រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ផ្តាំផ្ញើដល់មន្ត្រីដែលទទួលជ័យលាភីក៏ដូចជាមន្ត្រីស្ថាប័ននានាបានយល់ថា តើទៅមុខត្រូវធ្វើអ្វីជាអាទិភាព…?
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ផ្តាំផ្ញើដល់មន្ត្រីដែលទទួលជ័យលាភីក៏ដូចជាមន្ត្រីស្ថាប័ននានាបានយល់ថា តើទៅមុខត្រូវធ្វើអ្វីជាអាទិភាព…? គឺមានបញ្ហាច្រើនណាស់ជាសំណុំបញ្ហានៅក្នុងយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាលក្នុងអាណត្តិទី៥នៃរដ្ឋសភា ដែលទាមទារត្រូវធ្វើកំណែទម្រង់ទូលំទូលាយ និងស៊ីជម្រៅ ។
សម្តេចតេជោនាយករដ្ឋមន្ត្រីបានមានប្រសាសន៍បែបនេះ នាព្រឹកថ្ងៃទី១៧ កុម្ភៈ នៅវិទ្យាស្ថានជាតិអប់រំ ក្នុងឱកាសអញ្ជើញជាអធិបតីភាពក្នុងពិធីប្រគល់សញ្ញាបត្រដល់សិស្ស មន្ត្រីជាន់ខ្ពស់ជំនាន់កំណែទម្រង់ សិស្ស មន្ត្រី ក្រមការជំនាន់ភក្តីភាព និងប្រគល់វិញ្ញាបនបត្រដល់កម្មសិក្សាការីឆ្នាំ២០១៣ និងបើកវគ្គបណ្តុះបណ្តាលឆ្នាំ២០១៤ របស់សាលាភូមិន្ទរដ្ឋបាលនៃក្រសួងមុខងារសាធារណៈ ។ ពាក់ព័ន្ធនឹងបញ្ហាខាងលើ សម្តេចតេជោនាយករដ្ឋមន្ត្រីគូសបញ្ជាក់ថា ក្នុងនោះមានផ្នែករដ្ឋបាលសាធារណៈ ។ រដ្ឋបាលសាធារណៈនេះ គឺជំរុញនៅក្នុងការកែទម្រង់ដោយបង្កើតឱ្យមានក្រសួងមុខងារសាធារណៈ គឺដើម្បីធានាធ្វើយ៉ាងម៉េចឱ្យរដ្ឋបាលសាធារណៈនេះក្លាយទៅជាអ្នកផ្តល់សេវាសាធារណៈ ដែលមានប្រសិទ្ធភាពបំផុត ។ ទាក់ទិនជាមួយនឹងការសម្រេចគោលដៅបានឬមិនបាន សម្តេចតេជោមានប្រសាសន៍សង្កត់ធ្ងន់ថា គឺទាមទារនូវការរៀបចំនូវកិច្ចការជំហានដើរសម្រាប់រយៈពេលវែង ជំហានដើរសម្រាប់រយៈពេលមធ្យម និងជំហានដើរសម្រាប់រយៈពេលខ្លី …។ សម្តេចតេជោនាយករដ្ឋមន្ត្រីបញ្ជាក់ថា ៖
ចំណុចទី១-បន្តដំណើរការជាធម្មតានៃស្ថាប័នរដ្ឋ ដែលធ្លាប់បានបញ្ជាក់ជាច្រើនលើកកន្លងរួចមកហើយ ទាំងស្ថាប័ននីតិប្បញ្ញត្តិ ទាំងស្ថាប័ននីតិប្រតិបត្តិ ទាំងស្ថាប័នតុលាការ ។ ឥឡូវគឺមានប្រក្រតីកម្មទៅហើយ គ្មានអ្វីទេ ….។ កុំខ្វល់ថាអ្នកណាគេមកឬមិនមក អត់ខ្វល់អ្វីទាំងអស់ ការពិតគឺវាដូច្នេះ ។ ការពិតកាលពីបុណ្យមាឃបូជាកន្លងទៅ ទាំងគ្រហស្ថ ទាំងព្រះសង្ឃគឺបានប្រារព្ធពិធីបុណ្យដោយសុវត្ថិភាព ដូច្នេះគឺវាប្រក្រតីកម្មទៅហើយ ដំណើរការធម្មតាទៅហើយ ។ ដូច្នេះអំណាចទាំងអស់របស់រដ្ឋ នីតិប្បញ្ញត្តិ នីតិប្រតិបត្តិ និងតុលាការ ត្រូវតែដំណើរការធម្មតា កុំខ្វល់ពីរឿងស្អី ជាប់គាំង ឬមិនជាប់គាំង ។ ចំណុចទី២-រក្សាស្ថិរភាពនយោបាយ សន្តិសុខសណ្តាប់ធ្នាប់សង្គម ។ នេះជាបញ្ហាសំខាន់ គ្មានប្រទេសណាមួយអភិវឌ្ឍន៍ទៅរួចក្នុងស្ថានភាពនោះទេ ។ ដូច្នេះការរក្សាស្ថិរភាពនយោបាយ សណ្តាប់ធ្នាប់សង្គម គឺត្រូវមានការចូលរួមការអនុវត្តច្បាប់ផង និងការចូលរួមរបស់ប្រជាជនផង ។ កិច្ចការដែលកំពុងធ្វើដំណើរនេះ ប្រជាជនត្រូវការសេចក្តីសុខ សប្បាយ មិនមែនត្រូវការស្ទះចរាចរណ៍តាមអំពើផ្សេងៗទេ ។ ដូច្នេះគឺត្រូវការពារប្រជាពលរដ្ឋ ការពារប្រទេស ការពារភាពសុខសាន្តរបស់ប្រជាពលរដ្ឋ ។ ស្ថិរភាពនយោបាយ សន្តិសុខ សណ្តាប់ធ្នាប់សង្គមត្រូវតែធានាតាមរយៈការអនុវត្តច្បាប់និងការចូលរួមរបស់ប្រជាជនផង ។ អ្នកបំផ្លាញសន្តិសុខត្រូវទទួលខុសត្រូវចំពោះមុខច្បាប់ ។
ចំណុចទី៣-រក្សាស្ថិរភាពម៉ាក្រូសេដ្ឋកិច្ច ទប់ស្កាត់អតិផរណា និងជំរុញកំណើនសេដ្ឋកិច្ច ។ ស្ថិរភាពនយោបាយមិនអាចរក្សារយៈពេលវែងនៅពេលដែលម៉ាក្រូសេដ្ឋកិច្ចមិនត្រូវបានធានានោះទេ ។ ត្រូវជំរុញផលិតកម្មគ្រប់ផ្នែក ទាំងកសិកម្ម ទាំងឧស្សាហកម្ម និងសេវា ដើម្បីជំរុញកំណើនសេដ្ឋកិច្ចឱ្យលើសពី៧% ។ តាមរបាយការណ៍របស់ក្រសួងកសិកម្ម ស្រូវប្រាំងឆ្នាំនេះសម្រេចបានលើសផែនការ១១១% ។ ការជំរុញបង្កើនចំណូល និងធ្វើវិចារណកម្មចំណាយ ដើម្បីធានាឱ្យម៉ាក្រូសេដ្ឋកិច្ចនៅរក្សាបានល្អ ។ គ្រាប់បែកអាចសម្លាប់មនុស្សបានតែមួយចំនួនណានោះទេ ប៉ុន្តែបើគ្រាប់បែកសេដ្ឋកិច្ចវិញ បើម៉ាក្រូសេដ្ឋកិច្ចបែកហើយ គឺបំផ្លាញមនុស្សទាំងអស់ ។ ដូច្នេះ ការប្រុងប្រយ័ត្ននៅក្នុងការគ្រប់គ្រងម៉ាក្រូសេដ្ឋកិច្ចនេះគឺត្រូវឱ្យច្បាស់លាស់ ។ គ្មានការចំណាយណាមួយ ដែលវាទៅផុតពីថវិកាដែលអាចរកបាននោះទេ ការសន្យាខ្យល់ប៉ុណ្ណេះ ប៉ុណ្ណោះ ប៉ុន្តែស៊ីសងគឺវាអត់លុយ ។ រឿងនេះសំខាន់ណាស់ ប្រទេសមួយនៅក្នុងក្របខណ្ឌថវិកា ក្បាលចេញនិងក្បាលចូល យ៉ាងហោចបំផុតត្រូវឱ្យមានភាពស្មើគ្នា គឺវាល្អ ទំហំចំណាយឱ្យស្មើនឹងទំហំចំណូល ហើយល្អទៅទៀត បើសិនជាមានអតិរេកខ្លះ ។
ផ្ទុយទៅវិញរកបាន១០០ ចំណាយ៣០០ តើត្រូវដោះស្រាយរបៀបមេ៉ច ? លើពិភពលោកគ្មានប្រទេសណាគេឱ្យខ្ចី សម្រាប់បើកប្រាក់ខែទេ ហើយជំនួយរបស់គេ ក៏គេមិនផ្តល់សម្រាប់បើកប្រាក់ខែដែរ និងក៏អត់មានអ្នកណាគេឱ្យខ្ចីដែរ ។ សម្តេចមានប្រសាសន៍ថា វិធីសល់ជម្រើសមានតែពីរទេ ខ្ចីគេលែងបាន កាត់មន្ត្រីចោលពាក់កណ្តាល ដើម្បីឱ្យស្របជាមួយប្រាក់ខែ ឬកាត់២/៣ចោល ។ ដូច្នេះសម្ពាធអត់ការងារធ្វើគឺកាន់តែកើន ឬមួយបោះពុម្ពក្រដាស ប្រាក់ដើម្បីយកមកបើកប្រាក់ខែ ។ គ្រោះថ្នាក់ណាស់រឿងបោះលុយបន្ថែម រាជរដ្ឋាភិបាលមិនអនុវត្តទេ ។ ទាក់ទិនទៅនឹងការបើកប្រាក់ខែមន្ត្រីរាជការ សម្តេចតេជោនាយករដ្ឋមន្ត្រីសង្កត់ធ្ងន់ថា ចាប់ពីពេលនេះទៅការបើកប្រាក់ខែរបស់មន្ត្រីរាជការកំណត់ឱ្យរដ្ឋមន្ត្រីរបស់ក្រសួង ស្ថាប័នត្រូវមានការទទួលខុសត្រូវ ។ អ្នកនាំមុខគឺក្រសួងមុខងារសាធារណៈនិងក្រសួងសេដ្ឋកិច្ចនិងហិរញ្ញវត្ថុ បន្ទាប់ទៅបញ្ជូនឯកសារត្រូវចុះហត្ថលេខា រដ្ឋមន្ត្រី បើរដ្ឋមន្ត្រីមិននៅត្រូវផ្ទេរសិទ្ធិឱ្យស្តីទីចុះហត្ថលេខាដើម្បីឱ្យដឹងថា ប្រាក់ខែរបស់មន្ត្រីរាជការដាច់ខែត្រូវបើកឱ្យបានតែម្តង ។ ដើម្បីកុំឱ្យវែកចក នេះគឺជាផ្នែកមួយនៃកំណែទម្រង់ដែលទាក់ទងទៅនឹងជីវភាពមន្ត្រីរាជការជាមួយនឹងបញ្ហាការគ្រប់គ្រងកែទម្រង់ហិរញ្ញវត្ថុសាធារណៈ ។
សម្តេចមានប្រសាសន៍ទៀតថា មន្ត្រីរាជការបណ្តា ក្រសួងស្ថាប័ននានា បើសិនជាប្រាក់ខែក្របើកនៅយូរ សូមឱ្យចុះប្រកាសតាមកាសែតទៅថារដ្ឋមន្ត្រីក្រសួងរបស់ខ្ញុំគាត់អាងថាគាត់ឆ្អែតហើយគាត់អត់គិតដល់មន្ត្រី រាជការតូចតាចដែលមានប្រាក់ខែតិច ។ ទាក់ទិននឹងការបើកប្រាក់ខែនេះដែរ សម្តេចតេជោ នាយករដ្ឋមន្ត្រីបញ្ជាក់ថា ថ្ងៃក្រោយ រាជរដ្ឋាភិបាល នឹងជំរុញឱ្យមន្ត្រីរាជការទាំងអស់ បើកប្រាក់ខែនៅតាមធនាគារទាំងអស់ចៀសវាងកាត់អ្វីផ្សេងៗ បើបើកតាមធនាគារខ្មោចវាអត់ចេះមកបើកប្រាក់ខែទេ ដូច្នេះមិនចាំបាច់ស្វែងរកមន្ត្រីខ្មោច ទាហានខោ្មច ប៉ូលិសខ្មោច …ខ្មោចអត់កាន់កូនសៀវភៅទៅទេ ត្រូវកំណែទម្រង់ ។ ចំណុចទី៤- ប្រក្រតីកម្មជីវភាពសង្គមសេដ្ឋកិច្ចរបស់ប្រជាជន នៅពេលក្រោយទឹកជំនន់វាយប្រហារនៅឆ្នាំ២០១៣ រាជរដ្ឋាភិបាលបានខិតខំធ្វើជូនប្រជាពលរដ្ឋ ឥឡូវនេះបណ្តាហេដ្ឋារចនាសម្ព័ន្ធកំពុងស្តារ ប្រឡាយទឹក ផ្លូវថ្នល់បាក់បែក ។ សម្រាប់ជីវភាពប្រជាជនត្រូវយកចិត្តទុកដាក់ជួយប្រជាជន ដែលជួបការលំបាក ជួយជំរុញការបង្កបង្កើនផល ប្រជាជននៅតំបន់ជួបប្រទះទឹកជំនន់ឆ្នាំកន្លងទៅត្រូវយកចិត្តទុកដាក់តាមមើលឱ្យដិតដល់ ។
ចំណុចទី៥-យកចិត្តទុកដាក់ដល់ជីវភាពមន្ត្រីរាជការ កងកម្លាំងប្រដាប់អាវុធ ក៏ដូចជាកម្មករ ក្នុងនោះពិនិត្យបញ្ហាទាក់ទិននឹងការដំឡើងបៀវត្សរ៍ឱ្យវាស្របទៅតាមសេដ្ឋកិច្ច និងថវិកាដែលអាចទ្រទ្រង់បាន ។ រាជរដ្ឋាភិបាលកំពុងឱ្យពិនិត្យមើលតទៅទៀត ដោយមិនចាំបាច់រង់ចាំដល់ឆ្នាំក្រោយទេ ។ ផ្នែកកម្មករក៏ដូច្នេះដែរ បង្កើតគណៈកម្មការមួយរបស់ខាងរាជរដ្ឋាភិបាលដឹកនាំដោយលោកឧបនាយករដ្ឋមន្ត្រីប្រចាំការ ដើម្បីស្រាវជ្រាវពិនិត្យមើលអំពីបញ្ហាកម្មករ ។ សម្រាប់មន្ត្រីរាជការ រាជរដ្ឋាភិបាលកំពុងរៀបចំប្រព័ន្ធបៀវត្សរ៍មួយ ហើយក៏ពិនិត្យមើលនូវលទ្ធភាពខាងថវិកា ។ ការពិតចំណាយមកដល់ពេលនេះរហូតដល់៤៥% នៃចំណាយចរន្ត ទៅហើយ ដែលស្មើនឹង៤,៥%នៃផលិតផលក្នុងស្រុកសរុប ក្នុងពេលដែលដាក់ឱ្យត្រូវចំណាយបុគ្គលិកត្រឹមតែ៤%នៃចំណាយចរន្ត ។ ប៉ុន្តែបានចាយលើស ។ ចំណុចទី៦ -ជំរុញការកែទម្រង់គ្រប់ផ្នែក គ្រប់វិស័យឱ្យបានទូលំទូលាយ ស៊ីជម្រៅនិងមានប្រសិទ្ធភាពតាមគោលនយោបាយ ដែលមានស្រាប់ ។ អ្វីដែលបានលើកពីខាងលើគឺវាទាក់ទងទៅនឹងកំណែទម្រង់ហើយ រាប់ទាំងការបើកប្រាក់ខែក៏ជាផ្នែកមួយនៃការកែទម្រង់ដែរ ដើម្បីបម្រើឱ្យចំគោលដៅចំពោះជីវភាពរបស់មន្ត្រីរាជការ កងកម្លាំងប្រដាប់អាវុធ ដែលពីមុនមានលឿន មានយឺតផង បើលឿនវាមិនអីទេ ប៉ុន្តែវាពិបាកត្រង់មានការយឺតយា៉វ ។ មន្ត្រីរាជការតូចតាចគ្នាមានការលំបាក ប្រាក់ខែវាតិចហើយវាយូរទៀត ។ សម្តេចតេជោនាយករដ្ឋមន្ត្រីបានផ្តាំផ្ញើចំពោះបញ្ហាមួយចំនួន បើធ្វើមន្ត្រីគឺជាអ្នកបម្រើប្រជាជន មិនមែនធ្វើចៅហ្វាយប្រជាជនទេ ត្រូវចាំឱ្យច្បាស់ត្រង់កន្លែងនេះ កុំភ្លាមឡើងចូលកាន់ការិយាល័យហើយថា អញជាចៅហ្វាយប្រជាជន គឺពុំមែនដូច្នោះទេ ។ យើងជាអ្នកផ្តល់សេវាឱ្យពួកគាត់ មិនមែនទៅធ្វើចៅហ្វាយគាត់ទេ ដូចពាក្យចាស់លោកថាអត់ខុសទេ «ឱនដាក់គ្រាប់ ងើយស្កក» ។
ចំណុចនេះជាគុណធម៌ សីលធម៌ របស់មន្ត្រីយើងដែលត្រូវយកចិត្តទុកដាក់ គ្មានអ្នកណាទទួលបានការស្រឡាញ់ពីអ្នកដទៃនៅពេលដែលខ្លួនធ្វើឫកឆ្មើងកន្ទ្រើងនោះទេ អត់ទេ…។ កុំថាឡើយគ្រហស្ថ សូម្បីតែព្រះសង្ឃក៏គេមិនថ្វាយបង្គំដែរ គេខ្ជិលតែម្តង គេគេច ។ ត្រូវតែខំធ្វើមន្ត្រីជើងពីរ កុំធ្វើមន្ត្រីជើង១០ បើធ្វើមន្ត្រីជើង១០ហើយ សុខទុក្ខរបស់ប្រជាពលរដ្ឋលែងដឹងហើយ ។ នេះជាចំណុចដែលមន្ត្រីគ្រប់រូប មិនថាថ្នាក់ណាទេ ត្រូវតែស្វែងយល់ឱ្យបាននូវសុខទុក្ខរបស់ប្រជាពលរដ្ឋ ។ ទាក់ទិនទៅនឹងបុគ្គលដែលទារភាសីុនៅតាមផ្សារនានា ក្នុងក្រុងក៏ដូចតាមបណ្តាខេត្ត សម្តេចតេជោនាយករដ្ឋមន្ត្រី បានឱ្យលោកអភិបាលរាជធានីភ្នំពេញកោះប្រជុំអ្នកដែលទទួលបានក្នុងការទារភាសីុផ្សារឱ្យបានត្រឹមត្រូវ ។ កន្លងមកមានបាតុភាពអាក្រក់យា៉ងខ្លាំងចំពោះអត្តចរិត បុគ្គលដែលទារលុយភាសីុ បានសម្តែងចរិតទាត់កញ្ច្រែងប្រជាជនដែលទៅលក់ពុំទាន់មានលុយបង់ដោយប្រើពាក្យប្រមាថលើប្រជាពលរដ្ឋ ។ សម្តេចតេជោបានបញ្ជាឱ្យលោក ប៉ា សុជាតិវង្ស ធ្វើការឱ្យបានហ្មត់ចត់ទៅលើបុគ្គលក៏ដូចជាមានការអប់រំដល់ម្ចាស់ដែលដេញថ្លៃភាសីុបានតាមផ្សារនីមួយៗ ។ ឮចេញពីផ្សារគ្រប់ផ្សារ អ្នកលក់ដូរក៏ថ្ងូរ អ្នកទៅទិញទំនិញប៉ះពាល់ គេមិនថាអ្នកដេញភាសីុទេ… ស្អីក៏គេថា នាយករដ្ឋមន្ត្រី ស្អី ហ៊ុន សែន ទៀត- តុលាការកាត់ក្តីអយុត្តិធម៌ ហ៊ុន សែន ទៀត… ។ ក្នុងពេលអំណាចតុលាការគេឯករាជ្យរបស់គេ ។ សូមលោកអភិបាលរាជធានីតាមមើលផង កុំឱ្យអ្នកដែលបានទទួលដេញភាស៊ីទៅធ្វើផ្តេសផ្តាស ឱ្យមើលត្រង់ហ្នឹងផង ។ មានផ្សារខ្លះធ្វើឱ្យទាំងស្រុង ប៉ុន្តែឥរិយាបថអ្នកដែលយកភាស៊ី ឱ្យវាល្អមើលផង ។
សម្តេចតេជោនាយករដ្ឋមន្ត្រីបញ្ជាក់ថា ខ្មែរយើងមានពាក្យជាប់គ្នា ទទួលខុសត្រូវ គឺខ្មែរទទួលទាំងខុសផង ទាំងត្រូវផង ។ ឥរិយាបថជាមន្ត្រីមិនល្អទេ បើសិនទទួលយកតែខាងត្រូវ ចំណែកខុសមិនទទួលយក ឆ្លើយដាក់អ្នកដទៃនោះ រាប់តាំងពីគោលនយោបាយដែលរាជរដ្ឋាភិបាលបានដាក់ចេញ ។ ជួនកាលគោលនយោបាយដែលដាក់ចេញទៅ វាអត់ស្របនឹងសភាពការណ៍មូលដ្ឋាន ដូចជាបញ្ហាឡូត៍នេសាទ ខំកាត់អស់៥៦% រួចនៅសល់បន្តិច ហើយនៅសល់នោះមានបញ្ហាទៀត ។ ដូច្នេះដើម្បីឱ្យវាស្របជាមួយនឹងសភាពការណ៍ដែលបច្ចុប្បន្នទឹករាក់ត្រីតិច មនុស្សច្រើន ។ កាលពីពេលមុនឆ្នាំ១៩០៨ ព្រះបាទស៊ីសុវត្ថិបានដាក់ចេញ តាមរយៈព្រះរាជក្រឹត្យអំពីឡូត៍នេសាទ ប៉ុន្តែដំណាក់កាលនោះប្រជាជនតិច ទឹកជ្រៅ ត្រីច្រើន ។ មកដល់ឆ្នាំ២០១២ ថ្ងៃទី៨ ខែមីនា ខ្ញុំប្រកាសលុបឡូត៍នេសាទចោលទាំងអស់ ព្រោះដំណាក់កាលនេះមិនអាចទុកឡូត៍នេសាទបានតទៅទៀតទេ ទឹករាក់ត្រីតិច មនុស្សច្រើន ។ ជម្លោះអ្នកធ្វើស្រែប្រាំង និងអ្នកនេសាទ វិធីល្អគឺប្រគល់ឡូត៍នេសាទជូនប្រជាជនតែម្តង ។ តំបន់អភិរក្សមួយចំនួនត្រូវទុក ។ ដូច្នេះសូម្បីតែនយោបាយរបស់រដ្ឋ ក៏ត្រូវកែដែរ មិនមែនដាក់ទៅត្រូវទាំងអស់នោះទេ ។
មួយទៀតពាក្យខ្មែរថា «រួមសុខ រួមទុក្ខ» សូមមន្ត្រីទាំងអស់ចងចាំ កុំរួមតែសុខ ដល់ពេលទុក្ខរត់ចោលគេ ។ អ្នកខ្លះពូកែណាស់ ស៊ូស្លាប់ជាមួយគ្នា ក៏ប៉ុន្តែមិនស៊ូងាប់ជាមួយគ្នាទេ ។ បើរួមសុខរួមទុក្ខជាមួយគ្នា បើពេលណាលំបាកគឺ ត្រូវនៅជាមួយគ្នា ពេលណាស្រួលក៏នៅជាមួយ នេះជាចំណុចជួយរំឭក ។ ក្នុងសុន្ទរកថាស្វាគមន៍ លោក ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈ បានមានប្រសាសន៍ថា សាលាភូមិន្ទរដ្ឋបាលធ្វើទំនើបកម្មជាប្រចាំកម្មវិធីបណ្តុះបណ្តាល និងអភិវឌ្ឍន៍សមត្ថភាព និងបង្កើនគុណភាពដល់មន្ត្រី-សិស្ស តាមរយៈការពង្រឹងការគោរពវិន័យបានល្អនៅក្នុងសាលា ដែលទង្វើនេះអាចជួយបង្កើនទម្លាប់ល្អពេលបម្រើការងារប្រកបដោយភាពថ្លៃថ្នូរនិងមានសីលធម៌វិជ្ជាជីវៈ ។ នេះក៏ជាការឆ្លើយតបទៅនឹងតម្រូវការចាំបាច់នៃការវិវត្តរបស់បេកកសកម្មផ្ដល់សេវាសាធារណៈនិងស្របទៅតាមលក្ខខណ្ឌតម្រូវនៃការធ្វើទំនើបកម្មមុខងារសាធារណៈនិងទំនើបកម្មរដ្ឋ ។ លោករដ្ឋមន្ត្រីបន្តថា សាលាបានបញ្ចូលមុខវិជ្ជានិងវិធីសាស្ត្រគរុកោសល្យថ្មីដូចជា ករណីសិក្សាដែលសង្កត់ធ្ងន់លើការងារអនុវត្តជាក់ស្ដែងពាក់ព័ន្ធនឹងគោលនយោបាយសាធារណៈនិងកិច្ចការរដ្ឋបាល ហើយបញ្ចូលចំណេះដឹងខាងទ្រឹស្ដីនៅក្នុងតថភាពនៃសកម្មភាពស្ថាប័ន ។
វិធីសាសាស្ត្រគរុកោសល្យថ្មីនេះ ក៏រួមបញ្ចូលផងដែរនូវកម្មវិធីសិក្ខាសាលា សន្និសីទ និងទស្សនកិច្ចសិក្សា ដែលភ្ជាប់ទ្រឹស្ដីជាមួយការអនុវត្តជាក់ស្ដែង ។ ទន្ទឹមនឹងកិច្ចប្រឹងប្រែងធ្វើទំនើបកម្មបណ្ដុះបណ្ដាលឱ្យឆ្លើយតបទៅនឹងបរិការណ៍កម្ពុជានេះ សាលាភូមិរដ្ឋបាលបានពង្រឹងនិងអភិវឌ្ឍន៍ផងដែរ នូវកិច្ចសហប្រតិបត្តិការបច្ចេកទេស និងគរុកោសល្យជាមួយស្ថាប័នក្នុងស្រុកនិងបរទេស ក្នុងគោលបំណងធ្វើឱ្យលក្ខខណ្ឌបណ្ដុះបណ្ដាលមន្ត្រីរាជការគ្រប់វិស័យទាំងអស់មានលក្ខណៈកាន់តែប្រសើរឡើងជាលំដាប់ពីមួយឆ្នាំទៅមួយឆ្នាំ ។ បន្ទាប់មក សម្ដេចតេជោនាយករដ្ឋមន្ត្រី បានប្រគល់ជូនសញ្ញាបត្រដល់លោកស៊ូ ផល្លី មន្ត្រីជាន់ខ្ពស់ជំនាន់កំណែទម្រង់រដ្ឋ ៕
ចែករំលែកព័តមាននេះ