រាជធានីភ្នំពេញ ៖ បុរស៣នាក់ជិះម៉ូតូមួយគ្រឿងឆ្លងផ្លូវបំបែកជាបួនត្រូវបានរថយន្តសង្គ្រោះរបស់មន្ទីរពេទ្យបង្អែកបារាយណ៍សន្ទុកបើកដឹកអ្នកជំងឺប្រញាប់ពេកក៏ជ្រុលទៅបុកម៉ូតូចំពាក់
កណ្តាលពេញទំហឹងដួលផ្លោងរងរបួសធ្ងន់២នាក់ និងស្រាលម្នាក់ ហេតុការណ៍នេះបានកើតឡើងកាលពីវេលាម៉ោង8និង15នាទីយប់ ថ្ងៃទី6 ខែសីហា ឆ្នាំ2019 តាមបណ្តោយផ្លូវ61កែងផ្លូវ90 នៅចំណុចក្បែរនឹងមន្ទីរពេទ្យគន្ធបុប្ផា ស្ថិតនៅក្នុងសង្កាត់វត្តភ្នំ ខណ្ឌដូនពេញ ។
សាក្សីដែលឃើញហេតុការណ៍បានអោយដឹងថា មុនពេលកើតហេតុខាងលើនេះគេបានឃើញបុរស៣នាក់ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ស៊េរីឆ្នាំ2017 ពាក់ផ្លាក
លេខ ភ្នំពេញ 1GJ-1094 បើកបរតាមបណ្តោយផ្លូវ61ក្នុងទិសដៅពីជើងទៅត្បូង ។
លុះពេលបើកមកដល់ចំណុចកើតហេតុខាងលើនេះម៉ូតូរងគ្រោះបានបើកឆ្លងបានពាក់កណ្តាលផ្លូវហើយក៏ស្រាបតែមានរថយន្តសង្គ្រោះរបស់មន្ទីរពេទ្យបង្អែកបារាយណ៍សន្ទុកមួយគ្រឿង ពណ៌ស ពាក់ស្លាកលេខ រដ្ឋ12 2-0966 បើកបរតាមបណ្តោយផ្លូវ90ក្នុងទិសដៅពីលិចទៅកើតបើកក្នុងល្បឿនយ៉ាងលឿនប្រញាប់ដឹកអ្នកជំងឺចូលមន្ទីរពេទ្យគន្ធបុប្ផាមិនបានប្រយ័ត្នក៏ជ្រុលទៅបុកម៉ូតូចំពាក់កណ្តាលបណ្តាលអោយដួលបាក់ជើងស្តាំម្នាក់ និងបែកក្បាលសន្លប់ស្តូកស្តឹងម្នាក់ រីឯម្នាក់ទៀតរងរបួសស្រាល ចំនែកឯរថយន្តសង្គ្រោះមន្ទីរពេទ្យបង្អែកវិញខូចខាតក្រពឹតអស់មួយកំណាត់ខាងមុខ ភ្លាមៗនោះដែលរថយន្តសង្គ្រោះរបស់មន្ទីរពេទ្យកាល់ម៉ែតបានមកដល់ដឹកយកជនរងគ្រោះយកទៅព្យាបាល ។
ក្រោយពេលកើតហេតុរថយន្តសង្គ្រោះបង្អែកបារាយណ៍បានដឹកអ្នកជំងឺយកទៅព្យាបាលនៅមន្ទីរពេទ្យគន្ធបុប្ជាត្រូវបានអ្នកឃើញហេតុការណ៍ជិះដេញឃាត់រថយន្តបានប្រគល់ឲ្យ សមត្ថកិច្ចយកទៅរក្សាទុកនៅការិយាល័យចរាចរណ៍ផ្លូវគោករងចាំដោះស្រាយគ្នានៅពេលក្រោយទៀត ៕
កែសម្រួលដោយ ៖ សំណាង
ចែករំលែកព័តមាននេះ