រាជធានីភ្នំពេញ​៖ ចៅក្រមសាលាដំបូង​រាជធានីភ្នំពេញ​ ​នៅរសៀលថ្ងៃទី០៦​ កុម្ភៈ ២០១៤ ​បានសម្រេចលើកពេល​ប្រកាស​សាល​ក្រម​ប្រឆាំងមន្រ្តីរាជការ២រូប បម្រើការងារ​នៅក្រសួង​​សាធារណការ​ ​និង​ដឹក​ជញ្ជូន ​​ពាក់ព័ន្ឋនឹងអំពើពុករលួយ​ជាង២លានរៀល ​ទៅ​ធ្វើនៅថ្ងៃទី២៥ កុម្ភៈ​ បន្ទាប់ពីបានបើកសវនាការសួរ​ដេញដោលអស់​ពេលជាច្រើន​ម៉ោងនោះរួចមក ។

បើតាមអ្នកឆ្លើយឆ្លង​ព័ត៌មាន​កោះសន្តិភាព​បានបញ្ជាក់ឲ្យដឹងដែរថា ​សវនាការនេះ​ គឺ​កំបាំង​មុខជនជាប់ចោទទំាងពីរ ​និងមាន​វត្ត​មាន​ផងដែរ ​ពីមន្រ្តីអង្គភាព​ប្រឆាំងអំពើពុករលួយ ​និង​មន្រ្តីក្រសួង​សាធារណការ​​និងដឹកជញ្ជូន​ ដែលជាដើមបណ្តឹង និងសាក្សី ។

សេចក្តីរាយការណ៏​បាន​បន្ថែមថា ​ជនជាប់ចោទក្នង​សំណុំរឿងពុករលួយ​ទទួលសំណូកពីបុគ្គលិក​ដែលចង់ឡើងកំាបា្រក់​ ប្រព្រឹត្ត​តំាង​ពីអំឡុងខែវិច្ឆិកា ​២០១១ ​ហើយដែលត្រូវបាន​រត់គេចខ្លួន​នោះ​ ម្នាក់ឈ្មោះ សេង រដ្ឋា ​អាយុ៥២ឆ្នាំ ភេទប្រុស ​មាន​តួនាទី​ជា​អគ្គ​នាយក​នៃអគ្គនាយកដ្ឋាន​រដ្ឋបាល​និងធនធានមនុស្ស នៃក្រសួងសាធារណការ​និងដឹកជញ្ជូន​ និងម្នាក់ទៀតឈ្មោះ ​ញាន ប៉ុន ​ភេទប្រុស ជាប្រធាន​ការិយាល័យ​​ធនធានមនុស្ស​ នៃក្រសួងសាធារណការ​និងដឹកជញ្ជូន ​( អ្នក​សមគំនិត​រកលុយ​ឲ្យជនជាប់​ចោទ​ខាង​លើ ) ។

គួរបញ្ជាក់ដែរថា ជនជាប់​ចោទទំាងពីរ ​ត្រូវអង្គភាពបើកការ​ស៊ើបអង្កេត​ស្រាវជ្រាវ​អស់ពេលជាច្រើនខែ ​បន្ទាប់ពីបាន​ទទួល​ពាក្យ​បណ្តឹង ​និង​​បានបញ្ជូន​សំណុំរឿងនេះ​ទៅសាលាដំបូង​ចាត់ការកាលពី​ឆ្នាំ២០១៣កន្លងទៅ ៕