នៅក្នុងការវិភាគវែកញែកពីផលគ្រោះថ្នាក់ជាសាកលដែលមានការចូលរួមពីអ្នកវិទ្យាសាស្ត្រ២៥០នាក់មកពី៤០ប្រទេសធ្វើឡើងកាលពីពេលថ្មីៗនេះ អង្គការសហប្រជាជាតិ (UN)បាននិយាយថា ដល់ឆ្នាំ២០៣០ករណីថ្មីៗនៃជំងឺមហារីកនឹងកើនឡើងពាក់កណ្តាលពោលគឺអាចឈានដល់ ២១,៦លាននាក់ក្នុងមួយឆ្នាំធៀបនឹងឆ្នាំ២០១២ដែលមាន១៤លាននាក់ ។
នៅក្នុងរបាយការណ៍វិភាគដែលចងក្រងដោយភ្នាក់ងារអន្តរជាតិសម្រាប់ការស្រាវជ្រាវពីជំងឺមហារីកហៅកាត់ថា IARCចេញផ្សាយមុនទិវាប្រឆាំងជំងឺមហារីកពិភពលោកបង្ហាញថា អត្រាស្លាប់ដោយជំងឺមហារីកទំនងនឹងកើនពី៨,២លាននាក់ទៅ១៣លាននាក់ក្នុងមួយឆ្នាំៗខណៈចំនួនប្រជាជនក្នុងពិភពលោកកើនឡើងនិងមានវ័យកាន់តែចាស់ ហើយស្របពេលជាមួយគ្នានោះ ពួកគេបានចាប់យកទម្លាប់រស់នៅដ៏ប្រថុយប្រថាន ។
គួរកត់សម្គាល់ថា នេះជាលើកទី១ហើយក្នុងរយៈពេល៦ឆ្នាំកន្លងមកនេះដែល UNបើកឱ្យមានកិច្ចពិភាក្សាវែកញែកពីបញ្ហាសុខភាពជាសាកលបែបនេះ ។
លោកស្រី Magaret Chan អគ្គនាយកអង្គការសុខភាពពិភពលោក (WHO)ដែលមើលការខុសត្រូវលើភ្នាក់ងារ IARCបានថ្លែងថា ផលប៉ះពាល់ជាទូទៅពីជំងឺមហារីកដោយឥតសង្ស័យគឺប៉ះពាល់ខ្លាំងបំផុតទៅលើបណ្តាប្រទេសកំពុងអភិវឌ្ឍន៍ ។
ប្រទេសទាំងនេះកំពុងតែដោះស្រាយភាពក្រីក្រ ពាក់ព័ន្ធនឹងជំងឺមហារីកដែលបង្កដោយរោគឆ្លងឬជំងឺ ។ បន្ថែមពីលើនេះទៀត បែបបទរស់នៅប្រកបដោយភាពស្តុកស្តម្ភ ភាពបរិបូរហូរហៀមានដូចជា ទទួលទានអាហារកំប៉ុង គ្រឿងស្រវឹង ជក់បារី ហាត់ប្រាណបានតិចតួចគឺសុទ្ធតែផ្តល់ផលល្អដល់វត្តមានជំងឺមហារីកគ្រប់ប្រភេទ ។
លោក Christopher Wild នាយកភ្នាក់ងារ IARCបានថ្លែងថា គោលដៅចម្បងគួរតែផ្តោតលើការការពារ ។ លោកបន្តថា ៖«បន្ទុកដ៏ធ្ងន់ធ្ងរបានធ្លាក់ជាពិសេសទៅលើបណ្តាប្រទេសដែលមានប្រាក់ចំណូលទាបនិងមធ្យម ហើយបញ្ហានេះនាំឱ្យយើងពិបាកក្នុងការសម្រេចគោលដៅ
ប្រឆាំងមហារីក ។ សូម្បីក្នុងប្រទេសដែលមានប្រាក់ចំណូលខ្ពស់ក៏នៅតែជួបការលំបាកចំពោះតម្លៃលើការព្យាបាលនិងថែរក្សាផងដែរ» ។
កាលពីឆ្នាំ២០១១ ជំងឺមហារីកបានវ៉ាដាច់ជំងឺបេះដូងលើតារាងចំណាត់ថ្នាក់ជំងឺដែលផ្តាច់ជីវិតមនុស្សបានច្រើនជាងគេ ។
លោក Wildបានបន្ថែមថា ករណីជំងឺមហារីកថ្មីៗទំនងនឹងកើនដល់ ១៩,៣លាននាក់នៅឆ្នាំ២០២៥ជាមួយនឹងអត្រាស្លាប់ប្រមាណ១១,៤លាននាក់ ។ ដល់ឆ្នាំ ២០៣៥ ករណីថ្មីៗនៃជំងឺមហារីកនឹងកើនប្រហែលជា ២៤លាននាក់ក្នុង១ឆ្នាំៗ ។
ចំពោះភេទវិញ របាយការណ៍បានបង្ហាញពីភាពលម្អៀងខ្លះៗដោយករណីកើតមហារីកថ្មីៗ៥៣ភាគរយនិងស្លាប់៥៧ភាគរយគឺជាបុរស ។ សម្រាប់បុរស ជំងឺមហារីកភាគច្រើនបំផុតវាយប្រហារទៅលើសួត (១៦,៧%) ក្រពេញប្រូស្តាត (១៥%) ពោះវៀន (១០%) ក្រពះ(៨,៥%) និងថ្លើម(៧,៥%) ។ ឯស្ត្រីវិញ ជំងឺមហារីកច្រេើនកើតនៅលើសុដន់(២៥,២%) ពោះវៀន (៩,២%) សួត(៨,៧%) ស្បូន(៧,៩%) និងក្រពះ(៤,៨%) ។ ជាង៦០ភាគរយនៃអ្នកកើតមហារីកនិង៧០ភាគរយនៃអ្នកស្លាប់ដោយជំងឺមហារីកគឺស្ថិតក្នុងតំបន់ អាហ្វ្រិក អាស៊ី អាមេរិកកណ្តាលនិងខាងត្បូង ។ យ៉ាងណាក៏ដោយ បើគិតទៅលើសមាមាត្រនៃចំនួនប្រជាជនបណ្តាប្រទេសដែលមានប្រាក់ចំណូលខ្ពស់មានដូចជា អាមេរិកខាងជើង អឺរ៉ុបខាងលិច ជប៉ុន កូរ៉េខាងត្បូង អូស្ត្រាលី និងនូវែលសេឡង់មានតួលេខអ្នកស្លាប់ដោយជំងឺមហារីកខ្ពស់ជាងគេ ។
របាយការណ៍បានបន្តទៀតថា បណ្តាប្រទេសដែលមានឧស្សាហកម្មជឿនលឿនភាគច្រើនកើតមហារីកសុដន់ ពោះវៀន និងក្រពេញប្រូស្តាតខណៈប្រទេសក្រីក្រកើតមហារីកថ្លើម ក្រពះ និងបំពង់អាហារ ។ ជិតពាក់កណ្តាលនៃករណីថ្មីៗដែលគេរកឃើញកាលឆ្នាំ២០១២ គឺស្ថិតក្នុងទ្វីបអាស៊ី ដោយច្រើនជាងគេនៅប្រទេសចិន ។ ឯទ្វីបអឺរ៉ុបមានជិត១/៤ អាមេរិកប្រហែល១/៥ ខណៈអាហ្វ្រិកនិងមជ្ឈិមបូព៌ាមានជាង៨ភាគរយ ។ ប៉ុន្តែបើពិនិត្យលើអត្រានៃការស្លាប់ដោយជំងឺនេះវិញ អាស៊ីបានហក់ឡើងខ្ពស់ជាង៥០ភាគរយ ខណៈអាហ្វ្រិកនិងមជ្ឈិមបូព៌ាមានប្រហែល១០ភាគរយប៉ុណ្ណោះ ។ ចំណែកអាមេរិកមានក្រោម១៦ភាគរយ ខណៈអឺរ៉ុបមាន ២១,៤ភាគរយ ។
របាយការណ៍បានបញ្ជាក់បន្ថែមទៀតថា នៅក្នុងបណ្តាប្រទេសដែលមានការអភិវឌ្ឍតិចតួចជំងឺមហារីកត្រូវបានគេធ្វើរោគវិនិច្ឆ័យឃើញនៅពេលដែលវាវិវឌ្ឍពេញរូបរាង ហើយស្ថិតក្នុងដំណាក់កាលនេះ ការព្យាបាលមិនងាយស្រួលនិងទទួលបានជោគជ័យនោះឡើយ ៕
ចែករំលែកព័តមាននេះ