ស្ត្រីគ្រប់រូបនៅពេលដែលចាប់ផ្តើមពពោះ តាំងមានអារម្មណ៍ភ័យខ្លាចជួបនូវឧប្បត្តិហេតុច្រើន ដូចជាកូនកើតមកមានសុខភាពមិនសូវរឹងមាំ មិនស្រស់ស្អាត មិនសូវឆ្លាត ពិសេសអ្វីដែលជាក្តីកង្វល់ដ៏ខ្លាំងបំផុតនោះ គឺខ្លាចពិបាកសម្រាល កូន ។ កត្តាទាំងអស់នេះហើយ ដែលធ្វើឱ្យស្ត្រីខ្លះកើតវិបត្តិផ្លូវចិត្ត ។
លោកសាស្ត្រាចារ្យវេជ្ជបណ្ឌិត អ៊ូច ឌីណា គ្រូពេទ្យឯកទេសផ្នែកសម្ភព និងរោគស្ត្រីនៃមន្ទីរសម្ភព និងសម្រាកព្យាបាលឥន្ទ្រទេវី បានប្រាប់កោះសន្តិភាពឱ្យដឹងថា ជាការពិតណាស់ស្ត្រីគ្រប់រូបដែលពពោះត្រៀមសម្រាលកូន តែងកើតមានក្តីកង្វល់ខ្លាំង ជាពិសេសគឺខ្លាចពិបាកសម្រាល ។ ចំពោះ មូលហេតុដែលស្ត្រីខ្លះសម្រាលកូនមិនរួច គឺអាចបណ្តាលមកពីកត្តាម្តាយ និងទារកដូចជា៖
១-មូលហេតុមកពីម្តាយ
-ពិបាកសម្រាលដោយសារមាត់ស្បូនបើកមិនប្រក្រតី ៖ បញ្ហានេះបណ្តាលមកពីមាត់ស្បូនរឹង មិនទន់អាចបណ្តាលមកពីភាពស្អិតនៃកោសិកាមាត់ស្បូន ឬមកពីការរួញស្អិតនៃមាត់ស្បូន ។
-ពិបាកដោយកម្លាំងកន្ត្រាក់របស់សាច់ដុំស្បូនមិនប្រក្រតី ៖ មិនប្រក្រតីនៃការកន្ត្រាក់របស់សាច់ដុំស្បូន អាចបណ្តាលមកពីស្បូនខ្សោយ នោះក៏ជាមូលហេតុធ្វើឱ្យការសម្រាលកូនជួបឧបសគ្គ ។
-ពិបាកដោយសារមានដុំអ្វីមួយនៅរាំងស្ទះធ្វើឱ្យដំណើរសម្រុតចុះរបស់ទារក មានបញ្ហា ។
-ពិបាកដោយសារឆ្អឹងអាងត្រគាករបស់ម្តាយខុសខ្នាត ៖ ម្តាយដែលមានទម្រង់ឆ្អឹងត្រគាកតូចចង្អៀត មិនអាចសម្រាលតាមបែបធម្មជាតិបានទេ ត្រូវដោះស្រាយដោយធ្វើការវះកាត់ ។
២-មូលហេតុមកពីទារក
-មូលហេតុដែលបណ្តាលឱ្យមានការសម្រាលកូនមិនរួចនោះ បណ្តាលមកពីទារកក្នុងផ្ទៃបង្ហាញទម្រង់ខុសរបៀប ។
-ការសម្រាលធម្មតា ទារកក្នុងផ្ទៃត្រូវបង្ហាញផ្នែកក្បាលមកមុន ។ ផ្ទុយទៅវិញករណីបង្ហាញគូទមុន (ចំពោះអ្នកកូនដំបូង) បង្ហាញថ្ងាសមកមុន ទារកខ្លះមានទំហំធំពេក ឬក្បាលធំពេក ទាំងអស់នេះជាមូលហេតុដែលធ្វើឱ្យមាតាមួយចំនួនសម្រាលកូនមិនរួច ហើយតម្រូវឱ្យធ្វើការវះកាត់ ដើម្បីសង្គ្រោះជីវិតមាតានិងទារក ។
លោកសាស្ត្រាចារ្យវេជ្ជបណ្ឌិត បានបញ្ជាក់ថា ស្ត្រីមួយចំនួនដែលក្នុងពេលសម្រាលកូនជួបឧបសគ្គ ចេះតែធ្វើសំណូមពរឱ្យគ្រូពេទ្យចាក់ថ្នាំបើកស្បូន ជួនកាលខឹងសម្បានឹងគ្រូពេទ្យមិនព្រមចាក់ថ្នាំឱ្យ ។ ចំពោះបញ្ហាទាំងអស់នេះគ្រូពេទ្យទេ ដែលជាអ្នកធ្វើរោគវិនិច្ឆ័យ និងវាយតម្លៃទៅលើបញ្ហាទាំងនោះ ។ ការចាក់ថ្នាំឱ្យមាត់ស្បូនបើកក្តី ការចាក់ថ្នាំឱ្យឈឺពោះក្តី វាអាចទទួលផលល្អ លុះត្រាណាការសម្រាលនោះគ្មានឧបសគ្គ ។ ផ្ទុយទៅវិញចំពោះស្ត្រីឈឺពោះសម្រាលហើយជួបបញ្ហាដូចបានរៀបរាប់ខាងលើ ការចាក់ថ្នាំឱ្យស្បូនបើក ឬឱ្យឈឺពោះនោះ ជាអាវុធដ៏គ្រោះថ្នាក់បំផុតសម្រាប់បញ្ចប់ជីវិតមាតា និងទារក ។
គួរបញ្ជាក់ថា ស្ត្រីដែលមានវ័យពីអាយុ២៥ឆ្នាំឡើងទៅ អាចប្រឈមនឹងការលំបាកក្នុងដំណាក់កាលសម្រាលកូនលើកដំបូង ដោយសារកោសិកាអាងត្រគាកលែងបើក ៕
ចែករំលែកព័តមាននេះ