ខេត្តកណ្តាល ៖ អំពើរហិង្សាមួយបានកើតឡើងរវាងប្តី និងប្រពន្ធឈ្លោះគ្នាសួរនាំរឿងលុយ៥០០ដុល្លារធ្វើអោយប្តីមានកំហឹងវាយបំផ្លិតបំផ្លាញទ្រព្យសម្បត្តិចោលខ្ទេច ។ ហេតុការណ៍នេះបានកើតឡើងនៅថ្ងៃទី៣១ ខែកក្កដា ឆ្នាំ២០១៩ វេលាម៉ោង០៨និង៣០នាទីយប់ ចំណុចភូមិកណ្តាលកោះ ឃុំកោះឧកញ៉ាតី ស្រុកខ្សាច់កណ្តាល ខេត្តកណ្តាល ។
ជនបង្កឈ្មោះ ហាន អៀមហុង ភេទប្រុស អាយុ៣៦ឆ្នាំ ជនជាតិខ្មែរ មុខរបរជាងធ្វើសាឡាង់បូមខ្សាច់ នៅភូមិ-ឃុំកើតហេតុ រីឯជនរងគ្រោះឈ្មោះ លីម គុយស៊ីម ភេទស្រី អាយុ៣៧ឆ្នាំ ជនជាតិខ្មែរ មុខរបរកសិករ នៅភូមិ-ឃុំកើតហេតុខាងលើត្រូវជាប្រពន្ធជនសង្ស័យបានរងរបួសហើមភ្នែកចំហៀងខាងស្ដាំ ។
សាក្សីបានអោយដឹងថា កន្លងមកជនឈ្មោះ ហាន អៀមហុង ធ្លាប់ប្រើអំពើហិង្សាក្នុងគ្រួសារ វាយប្រពន្ធរបស់ខ្លួនជាញឹកញាប់ ប៉ុន្តែប្រពន្ធមិនដែលដាក់ពាក្យបណ្ដឹងទេ ។ នៅថ្ងៃកើតហេតុឈ្មោះ ហាន អៀមហុង បានផឹកស្រាស្រវឹង ហើយប្រើប្រពន្ធឲ្យឡើងទៅបិទក្បាលរ៉ូប៊ីណេទឹក ព្រោះខ្លាចទឹកហៀរអាង ។ ពេលនោះជនរងគ្រោះបានសួរនាំប្តីរបស់ខ្លួនរឿងលុយ៥០០ដុល្លារយកទៅណា ? បន្ទាប់មកក៏មានទំនាស់ពាក្យសំដីជាមួយគ្នា ហើយជនសង្ស័យបានបើកឡានចេញទៅបាត់ ។
លុះដល់វេលាម៉ោងកើតហេតុយប់ថ្ងៃដដែលជនសង្ស័យបានបើកឡានមកដល់ផ្ទះវិញ ហើយចុះពីលើឡានវាយបំផ្លិចបំផ្លាញតុធ្វើពីដែកក្រាលការ៉ូបែកខូចខាតចំនួនមួយ ព្រមទាំងបែកចានមួយចំនួន និងស្ទុះទៅដាល់ជនរងគ្រោះដែលកំពុងតែដេកលើប៉ៅអុីនៅក្នុងផ្ទះត្រូវភ្នែកចំហៀងខាងស្ដាំ បណ្ដាលឲ្យហើមប៉ោងរបួសមួយកន្លែង ។
ពេលនោះអ្នកជិតខាងបានទៅរាយការណ៍ជូនសមត្ថកិច្ចនគរបាលប៉ុស្តិ៍កោះឧកញ៉ាតីឲ្យជួយអន្តរាគមន៍ ហើយជនរងគ្រោះបានដាក់ពាក្យបណ្ដឹងឱ្យសមត្ថកិច្ចឃាត់ខ្លួនជនបង្កដែលជាប្តីឈ្មោះ ហាន អៀមហុង បញ្ជូនទៅអធិការដ្ឋាននគរបាលស្រុកខ្សាច់កណ្តាលបន្តអនុវត្តតាមនីតិវិធី ៕
កែសម្រួលដោយ ៖ សំណាង
ចែករំលែកព័តមាននេះ