ខេត្តកំពង់ឆ្នាំង ៖ អុសស្ទែរ (ឈើចម្រុះ) រាប់ពាន់ម៉ែត្រគូប នៅតែដាក់តាំងលក់ យ៉ាងអនាធិបតេយ្យនៅតាមផ្លូវលំក្នុងភូមិចំនួន៣ ក្នុងឃុំជៀប ស្រុកទឹកផុស ដោយពុំឃើញមានសមត្ថកិច្ចជំនាញទប់ស្កាត់ ឬបង្ក្រាបឡើយ។
ខេត្តកំពង់ឆ្នាំង ៖ អុសស្ទែរ (ឈើចម្រុះ) រាប់ពាន់ម៉ែត្រគូប នៅតែដាក់តាំងលក់ យ៉ាងអនាធិបតេយ្យនៅតាមផ្លូវលំក្នុងភូមិចំនួន៣ ក្នុងឃុំជៀប ស្រុកទឹកផុស ដោយពុំឃើញមានសមត្ថកិច្ចជំនាញទប់ស្កាត់ ឬបង្ក្រាបឡើយ។
ប្រភពពីប្រជាពលរដ្ឋនៅក្នុងមូលដ្ឋានបានឱ្យដឹងថា អុសស្ទែរទាំងនេះជាប្រភេទឈើចំរុះ ដែលគេបានកាប់ចេញពីតំបន់អភិរក្សដែនជំរកសត្វព្រៃភ្នំឱរ៉ាល់ និងតំបន់ព្រៃដែលគ្រប់គ្រងដោយផ្នែករដ្ឋបាលព្រៃឈើរមាស ។ ក្នុងមួយថ្ងៃៗ គេឃើញមានគោយន្ត រាប់សិបគ្រឿង បានដឹកដើមឈើគ្រប់ប្រភេទមកអារអង្កន់ធ្វើជាអុសស្ទែរដាក់តាំងលក់តាមផ្លូវនៅមុខផ្ទះប្រជាពលរដ្ឋរៀងខ្លួន ស្ថិតក្នុងភូមិ៣ គឺភូមិបឹងស្ទេង ភូមិទំនប់ថ្មី និងភូមិតានៃ ក្នុងឃុំជៀប ស្រុកទឹកផុស ហើយមិនដែលឃើញអាជ្ញាធរ សមត្ថកិច្ចមូលដ្ឋាន និងសមត្ថកិច្ចជំនាញ ធ្វើការទប់ស្កាត់ឬបង្ក្រាបឡើយ ។ ករណីនេះត្រូវបានគេរិះគន់និងសង្ស័យថា សមត្ថកិច្ចជំនាញបានបើកដៃ និងឃុបឃិតទទួលប្រាក់ពីអ្នកកាប់អុសទាំងនោះ។
មន្ត្រីផ្នែករដ្ឋបាលព្រៃឈើរមាស ស្រុកទឹកផុស ម្នាក់បានឱ្យដឹងថាអុសស្ទែរនេះពិតជាមានមែន តែមានតិចតួចក្នុងមួយគ្រួសារ៤ទៅ៥ម៉ែត្រតែប៉ុណ្ណោះ មន្ត្រីជំនាញក៍ពិបាកក្នុងការបង្ក្រាបដែរ។ ចំណែកអុសស្ទែរមួយចំនួនធំបានកាប់ចេញពីដែនជំរកសត្វព្រៃភ្នំឱរ៉ាល់ ដោយឡែករថយន្តធំៗដែលចូលមកទិញអុស មន្ត្រីជំនាញបានបិទមិនឱ្យចូលមកដឹកឡើយ។
នាយរងខណ្ឌរដ្ឋបាលព្រៃឈើកំពង់ឆ្នាំងបានឱ្យដឹងថា បទល្មើសព្រៃឈើដែលកើតមាននៅក្នុងផ្នែក ឬសង្កាត់រដ្ឋបាលព្រៃឈើណា គឺប្រធានផ្នែក ប្រធានសង្កាត់នោះជាអ្នកទទួលខុសត្រូវចំពោះមុខច្បាប់។ ប៉ុន្តែបើផ្នែកនិងសង្កាត់ទាំងនោះមិនចាត់ការ គឺខណ្ឌជាអ្នកចាត់ការបង្ក្រាប ព្រោះនាយខណ្ឌរដ្ឋបាលព្រៃឈើជាអ្នកទទួលខុសត្រូវរួមជាមួយថ្នាក់លើ ដូច្នេះខណ្ឌមិនឱ្យមន្ត្រីថ្នាក់ក្រោមធ្វើអ្វីតាមទំនើងចិត្តនោះទេ។
ដោយឡែកមន្ត្រីបរិស្ថានក្នុងដែនជំរកសត្វព្រៃភ្នំឱរ៉ាល់ម្នាក់បានឱ្យដឹងថា អុសស្ទែរទាំងនោះ គឺប្រជាពលរដ្ឋកាប់ចេញពីដែនព្រៃឈើដែលគ្រប់គ្រងដោយរដ្ឋបាលព្រៃឈើ ការកាប់ឈើនៅក្នុងដែនជំរកសត្វព្រៃមានតិចតួចប៉ុណ្ណោះ ពេលមានចន្លោះប្រហោងរបស់ជំនាញ។
ករណីកាប់អុសស្ទែរដាក់លក់រាប់ពាន់ម៉ែត្រគូបនៅចំណុចខាងលើនេះ មន្ត្រីក្នុងស្ថាប័នទាំង២កំពុងឆ្លើយដាក់គ្នា ដូចនេះសូមគណៈបញ្ជាការឯកភាពខេត្ត និងគណៈកម្មការចំរុះបង្ក្រាបបទល្មើសរបស់ខេត្ត មេត្តាចុះមកត្រួតពិនិត្យជាក់ស្តែង និងបង្ក្រាបឱ្យមានប្រសិទ្ធិភាពផង បើពុំនោះទេព្រៃឈើនៅក្នុងស្រុកទឹកផុស និងក្នុងដែនជំរកសត្វព្រៃភ្នំឱរ៉ាល់ ពិតជាវិនាស
ហិនហោចក្នុងពេលឆាប់ៗខាងមុខនេះជាពុំខានឡើយ ៕
ចែករំលែកព័តមាននេះ