ខេត្តសៀមរាប ៖ ស្ត្រីជនជាតិថៃម្នាក់បានត្រូវកម្លាំងសមត្ថកិច្ចចម្រុះប្រចាំច្រកទ្វារអាកាសយានដ្ឋានអន្តរជាតិសៀមរាប ឃាត់ខ្លួនរយៈពេលខ្លី នៅក្នុងប្រតិបត្តិការតាមប្រមាញ់ក្រុមឧក្រិដ្ឋជនជួញដូរគ្រឿងញៀនឆ្លងដែន។
ខេត្តសៀមរាប ៖ ស្ត្រីជនជាតិថៃម្នាក់បានត្រូវកម្លាំងសមត្ថកិច្ចចម្រុះប្រចាំច្រកទ្វារអាកាសយានដ្ឋានអន្តរជាតិសៀមរាប ឃាត់ខ្លួនរយៈពេលខ្លី នៅក្នុងប្រតិបត្តិការតាមប្រមាញ់ក្រុមឧក្រិដ្ឋជនជួញដូរគ្រឿងញៀនឆ្លងដែន។
ប្រតិបត្តិការឃាត់ខ្លួនជនសង្ស័យជាជនបរទេសខាងលើធ្វើឡើងកាលពីវេលាម៉ោង៣រំលងអធ្រាត្រឈានចូលថ្ងៃទី៥ កុម្ភៈ ក្រោមការដឹកនាំកម្លាំងផ្ទាល់ដោយលោក ជួន សុបញ្ញា ព្រះរាជអាជ្ញារងអមសាលាដំបូងខេត្ត និងមានកម្លាំងប្រតិបត្តិការរួមគ្នារវាងកម្លាំងប៉ូលិសនៃស្នងការដ្ឋានខេត្ត ប៉ូលិសអន្តោប្រវេសន៍ និងមន្ត្រីគយ និងរដ្ឋាករប្រចាំអាកាសយានដ្ឋានអន្តរជាតិសៀមរាប ដែលជាច្រកអន្តរជាតិដ៏សំខាន់មួយ ធ្លាប់បានបង្ក្រាបបទល្មើសជួញដូរគ្រឿងញៀនទ្រង់ទ្រាយធំយ៉ាងតិចចំនួន៧លើករួចមកហើយ ។ ទោះជាយ៉ាងនេះក្តី នៅរសៀលថ្ងៃទី៥ កុម្ភៈតំណាងអយ្យការអមសាលាដំបូងខេត្ត ហាក់ដូចជាព្យាយាមលាក់បាំងព័ត៌មានចាប់ខ្លួនស្ត្រីជនជាតិថៃខាងលើ ដោយបញ្ជាក់ថា ពុំមានជនបរទេសណាម្នាក់ត្រូវចាប់ខ្លួននោះទេ ខណៈពេលលោកវរសេនីយ៍ឯក អ៊ុំ មករា ស្នងការរងនគរបាលខេត្ត បានអះអាងថា ពិតជាមានហេតុការណ៍ចាប់ខ្លួនមែន តែសុំមិនធ្វើអធិប្បាយ ។
ទាក់ទិននឹងករណីចាប់ខ្លួនស្ត្រីជនជាតិថៃនេះដែរ ត្រូវបានប្រភពពីមន្ត្រីប៉ូលិសមួយរូបដែលមានភ្ជាប់ទាំងរូបថតជនសង្ស័យផងនោះនិយាយថា ជនសង្ស័យដែលត្រូវបានចាប់ខ្លួននៅក្នុងប្រតិបត្តិការនេះឈ្មោះ ណាម រិនរិត្យា អាយុប្រហែល២៨ឆ្នាំទៅ៣០ឆ្នាំ ត្រូវបានកម្លាំងសមត្ថកិច្ចចម្រុះចាប់ខ្លួនភ្លាមៗជាមួយនឹងវ៉ាលីសធំៗមានកង់អូសចំនួនពីរ បន្ទាប់ពីចុះពីជើងយន្តហោះ K6435 ពីប្រទេសចិន ។ ប្រភពដដែលបានបន្ថែមថា នាយប់នោះនៅតាមបណ្តាញសុើបការណ៍សម្ងាត់បានរាយការណ៍ថា មានអំពើជួញដូរគ្រឿងញៀនទ្រង់ទ្រាយធំមួយ ចេញពីប្រទេសប្រេស៊ីលឆ្លងកាត់ប្រទេសចិនចូលមកកាន់អាកាសយានដ្ឋានអន្តរជាតិសៀមរាប ហើយស្ត្រីជនជាតិថៃខាងលើត្រូវបានសង្ស័យខ្ពស់ ទើបសម្រេចឃាត់ខ្លួនបញ្ជូនបន្តទៅកាន់ស្នងការដ្ឋានខេត្ត ដើម្បីត្រួតពិនិត្យ ។
ថ្វីបើយ៉ាងនេះក្តី ក្នុងបេសកកម្មត្រួតពិនិត្យជនសង្ស័យ ជាពិសេសនៅក្នុងវ៉ាលីសធំទាំងពីររបស់គាត់ សមត្ថកិច្ចមិនបានរកឃើញវត្ថុតាងគ្រឿងញៀន សូម្បីតែបន្តិចដូចបណ្តាញសម្ងាត់រាយការណ៍មកនោះទេ ក្រៅពីសម្លៀកបំពាក់ចាស់ប៉ុន្មានសម្រាប់ ដែលរោយម្សៅកាហ្វេពីលើ ដើម្បីការពារក្លិនប៉ុណ្ណោះ ។ ហេតុនេះហើយក៏សម្រេចដោះលែងស្ត្រីរូបនេះឱ្យមានសេរីភាពវិញ នាវេលាម៉ោងប្រមាណ៦ព្រឹក ថ្ងៃដដែល ។ ជាមួយគ្នានោះដែរ ប្រភពព័ត៌មានពីសមត្ថកិច្ចដាច់ដោយឡែកមួយទៀត បានទម្លាយថា បេសកកម្មតាមប្រមាញ់ឧក្រិដ្ឋជនគ្រឿងញៀនខាងលើ ទំនងជាត្រូវបែកការណ៍ បណ្តាលឱ្យឧក្រិដ្ឋជនដឹងខ្លួនមុន ដោយធ្វើការដោះដូរគ្រឿងញៀនតាំងពីនៅប្រទេសចិន ក៏ថាបាន ព្រោះក្រោយពីសមត្ថកិច្ចដោះលែងស្ត្រីជនជាតិថៃរូបនោះ គេឃើញមានមនុស្សចំនួន៥នាក់ ក្នុងនោះមានទាំងអ្នកមានកាំភ្លើងខ្លីផង បានបើករថយន្តមួយគ្រឿងមកទទួលស្ត្រីនោះយ៉ាងហំហាន ។ គួរកត់សម្គាល់ថា នៅក្នុងរយៈពេលប៉ុន្មានឆ្នាំចុងក្រោយនេះ គេសម្គាល់ឃើញពួកឧក្រិដ្ឋជនជួញដូរគ្រឿងញៀន ហាក់កំពុងយកច្រកអន្តរជាតិសៀមរាប ជាទីនាំចូលគ្រឿងញៀនពីបរទេសយ៉ាងសំខាន់ ដែលភាគច្រើននៃចំនួនអ្នកចាប់ខ្លួនជាស្ត្រីភេទ ។
មន្ត្រីសមត្ថកិច្ចបានអះអាងថា ចាប់ពីអំឡុងពាក់កណ្តាលខែសីហា ឆ្នាំ២០១២ មក គេបានបង្ក្រាបជាលក្ខណៈទ្រង់ទ្រាយធំលើបទល្មើសជួញដូរគ្រឿងញៀនឆ្លងដែនតាមច្រកអាកាសយានដ្ឋានអន្តរជាតិសៀមរាបចំនួន៧លើករួចមកហើយ ដោយបានរឹបអូសវត្ថុតាងគ្រឿងញៀនជាង២០គីឡូក្រាម និងចាប់ខ្លួនឧក្រិដ្ឋជនបានចំនួន៨នាក់ ក្នុងនោះ៦នាក់ជាស្ត្រី ។ គ្រប់ជនបរទេសដែលត្រូវចាប់ខ្លួន មិនមានជនណាម្នាក់ត្រូវបានដោះលែងទេ គឺបានបញ្ជូនខ្លួនទៅកាន់សាលាដំបូងខេត្ត ហើយត្រូវផ្តន្ទាទោសយ៉ាងតឹងរឹុងបំផុត ដោយម្នាក់ៗត្រូវផ្តន្ទាទោសដាក់ពន្ធនាគារយ៉ាងតិចរយៈពេល២៨ឆ្នាំឡើងទៅ ។
ក្រុមអ្នកតាមដានសង្គមបាននិយាយថា ក្រុងសៀមរាបប្រាកដជាមានបណ្តាញឧក្រិដ្ឋជនគ្រឿងញៀនដ៏ធំដែលសមត្ថកិច្ចនៅមិនទាន់ចាប់ខ្លួនបាននៅឡើយ ទើបផ្តល់ឱកាសឱ្យពួកនោះអាចនាំចូលគ្រឿងញៀនពីក្រៅប្រទេសមកពង្វក់យ៉ាងងប់ងុលដល់កូនខ្មែរ និងភ្ញៀវទេសចរដែលធ្វើដំណើរពាសពេញពិភពលោកមកស្នាក់នៅក្នុងក្រុងនេះយ៉ាងព្រហើនដូច្នេះ ៕
ចែករំលែកព័តមាននេះ