ខេត្តសៀមរាប ៖ ក្រុមមន្ត្រីនគរបាល បានប្រាប់ឱ្យដឹងថា បុរសជនជាតិវៀតណាមចំនួនពីរនាក់ត្រូវកម្លាំងចម្រុះប្រចាំអាកាសយានដ្ឋានអន្តរជាតិសៀមរាប ចាប់ខ្លួនកាលពីយប់ថ្ងៃទី១៦ កុម្ភៈ ខណៈជនទាំងពីរនាក់ព្យាយាមនាំចូលភ្លុកដំរីកាត់ជាកង់ៗចំនួនបីវ៉ាលីស ដែលមានទម្ងន់ជិត៨០គីឡូក្រាម ពីទ្វីបអាហ្វ្រិកឆ្លងកាត់ច្រកទ្វារទេសចរណ៍ដ៏សំខាន់របស់ព្រះរាជាណាចក្រកម្ពុជា ។
នេះអាចចាត់ទុកថាជាលើកដំបូងហើយដែលមានការរត់ពន្ធភ្លុកដំរីឆ្លងកាត់កម្ពុជា ។ ប្រធានការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តលោកវរសេនីយ៍ទោ សឿន សេន បាននិយាយថា ប្រតិបត្តិការបង្ក្រាបនេះធ្វើឡើងនៅវេលាម៉ាង៩និង៣០នាទីយប់ថ្ងៃទី១៦ កុម្ភៈ ក្រោមការដឹកនាំរបស់លោកជួន សុបញ្ញា ព្រះរាជអាជ្ញារងអមសាលាដំបូងខេត្តសៀមរាប និងមានការចូលរួមប្រតិបត្តិការផ្ទាល់ដោយកម្លាំងនគរបាលស្នងការដ្ឋានខេត្ត និងនគរបាលអន្តោប្រវេសន៍ប្រចាំអាកាសយានដ្ឋានផងដែរ ។ លោកសឿន សេន និយាយថា ជនសង្ស័យទាំងពីរនាក់ដែលត្រូវបានចាប់ខ្លួននេះម្នាក់ឈ្មោះផាម ខ្វានទ្រៀង អាយុ២៣ឆ្នាំ កាន់លិខិតឆ្លងដែនលេខ B៥៤៨០៦៨៤ និងម្នាក់ទៀតឈ្មោះបួយ វា៉ន់ទៀង អាយុ៤៥ឆ្នាំ កាន់លិខិតឆ្លងដែនលេខB៥៣៨១៩៩២ ។ ជនជាតិវៀតណាមទាំង២នាក់ បានធ្វើដំណើរចេញពីប្រទេសអង់ហ្គោឡា (ទ្វីបអាហ្វ្រិក) ឆ្លងកាត់ព្រលានយន្តហោះ ប្រទេសកូរ៉េចូលមកកាន់ព្រលានយន្តហោះខេត្តសៀមរាប ជាមួយភ្លុកដំរីទម្ងន់៧៩,៥ គីឡូក្រាម ដាក់ក្នុងវ៉ាលីសចំនួន៣ ។
លោកបានបន្ថែមថា តាមការសាកសួរឃើញថាភ្លុកដំរីទាំងនេះទំនងជាមិនត្រូវបាននាំចូលសម្រាប់ជួញដូរនៅក្នុងប្រទេសកម្ពុជាទេ តែទំនងជាត្រូវនាំទៅកាន់ប្រទេសវៀតណាម និងប្រទេសចិន ដើម្បីធ្វើជាគ្រឿងលម្អ ឬក៏គ្រឿងអលង្ការផ្សេងៗដែលមានតម្លៃខ្ពស់ ។ ក្រុមមន្រ្តីបានអះអាងថា នេះជាករណីដំបូងហើយដែលសមត្ថកិច្ចចម្រុះប្រចាំនៅច្រកទ្វារអន្តរជាតិខាងលើធ្វើការបង្រ្កាបបានភ្លុកដំរីនាំចូលពីបរទេសនៅគ្រាដែលប្រទេសវៀតណាមនិងប្រទេសមួយចំនួននៅលើពិភពលោកត្រូវបានគេរាយការណ៍ថាបានធ្វើការចាប់ និងដុតបំផ្លាញចោលនូវភ្លុកដំរីរាប់តោនកាលពីពេលថ្មីៗកន្លងទៅនេះ ។ គួរកត់សម្គាល់ផងដែរថា ក្រៅពីបង្ក្រាបបទល្មើសជួញដូរភ្លុកដំរី សមត្ថកិច្ចចម្រុះបានបង្រ្កាបជាលក្ខណៈទ្រង់ទ្រាយធំទៅលើបទល្មើសរត់ពន្ធគ្រឿងញៀនឆ្លងដែនតាមច្រកអាកាសយានដ្ឋានអន្តរជាតិសៀមរាបចំនួន៧លើករួចមកហើយ ដោយបានរឹបអូសវត្ថុតាងគ្រឿងញៀនជាង២០គីឡូក្រាម និងចាប់ខ្លួនឧក្រិដ្ឋជនបានចំនួន៨នាក់ក្នុងនោះ៦នាក់ជាស្រ្តី ។ ជាមួយគ្នានេះដែរ ច្រកអន្តរជាតិនេះក៏ធ្លាប់ជាច្រកនាំចេញនូវស្ត្រីខ្មែរក្មេងៗទៅជួញដូរនៅប្រទេសចិនដែរតាមរូបភាពទៅធ្វើទេសចរណ៍ ឬការប្តីនៅទីនោះជាដើម ។
សត្វដំរីត្រូវបានអង្គការអភិរក្សសត្វព្រៃកំពុងប្រឹងប្រែងយកចិត្តទុកដាក់យ៉ាងខ្លាំង ព្រោះតែវាត្រូវចាត់បញ្ចូលទៅក្នុងពពួកសត្វកម្រជិតផុតពូជពីលើភពផែនដីនេះ ដោយសកម្មភាពប្រមាញ់ដ៏ផ្តាច់ផ្តិល ដើម្បីយកភ្លុកធ្វើជាជំនួញ ។ យោងតាមទីភ្នាក់ងារព័ត៌មានអន្តរជាតិមួយដែលបានចុះផ្សាយទាក់ទិនទៅនឹងឧក្រិដ្ឋកម្មសត្វដំរីកាលពីពេលថ្មីៗនេះបានឲ្យដឹងថា មានសត្វដំរីយ៉ាងតិច៤៨០ក្បាល ត្រូវគេសម្លាប់នៅឯឧទ្យានជាតិមួយកន្លែងរបស់ប្រទេសកាមេរូន ក្នុងរយៈជិត២ខែកន្លងទៅនេះពីសំណាក់អ្នកប្រមាញ់មកពីប្រទេសសូ៊ដង់ និងឆាដ ។ ទន្ទឹមនឹងព័ត៌មានអំពីការសម្លាប់ពពួកសត្វដំរីដ៏ច្រើនមហិមាទាំងនោះ កាលពីពេលថ្មីៗនេះនៅលើបណ្តាញផ្សព្វផ្សាយបរទេសសំខាន់ៗមួយចំនួន ក៏បានបង្ហាញពីកិច្ចប្រឹងប្រែងបង្រ្កាបរបស់សមត្ថកិច្ចទៅលើជំនួញភ្លុកដំរីនោះដែរ តាមរយៈការដុតបំផ្លាញចោលនូវភ្លុកដំរីរាប់ពាន់គូដូចជានៅប្រទេសវៀតណាម និងសហរដ្ឋអាមេរិកជាដើម ។
ព្រះរាជអាជ្ញារងអមសាលាដំបូងខេត្តសៀមរាបលោកជួន សុបញ្ញា ដែលបានដឹកនាំប្រតិបត្តិការខាងលើបានថ្លែងនៅថ្ងៃទី១៧ កុម្ភៈ ថា ការចាប់ខ្លួនជនជាតិវៀតណាមទាំងពីរនាក់នេះ គឺជាការបង្ក្រាបបទល្មើសជាក់ស្តែង ។ យើងមានភស្តុតាងគ្រប់គ្រាន់ដាក់បន្ទុកគឺភ្លុកដំរី ដែលជាការប្រព្រឹត្តបទល្មើសនាំចូលនូវសំណាកសត្វព្រៃដែលកម្រ និងជិតផុតពូជដូចមានចែងនៅក្នុងមាត្រា៩៨នៃច្បាប់ស្តីពីព្រៃឈើកម្ពុជា ។ លោកបន្តថា ជនទាំងពីរនាក់បច្ចុប្បន្នបានប្រគល់ទៅឲ្យមន្រ្តីរដ្ឋបាលព្រៃឈើសៀមរាប ដើម្បីកសាងសំណុំរឿងតាមនីតិវិធី ហើយអាចប្រឈមនឹងការជាប់ពន្ធនាគាររយៈពេលចាប់ពី១ឆ្នាំទៅ៥ឆ្នាំ និងពិន័យជាប្រាក់ជាច្រើនលានរៀលផងដែរ ។
គួរកត់សម្គាល់ថា នៅគ្រាដែលមានការប្រគល់ជនសង្ស័យទៅឱ្យសមត្ថកិច្ចរដ្ឋបាលព្រៃឈើសៀមរាប កាលពីព្រឹកថ្ងៃទី១៧ កុម្ភៈ នោះគេឃើញតែមនុស្សពីរនាក់នេះប៉ុណ្ណោះ ដោយឡែកវត្ថុតាងប្រព្រឹត្តបទល្មើសគឺភ្លុកដំរី ដែលត្រូវគេរាយការណ៍ថាមួយចំនួនបានអារជាកង់ៗ និងខ្លះទៀតនៅរក្សាទ្រង់ទ្រាយដើមនៅឡើយ មិនត្រូវបានប្រគល់ទៅឲ្យសមត្ថកិច្ចជំនាញរក្សាទុក ទេ ៕
ចែករំលែកព័តមាននេះ