គូស្វាមីភរិយាវ័យចំណាស់មួយគូនៅទីក្រុងសិនជិនប្រទេសចិនកំពុងធ្វើឱ្យអ្នកលេងអ៊ីនធឺណេតរំជួលចិត្តយ៉ាងខ្លាំងបន្ទាប់ពីលេចចេញនូវរូបថត និងវីដេអូដែលបង្ហាញពីការជួបជុំរបស់ពួកគាត់នៅក្នុងបន្ទប់ផ្នែក ICU របស់មន្ទីរពេទ្យ ហើយដែលប្រហែលជាលើកចុងក្រោយផងដែរ ។ យោងតាមសារព័ត៌មានចិន Weixin តាមរយៈ World…
គូស្វាមីភរិយាវ័យចំណាស់មួយគូនៅទីក្រុងសិនជិនប្រទេសចិនកំពុងធ្វើឱ្យអ្នកលេងអ៊ីនធឺណេតរំជួលចិត្តយ៉ាងខ្លាំងបន្ទាប់ពីលេចចេញនូវរូបថត និងវីដេអូដែលបង្ហាញពីការជួបជុំរបស់ពួកគាត់នៅក្នុងបន្ទប់ផ្នែក ICU របស់មន្ទីរពេទ្យ ហើយដែលប្រហែលជាលើកចុងក្រោយផងដែរ ។
យោងតាមសារព័ត៌មានចិន Weixin តាមរយៈ World of Buzz បានឱ្យដឹងថាលោកស្រី Peng និងប្តីរបស់គាត់ឈ្មោះ Gao ទាំងពីរនាក់បានចូលសម្រាកនៅមន្ទីរពេទ្យនៃសាកលវិទ្យាល័យហុងកុង-សិនជិន បន្ទាប់ពីប្រពន្ធមានបញ្ហារោគឫសដូងបាតដោយមានហូរឈាមកាលពីថ្ងៃទី ៨ ខែកក្កដា ហើយប្តីរបស់គាត់បានកើតរោគគាំងបេះដូងនៅថ្ងៃទី ១៧ ខែកក្កដា ។
នៅថ្ងៃទី ២៧ ខែកក្កដាលោកស្រី Peng បានដឹងខ្លូនពីការវះកាត់ហើយបានដឹងថាប្តីរបស់គាត់ត្រូវបានគេឱ្យចូលបន្ទប់ ICU ដែលព័ត៌មាននេះបែកធ្លាយពីកូនស្រីរបស់ពួកគាត់ ហើយអ្នកស្រី Peng ដឹងថាប្តីរបស់គាត់ប្រហែលជាមិនអាចសះស្បើយដូចដើមទេ ។
បន្ទាប់មកអ្នកស្រី Peng បានស្នើសុំឱ្យមន្ទីរពេទ្យនាំទៅបន្ទប់ ICU ជួបប្តីរបស់គាត់ដោយដឹងថានេះអាចជាឱកាសចុងក្រោយដែលអ្នកស្រីអាចមើលឃើញមុខប្តីដែលមានអាយុ ៥៧ ឆ្នាំ ។ មន្ទីរពេទ្យបានយល់ព្រមតាមការស្នើសុំនេះទោះបីអ្នកស្រីមិនទាន់ជាសះស្បើយពីការវះកាត់ក៏ដោយ ។ បុគ្គលិកមន្ទីរពេទ្យបានជួយរុញអ្នកស្រីទៅបន្ទប់ប្តីរបស់គាត់ហើយដាក់គ្រែនៅក្បែរគ្នា ។
បន្ទាប់មកអ្នកស្រី Peng បានកាន់ដៃប្តីរបស់គាត់ថ្នមៗ ហើយសំឡឹងមើលមុខ ។ បន្ទាប់មកអ្នកស្រីបានស្រែកហៅប្តីរបស់គាត់ទោះបីជាដឹងថាប្តីរបស់គាត់មិនអាចបើកភ្នែកបានក៏ដោយ ដោយហៅថា «ប្រុសចាស់ ប្រុសចាស់» ។
ទោះជាយ៉ាងណាការជួបជុំគ្នារបស់ពួកគាត់មានរយៈពេលត្រឹមតែ ១០ នាទីប៉ុណ្ណោះព្រោះកូនស្រីមិនចង់ធ្វើឱ្យអ្នកស្រី Peng មានស្ថានភាពជំងឺកាន់តែធ្ងន់ធ្ងរឡើង ។ កូនស្រីបាននិយាយថា ដំបូងខ្ញុំមិនរំពឹងថាបុគ្គលិកមន្ទីរពេទ្យយល់ព្រមបញ្ជូនម្តាយខ្ញុំទៅបន្ទប់ ICU របស់ឪពុកខ្ញុំទេ ។ ខ្ញុំពិតជាមានអំណរគុណណាស់ពីព្រោះមិនត្រឹមតែពួកគេព្រមធ្វើដូច្នេះទេ តែពួកគេក៏បានចាត់វិធានការភ្លាមៗផងដែរ ។ ពេលនេះខ្ញុំធូរចិត្តជាងមុនហើយ ព្រោះម៉ាក់បានជួបប៉ាជាលើកចុងក្រោយ ៕
ប្រភព៖ nextshark , កែសម្រួលដោយ ៖ សំណាង
ចែករំលែកព័តមាននេះ