រាជធានីភ្នំពេញ ៖ សិស្សវិទ្យាល័យឥន្ទ្រទេវីម្នាក់ ត្រូវបាននគរបាលឃាត់ខ្លួន កាលពីថ្ងៃទី១៣ កុម្ភៈ នៅចំណុចភូមិចុងថ្នល់ សង្កាត់ទឹកថ្លា ខណ្ឌសែនសុខ ដោយជាប់ចោទពីបទរំលោ.ភសេពសន្ថវៈលើស្ត្រីម្នាក់មានប្តី និងមានកូនរួចទៅហើយ ដោយទាមទារសំណងជំងឺចិត្តរហូតដល់ទៅ៣.០០០ដុល្លារ ។
រាជធានីភ្នំពេញ ៖ សិស្សវិទ្យាល័យឥន្ទ្រទេវីម្នាក់ ត្រូវបាននគរបាលឃាត់ខ្លួន កាលពីថ្ងៃទី១៣ កុម្ភៈ នៅចំណុចភូមិចុងថ្នល់ សង្កាត់ទឹកថ្លា ខណ្ឌសែនសុខ ដោយជាប់ចោទពីបទរំលោភសេពសន្ថវៈលើស្ត្រីម្នាក់មានប្តី និងមានកូនរួចទៅហើយ ដោយទាមទារសំណងជំងឺចិត្តរហូតដល់ទៅ៣.០០០ដុល្លារ ។ ទោះបីជាបែបណា ជនជាប់ចោទបានបដិសេធថា ខ្លួនមិនបានប្រព្រឹត្តដូចការចោទប្រកាន់របស់ស្ត្រីខាងលើនោះទេ ។
នៅចំពោះមុខអ្នកសារព័ត៌មាន ខណៈពេលដែលនគរបាលព្រហ្មទណ្ឌខណ្ឌសែនសុខ បញ្ជូនខ្លួនទៅសាលាដំបូងរាជធានីភ្នំពេញនោះ យុវជនឈ្មោះ រ៉ែន រតនា អាយុ២០ឆ្នាំ ដែលសព្វថ្ងៃរៀនថ្នាក់ទី១២ នៅវិទ្យាល័យឥន្ទ្រទេវី ក្នុងខណ្ឌទួលគោក និងមានទីលំនៅក្នុងភូមិចុងថ្នល់ សង្កាត់ទឹកថ្លា ខណ្ឌសែនសុខ បានរៀបរាប់ពីដំណើររឿងហួសចិត្តចំពោះស្ត្រីម្នាក់ដែលមានវ័យជាង៣០ឆ្នាំទៅហើយ ព្រមទាំងមានប្តី មានកូនអាយុជាង១០ឆ្នាំទៀតថា នៅវេលាម៉ោងប្រមាណជាង១០យប់ ថ្ងៃទី១៣ កុម្ភៈ ខ្លួនបានចូលទៅក្នុងបន្ទប់ស្ត្រីឈ្មោះ ឡូ សូដាលីស ដែលមានទីលំនៅមុខផ្ទះរបស់ខ្លួន ដើម្បីទៅប្រាប់ថា ខ្លួនមកយកនាឡិកា១គ្រឿងដែលភ្លេចនៅពេលរូបគេមកជួយរៀបចំអីវ៉ាន់មុននេះប្រហែល២ម៉ោងមុន ។ ប៉ុន្តែខណៈចូលទៅក្នុងបន្ទប់ស្ត្រីខាងលើ ក្នុងបំណងប្រាប់ថា ខ្លួនយកនាឡិកាទៅវិញហើយនោះ ចៃដន្យងងឹតមើលមិនឃើញ ដៃរបស់គេទៅប៉ះនឹងភ្លៅស្ត្រីខាងលើ ធ្វើឱ្យស្ត្រីនោះប្រុងស្រែក តែត្រូវរូបគេយកដៃខ្ទប់មាត់កុំឱ្យស្រែក ហើយប្រាប់ថា ខ្លួនគ្រាន់តែដាស់ប្រាប់ថា ខ្លួនមកយកនាឡិកាដែលភ្លេច ។
សិស្សសាលាជាជនជាប់ចោទបញ្ជាក់ទៀតថា ភ្លាមៗនោះ ស្ត្រីជាដើមចោទស្រែករកបងប្អូនឱ្យជួយ និងបានចោទមកលើខ្លួនថា មានបំណងចាប់រំលោភសេពសន្ថវៈទៅវិញ ។ ជាមួយគ្នានេះដែរ តាមការអះអាងរបស់ស្ត្រីឈ្មោះ អុក សុីថា អាយុ៤៥ឆ្នាំ មានប្តីជាកម្មករសំណង់ និងជាម្តាយយុវជនជាប់ចោទ និយាយប្រាប់អ្នកសារព័ត៌មានថា ក្រុមគ្រួសាររបស់គាត់ រាប់អានជាមួយស្ត្រីដើមបណ្តឹងខាងលើជាយូរឆ្នាំមកហើយ តាំងពីកូនប្រុសគាត់នៅតូចៗម៉្លេះ ។ ជាញយដង កូនប្រុសខាងលើ តែងតែទៅជួយរៀបចំអីវ៉ាន់គ្រឿងទេសរបស់ស្ត្រីដើមបណ្តឹងរាល់យប់ និងចេញចូលរាប់អានគ្នាដូចសាច់ញាតិ ។
ទោះបីជាបែបណា ដោយសារតែនគរបាលឃាត់ខ្លួនកូនប្រុសគាត់តាមពាក្យបណ្តឹងស្ត្រីខាងលើ គាត់បានសុំសម្របសម្រួលដោយសងជំងឺចិត្តចំនួន២លានរៀល ដោយស្ត្រីនោះរៀបនឹងយកទៅហើយ ស្រាប់តែក្រោយមក បែរជាមិនយកវិញ ដោយទាមទារសំណងជំងឺចិត្ត៣.០០០ដុល្លារ ៕
ចែករំលែកព័តមាននេះ