មូលអង្កាមច្រើនរស់នៅតាមទឹកលូនិងទឹកសម្អុយនានា ។ យើងអាចសម្គាល់មូសប្រភេទនេះបានតាមរយៈពណ៌សម្បុររបស់វា ក្រមៅ ហើយមិនមានក្រឡាបង្កង់ឆ្នូតសខ្មៅដូចជាមូសខ្លានោះទេ ។ មូសប្រភេទនេះបើវាខាំហើយធ្វើឱ្យផលប៉ះពាល់ដល់សុខភាពបង្កជាជំងឺផ្សេងៗនិងរំខានដល់ជីវិតរស់នៅប្រចាំថ្ងៃ ពិសេសរំខានដល់ដំណេក។ ជួបជាមួយលោកង៉ាន់ ចាន់ថា ប្រធានកម្មវិធីជាតិប្រយុទ្ធជំងឺគ្រុនឈាមប្រាប់កោះសន្តិភាពឱ្យដឹងថា មូសអង្កាមបានផ្តល់ផលប៉ះពាល់មួយចំនួនដូចខាងក្រោម៖
១-ខាំមានការឈឺចាប់ និងរមាស់អាចបង្កទៅជាដំបៅ ។
២-នៅពេលលោកអ្នកសម្រាកមូសទាំងនេះមកយំរំខានមិនឱ្យគេងបានស្រួលនោះទេ ។
៣-នៅទ្វីបអាហ្វ្រិក មូសអង្កាមបានបង្កឱ្យមានបញ្ហាយ៉ាងធ្ងន់ធ្ងរកាលណាវាខាំហើយអាចធ្វើឱ្យលោកអ្នកកើតមានបញ្ហាដូចជាធ្វើឱ្យដៃ-ជើងរីកធំ ប្រដាប់បន្តពូជរីកធំ ហើយវែងខុសពីលក្ខណៈធម្មជាតិ ។ ប៉ុន្តែក្នុងប្រទេសកម្ពុជា នៅមិនទាន់មានអ្នកណាកើតជំងឺប្រភេទនេះទេ តែក៏ត្រូវមានវិធានការការពារផងដែរ ដើម្បីចៀសផុតអំពីបញ្ហានេះ ។ សូមបញ្ជាក់ថា ជំងឺប្រភេទនេះមិនមែនមូសអង្កាមខាំភ្លាមកើតមានបញ្ហានោះភ្លាមទេ ទាល់តែមេរោគនេះវិវឌ្ឍន៍នៅក្នុងខ្លួនមនុស្សយើងចាប់ពី១០ទៅ២០ឆ្នាំទើបកើតមានជំងឺនេះ ។
មូលហេតុដែលនាំឱ្យកើតមានមូសអង្កាមនេះ អាចពាក់ព័ន្ធទៅនឹងកត្តាបោះចោលសំរាមនៅក្នុងលូទឹកស្អុយធ្វើឱ្យកកស្ទះ ដែលមិនអាចឱ្យទឹកហូរចេញបាន ឬទឹកដក់ក្នុងវត្ថុផ្សេងបង្កើតជាដង្កូវទឹកវិវឌ្ឍន៍ទៅរកកំណើតមូសនេះ ។ មិនចេះអនាម័យផ្ទះសម្បែង ដោយទុកសម្បកកង់ សម្បកដូងចោល ។ មិនបានកាយសំរាមនៅក្នុងប្រព័ន្ធបង្ហូរទឹក ឬកាយដីលុបថ្លុកដែលអាចដក់ទឹកបាន ។ ទាំងអស់នេះសុទ្ធតែជាជម្រកបង្កកំណើតឱ្យមូសយ៉ាងងាយស្រួល ។
លោកង៉ាន់ ចាន់ថា បានបន្តថា ដើម្បីទប់ស្តាត់កុំឱ្យកើតមានបញ្ហាដូចដែលបានរៀបរាប់ខាងលើនេះ ត្រូវមានវិធានការការពារ កុំឱ្យកើតមានមូសអង្កាមទាំងនេះ ដោយរៀបចំផ្ទះសម្បែងឱ្យបានផ្ទះស្អាត មិនត្រូវយកសំរាមទៅចាក់ចោលនៅតាមប្រឡាយទឹក ឬនៅតាមលូនោះទេ សំអាតនៅតាមប្រឡាយឬលូរ ធ្វើយ៉ាងណាឱ្យទឹកហូរមានចរន្តផ្លាស់ប្តូរ ។ មូសអង្កាមអាចហើរបានរាប់រយគីឡូម៉ែត្រ ខុសពីមូសខ្លាហើរបានតែ២០០ទៅ៣០០គីឡូម៉ែត្រប៉ុណ្ណោះ ។ ដូច្នេះគប្បីរស់នៅប្រកបដោយអនាម័យល្អ ។ អាជ្ញាធរដែនដីមានតួនាទីសំខាន់ខ្លាំងណាស់ ក្នុងការចុះត្រួតពិនិត្យនៅតាមប្រព័ន្ធលូនានា ដើម្បីការពារកុំឱ្យមានទឹកស្ទះ ឬមានសំរាមកកស្ទះ កាលណាបើប្រឡាយលូស្អាតទឹកមិនស្ទះដង្កូវទឹកក៏មិនមាន និងអាចកាត់បន្ថយកំណកំណើតមូសបានជាអតិបរិមា ។
សូមបញ្ជាក់ថា មូសអង្កាមច្រើនតែកើតមាននៅរដូវប្រាំង ហើយរដូវធ្លាក់ខ្យល់មិនសូវជាមាននោះទេ តែបើផុតពីរដូវធ្លាក់ខ្យល់មូសអង្កាមអាចកើតមានកាន់តែច្រើនឡើង មិនមែនតែក្នុងរាជធានីភ្នំពេញទេ ដែលសម្បូរមូសអង្កាម ទោះជានៅតាមបណ្តាខេត្តនានា ក៏មានច្រើនណាស់ដែរ ។
លោកប្រធានកម្មវិធីជាតិប្រយុទ្ធជំងឺគ្រុនឈាមបានបញ្ជាក់ថា បច្ចុប្បន្នក្រសួងសុខាភិបាលកំពុងតែមានក្តីបារម្ភយ៉ាងខ្លាំង អំពីការកើនឡើងនៃមូសអង្កាមនេះ ព្រោះខា្លចកើតមានបញ្ហាដូចជានៅទ្វិបអាហ្វ្រិកជាក់ស្តែងដូចករណីជំងឺឈឺគុនហ្គុយ៉ាង (ជំងឺឈិក) ធ្លាប់បានកើតមានម្តងរួចមកហើយកាលពីឆ្នាំ១៩៦១ ប៉ុន្តែក៏បាត់ទៅវិញរហូតមកដល់ឆ្នាំ២០១១ ដល់២០១៣ ស្រាប់តែផ្ទុះឡើងវិញសាជាថ្មីម្តងទៀត ដូច្នេះមានតែយើងទាំងអស់គ្នាជួយកម្ចាត់មូស ដោយរស់នៅមានអនាម័យ ៕
ចែករំលែកព័តមាននេះ