រាជធានីភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានមានប្រសាសន៏ថា កម្ពុជាកំពុងប្តេជ្ញាចិត្តពង្រីកមូលដ្ឋានកំណើនរបស់ខ្លួនជាបន្តទៅទៀតក្នុងនោះរាជរដ្ឋាភិបាលកំពុងបន្តពង្រឹងអភិបាលកិច្ចល្អ បង្កើនខ្សែសង្វាក់តម្លៃ ចូលរួមនៅក្នុងសង្វាក់តម្លៃក្នុងតំបន់ និងបង្កើតលក្ខខណ្ឌអំណោយផលសម្រាប់វិស័យឯកជន ដើម្បីទាក់ទាញការវិនិយោគនិង ធានាភាពប្រក្រួតប្រជែងរបស់ខ្លួន ។ តាមរយៈនេះ សម្តេចមានជំនឿយ៉ាងមុតមំាថា កម្ពុជាពិតជាអាចបន្តបោះជំហានទៅមុខយ៉ាងស្វាហាប់ និងស៊ីសង្វាក់ ហើយឈានទៅសម្រេចបានចក្ខុវិស័យវែងឆ្ងាយរបស់ខ្លួន ពោលគឺប្រែក្លាយកម្ពុជា ទៅជាប្រទេសមានចំណូលមធ្យមកម្រិតខ្ពស់ក្នុងឆ្នាំ២០៣០ ហើយឈានឡើងទៅជាប្រទេសមានចំណូលខ្ពស់ក្នុងឆ្នាំ២០៥០។
សម្តេចនាយករដ្ឋមន្រ្តី ហ៊ុន សែន ថ្លែងបែបនេះនៅព្រឹកថ្ងៃទី១៨ កុម្ភៈ ២០១៤ ក្នុងឱកាសដែលសម្តេចបានអញ្ជើញជាអធិបតីភាពដ៏ខ្ពង់ខ្ពស់សម្ពោធជាផ្លូវការនៃយុទ្ឋសាស្រ្តសមាហរណកម្មពាណិជ្ជកម្មកម្ពុជាឆ្នាំ២០១៤-២០១៨ នៅវិមានសន្តិភាពទីស្តីការនាយករដ្ឋមន្រ្តី ។
មានប្រសាសន៏បញ្ជាក់បន្ថែមក្នុងឱកាសនោះដែរសម្តេចតេជោបន្តថា ក្នុងរយៈពេលប៉ុន្មានឆ្នាំចុងក្រោយនេះ កម្ពុជាបានឆ្លងកាត់នូវការផ្លាស់ប្តូរមុខងារច្រើន មិនត្រឹមតែខាងនយោបាយ និង សន្តិសុខប៉ុណ្ណោះទេ ប៉ុន្តែថែមទាំងមានការប្រែប្រួលខាងសេដ្ឋកិច្ច ពាណិជ្ជកម្ម និង សង្គមផងដែរ ។ ហើយអ្វីដែលរិតតែសំខាន់ជាងនេះទៀត កម្ពុជាក៏បានប្រឹងប្រែងបង្កើនលទ្ធភាព និង សមត្ថភាពរបស់ខ្លួន ក្នុងកិច្ចសហប្រតិបត្តិការជាច្រើន ទាំងនៅថ្នាក់តំបន់ និង អន្តរជាតិ ព្រមទាំងបានជំរុញការអនុវត្តកម្មវិធីកែទម្រង់ស៊ីជម្រៅបន្ថែមទៀត ដើម្បីទំនើបកម្ម រចនាសម្ព័ន្ធ និង បុរេសកម្មប្រព័ន្ធគ្រប់គ្រងសេដ្ឋកិច្ចជាតិ ក៏ដូចជាការពង្រឹងភាពប្រកួតប្រជែងរបស់កម្ពុជា ក្នុងគោលដៅឆ្លើយតបទៅនឹងរបត់សេដ្ឋកិច្ចថ្នាក់តំបន់ ក៏ដូចជាពិភពលោកទាំងមូល ។
ជាក់ស្តែងកម្ពុជា កំពុងតែចូលរួមយ៉ាងសកម្មនៅក្នុងរាល់គំនិតផ្តួចផ្តើមអំពីសេដ្ឋកិច្ច និង ហិរញ្ញវត្ថុរបស់សមាគមឤស៊ាន ពិសេសនៅក្នុងគំនិតផ្តួចផ្តើមនានា ដើម្បីដាក់ឲ្យដំណើរការសហគមន៍សេដ្ឋកិច្ចឤស៊ានឲ្យបានកើតឡើងយ៉ាងពិតប្រាកដ នៅក្នុងឆ្នាំ២០១៥ ខាងមុខនេះ ។
សម្តេចនាយករដ្ឋមន្រ្តី ហ៊ុន សែន បញ្ជាក់ទៀតថា ឈរលើមូលដ្ឋានទាំងអស់នេះ កម្ពុជាបានធ្វើសមាហរណកម្មខ្លួនពេញលេញចូលទៅក្នុងតំបន់និងពិភពលោក ហើយកំពុងដើរតួនាទីយ៉ាងសកម្មក្នុងកិច្ចសហប្រតិបត្តិការនានា ប្រកបដោយចីរភាព ក្នុងឋានៈជាសមាជិកស្មើភាព និង ស្មើសិទ្ធិលើឆាកអន្តរជាតិ ។ ជាការពិតយុទ្ធសាស្ត្រសមាហរណកម្មនេះ បានកំណត់ពីឤទិភាពជាក់លាក់នានា សម្រាប់ធ្វើអន្តរាគមន៍ជាបន្ទាន់ ហើយក៏បានកំណត់ឤទិភាព និង ដំណាក់កាលអនុវត្តនានា ដែលនឹងក្លាយទៅជាផែនការលម្អិតសម្រាប់ការអភិវឌ្ឍវិស័យពាណិជ្ជកម្មកម្ពុជាក្នុងរយៈពេល ៥ ឆ្នាំបន្ទាប់ទៀត ៕
ចែករំលែកព័តមាននេះ