យោងទៅតាមសេចក្តីរាយការណ៍ជាច្រើនពីសារព័ត៌មាននានាបានឲ្យដឹងថា ថ្នាំងងុយគេងមានជាប់ទាក់ទងនឹងការប្រឈមកាន់តែខ្ពស់នឹងការស្លាប់។ រឿងនេះបានមកពីការសិក្សាដ៏ធំមួយរបស់អាមេរិកដែលបានធ្វើការប្រៀបធៀបលើឯកសារជំងឺរបស់អ្នកជំងឺច្រើនជាង ១០០០០នាក់ដែលកំពុងតែប្រើថ្នាំងងុយគេង និងអ្នកជំងឺ ២៣០០០នាក់ផ្សេងទៀតដែលមិនធ្លាប់ប្រៀប។
ពួកគេទាំងអស់នោះត្រូវបានគេតាមដានសុខភាពជាមធ្យម ២,៥ឆ្នាំ និងបានរកឃើញថា អ្នកដែលលេបថ្នាំងងុយគេង ទោះបីជាក្នុងកម្រិតទាបបំផុត (ច្រើនជាង ១៣២គ្រាប់ក្នុងមួយឆ្នាំ) ទំនងជាងាយនឹងកើតជំងឺមហារីកគ្រប់ប្រភេទ។
ថ្វីបើទំនាក់ទំនងគួរឲ្យកត់សម្គាល់នេះត្រូវបានគេរកឃើញហើយក៏ដោយ តែអ្វីដែលសំខាន់បំផុតដែលត្រូវកត់សម្គាល់នោះគឺថា ការសិក្សានេះមិនអាចប្រាប់យើងបានថា ថ្នាំងងុយគេងខ្លួនឯនោះបង្កជាការស្លាប់ និងមហារីកខ្ពស់ដោយផ្ទាល់នោះទេ។ នេះដោយសារតែ ទាំងថ្នាំ និងការប្រឈមនឹងការស្លាប់អាចជាប់ទាក់ទងនឹងកត្តាផ្សេងៗទៀតដូចជា របៀបរស់នៅ គ្រឿងស្រវឹង ឬការជក់បារី ដែលអ្នកស្រាវជ្រាវមិនអាចទាត់ចោលបាន។
ការស្រាវជ្រាវនេះបានបង្កើននូវបញ្ហាដ៏សំខាន់មួយដែលត្រូវការបន្ថែមការស្រាវជ្រូវបន្តទៀត ព្រោះត្រឹមតែការសិក្សានេះតែមួយមុខមិនអាចបង្ហាញច្បាស់ថា ថ្នាំងងុយគេងធ្វើឲ្យប្រឈមកាន់តែខ្លាំងនឹងការស្លាប់ ឬមហារីកឡើយ ព្រោះតែវាមានការសិក្សាត្រឹមរយៈពេលខ្លី និងស្ថិតក្នុងកាលៈទេសៈពិសេសៗតែប៉ុណ្ណោះ (ប្រភពពី៖ Health.com.kh)៕ (កែសម្រួលដោយ ៖ បុប្ផា)
ចែករំលែកព័តមាននេះ