ថ្ងៃទី១៦ កុម្ភៈ ២០១៤ ជាមួយនឹងភ្លុកដំរីចំនួន៣វ៉ាលីទម្ងន់ជិត៨០គីឡូក្រាមពីប្រទេសអង់ហ្គោឡាឆ្លងកាត់ច្រកទ្វារទេសចរណ៍ដ៏សំខាន់របស់ព្រះរាជាណាចក្រកម្ពុជាដើម្បីនាំទៅកាន់ទីផ្សារងងឹត៕
ចែករំលែកព័តមាននេះ