រាជធានីភ្នំពេញ ៖ ក្រសួងយុត្តិធម៌នឹងដាក់ឱ្យដំណើរការសាលាឧទ្ធរណ៍តំបន់នៅក្នុងខេត្តចំនួន៣ និងតុលាការជំនាញ២បន្ថែមទៀតនៅឆ្នាំ២០២០ ។ នេះបើតាមការឲ្យដឹងពីអ្នកនាំពាក្យក្រសួងយុត្តិធម៌លោក ជិន ម៉ាលីន ។
លោក ជិន ម៉ាលីន បានលើកឡើងក្នុងសន្និសីទសារព័ត៌មានស្តីពី«សមិទ្ធផល១ឆ្នាំ ក្រោយការ បោះឆ្នោត» នាព្រឹកថ្ងៃទី១ ខែសីហា ឆ្នាំ២០១៩ នៅទីស្តីការគណៈរដ្ឋមន្ត្រីថា បច្ចុប្បន្ននេះកម្ពុជាមានសាលាឧទ្ធរណ៍តែមួយទេ គឺសាលាឧទ្ធរណ៍ភ្នំពេញ ដែលដោះស្រាយគ្រប់សំណុំរឿងដែលបានបញ្ជូនពីគ្រប់សាលាដំបូងរាជធានី-ខេត្តទាំងអស់ ។
លោកបញ្ជាក់ថា «អីុចឹងរយៈពេល១ឆ្នាំនេះយើងបានសាងសង់សាលាឧទ្ធរណ៍តំបន់បានចំនួន៣ខេត្ត គឹនៅខេត្តត្បូងឃ្មុំ ខេត្តបាត់ដំបង និងខេត្តព្រះសីហនុ ហើយដំណើរការសាងសង់នេះបាន៨០ភាគរយហើយ និងរំពឹងថាដាក់ឲ្យដំណើរការនៅឆ្នាំក្រោយនេះ(២០២០)» ។
លោក ជិន ម៉ាលីន ក៏បានឲ្យដឹងដែរថា ទាក់ទងនឹងការរៀបចំចាត់តាំងតុលាការ គឺការដាក់ឲ្យដំណើរតុលាការជំនាញ ដែលច្បាប់បានបង្កើតមាន៤គឺ ១-តុលាការព្រហ្មទណ្ឌ ២-តុលាការរដ្ឋប្បវេណី ៣-តុលាការពាណិជ្ជកម្ម និង៤-តុលាការការងារ ។
ប៉ុន្តែមកដល់បច្ចុប្បន្ននេះ តុលាការដែលដំណើរការមានតែ២ គឺតុលាការព្រហ្មទណ្ឌ និងតុលាការរដ្ឋប្បវេណី ចំណែកតុលាការ២ទៀតកំពុងស្ថិតក្នុងដំណើរការសិក្សារៀបចំធនធានមនុស្ស និងការរៀបចំក្របខណ្ឌច្បាប់គតិយុត្តដើម្បីដាក់ឲ្យដំណើរការនៅឆ្នាំក្រោយនៃតុលា
ការទាំងពីរនេះ(តុលាការពាណិជកម្ម និងតុលាការងារ) ។
ជាមួយគ្នានេះ អ្នកនាំពាក្យក្រសួងយុត្តិធម៌ក៏បានឲ្យដឹងថា ក្រសួងនឹងបង្កើតសាលាដំបូងនៅខេត្តកែបមួយទៀត ដែលបច្ចុប្បន្នមានសាលាដំបូងតែ២៤ ហើយនៅពេលបច្ចុប្បន្នខេត្តកែបបានប្រើប្រាស់តុលាការរួមគ្នាជាមួយតុលាការខេត្តកំពត ។លោក ជិន ម៉ាលីន បញ្ជាក់ថា «អីុចឹងទេអាចដំណើរការនៅឆ្នាំក្រោយ ប្រសិនអ្វីៗធ្វើតាមការគ្រោងទុករបស់យើងរួមមាន គម្រោងហិរញ្ញវត្ថុ ធនធានមនុស្ស និងបទដ្ឋានគតិយុត្តមួយចំនួន យើងអាចបើកការសាងសង់សាលាដំបូងខេត្តកែបនៅឆ្នាំក្រោយ» ។
លោក ជិន ម៉ាលីន បានលើកពីមូលហេតុដែលបង្កើតស្ថាប័នតុលាការ ព្រមទាំងតុលាការជំនាញនេះ គឺជាគោលការណ៍ធ្វើកំណែទម្រង់ប្រព័ន្ធយុត្តិធម៌ ដើម្បីឲ្យប្រជាពលដ្ឋទទួលបានយុត្តិធម៌នៅក្នុងសង្គម តាមរយៈការលើកតម្កើងការទទួលបានយុត្តិធម៌ ។ ការទទួលបានយុត្តិធម៌ គឺធ្វើយ៉ាងណាឲ្យប្រជាពលរដ្ឋទទួលបានសេវាយុត្តិធម៌មានភាពងាយស្រួល ។ លោកបន្ថែមថា ក្នុងរយៈពេល១ឆ្នាំនៃអាណត្តិរាជរដ្ឋាភិបាល ក្រសួងយុត្តិធម៌បានសម្រេចលទ្ធផលមួយចំនួន ដែលសំខាន់ក្នុងប្រវត្តិសាស្ត្រនោះគឺក្រសួងយុត្តិធម៌បានបង្កើតអង្គភាពរដ្ឋបាលតុលាការ ។
លោក ជិន ម៉ាលីន បញ្ជាក់ថា «អីុចឹងយើងបង្កើតអង្គភាពរដ្ឋបាលតុលាការនេះនៅគ្រប់សាលាដំបូង និងតុលាការគ្រប់ជាន់ថ្នាក់(សាលាឧទ្ធរណ៍ និងតុលាការកំពូល) ។ អង្គភាពតុលាការ គឺជាច្រកចេញចូលតែមួយសម្រាប់សាធារណជនធ្វើការទាក់ទងមកតុលាការ ក៏ដូចជាអ្នកនាំ ពាក្យរបស់តុលាការផងដែរ ។ ក្នុងរយៈ១ឆ្នាំនេះ យើងបានធ្វើទំនើបកម្មដោយបានបំពាក់បច្ចេកទេសកុំព្យូទ័រដើម្បីគ្រប់គ្រងសំណុំរឿង ។
អីុចឹងមកដល់ពេលនេះ សាលាដំបូងមាន២៤ ហើយសាលាដំបូង២១ បានបំពាក់ឧបករណ៍បច្ចេកទេសគ្រប់គ្រងសំណុំរឿងតាមប្រព័ន្ធកុំព្យូទ័រ និងបង្កើតការគ្រប់គ្រងទិន្នន័យតាមរយៈប្រព័ន្ធកុំព្យូទ័រ ហើយឆ្នាំបន្តបន្ទាប់នឹងដាក់ឲ្យដំណើរការនៅសាលាដំបូងទាំងអស់» ៕ (សម្រួលដោយ៖ ស្រីណា)
ចែករំលែកព័តមាននេះ