រាជធានីភ្នំពេញ ៖ ទីតាំងភ្នាល់បាលជ្រកក្រោមណេតកាំកូទី២នៅខាងជើងអតីតរង្វង់មូលកាំកូ ត្រូវបានគណៈបញ្ជាការឯកភាពខណ្ឌឬស្សីកែវចុះបង្ក្រាបដោយឃាត់ខ្លួន បុគ្គលិក និងអ្នកលេង៤នាក់ ។
ការចុះបង្ក្រាបល្បែងស៊ីសងនោះធ្វើឡើងនៅវេលាម៉ោងប្រមាណ១១ព្រឹក ថ្ងៃទី០៦ ខែសីហា ឆ្នាំ ២០១៩ នៅចំណុចផ្ទះបើកសេវាកម្ម ណេតលេខ៨២J ផ្លូវបុរីអង្គរភ្នំពេញ សង្កាត់ទួលសង្កែទី២ ក្រោមការដឹកនាំដោយលោក លីន ញ៉ក់ អភិបាលរងខណ្ឌឬស្សីកែវ និងមានការចូលរួមពីលោកតំណាងព្រះរាជ្ញារងផងដែរ ។
តាមសមត្ថកិច្ចអោយដឹងថា ទីតាំងបើកល្បែងស៊ីសងនេះបានដំណើរការជាយូរមកហើយជ្រកក្រោមច្បាប់អាជីវកម្មសេវាអ៊ិនធើណេតវិស័យព័ត៌មាន(កាកូទី២ណេត)ដែលមានម្ចាស់ឈ្មោះប៊ូ វុត្ថា ភេទប្រុស អាយុ ៣៨ឆ្នាំ មានលំនៅផ្ទះលេខA១៩៨ សង្កាត់ត្រពាំងក្រសាំង ខណ្ឌពោធិ៍សែនជ័យ ។
តាមសមត្ថកិច្ចបានអោយដឹងថា តាមច្បាប់អនុញ្ញាតបើកណេតសេវាកម្សាន្តតុក្តតាតែម្ចាស់ បានបើកល្បែងស៊ីសងភ្នាល់បាលដែលផ្ទុយពីច្បាប់អនុញ្ញាត ។ ដោយមានការផ្តល់ព័ត៌មានពីប្រជាពលរដ្ឋពីទីតាំងល្បែងស៊ីសងភ្នាល់បាលកម្លាំងចុះទៅបង្ក្រាបតែម្តង។
នៅក្នុងប្រតិបត្តិការគណៈកម្មាការបានឃាត់ខ្លួន បុគ្គលិកស្រី៣នាក់ និងអ្នកលេងប្រុសម្នាក់ ប្រគល់ទៅនគរបាលដើម្បីចាត់ការតាមច្បាប់ព្រមទាំងដកហូតសម្ភារទូរដែក១គ្រឿង, កុំព្យូទ័រ២០គ្រឿង, CPU១៨គ្រឿង, ទូរទស្សន៍៦គ្រឿង, ទូរទឹកកក១គ្រឿង, ម៉ាស៊ីនព្រីន៣គ្រឿង, ម៉ាស៊ីនទឹកក្តៅទឹកត្រជាក់១គ្រឿង, កង្ហា៥គ្រឿង, តារាងភ្នាល់បាលជាច្រើន និងប្រាក់ចំនួន៣៩១ដុល្លារ និង២៣៧៨៥០០រៀល ។ ដោយឡែកទីតាំងត្រូវបានគណៈកម្មការបិទបណ្តោះអាសន្នផងដែរ ៕
កែសម្រួលដោយ ៖ សំណាង
ចែករំលែកព័តមាននេះ