រាជធានីភ្នំពេញ ៖ កម្មករក្រុមហ៊ុនប្រមូលសំរាមស៊ិនទ្រី បានបន្ដកូដកម្មរបស់ខ្លួនឈានដល់ថ្ងៃទី៣ហើយគិតត្រឹមថ្ងៃទី៤ កុម្ភៈ ដើម្បីទារប្រាក់ខែគោល១៥០ដុល្លារ និង២០០ដុល្លារ រួមជាមួយនឹងការទាមទារនូវលក្ខខណ្ឌការងារមួយចំនួនទៀត ។
រាជធានីភ្នំពេញ ៖ កម្មករក្រុមហ៊ុនប្រមូលសំរាមស៊ិនទ្រី បានបន្ដកូដកម្មរបស់ខ្លួនឈានដល់ថ្ងៃទី៣ហើយគិតត្រឹមថ្ងៃទី៤ កុម្ភៈ ដើម្បីទារប្រាក់ខែគោល១៥០ដុល្លារ និង២០០ដុល្លារ រួមជាមួយនឹងការទាមទារនូវលក្ខខណ្ឌការងារមួយចំនួនទៀត ។ ទោះបីជាបែបនេះក្ដី ការដោះស្រាយនៅតែមិនទាន់មានលទ្ធផលត្រូវរ៉ូវគ្នានៅឡើយទេ ស្របពេលនៅក្នុងរាជធានីភ្នំពេញ គំនរសំរាមស្ថិតនៅពាសពេញគ្រប់ទីកន្លែង ដូចជាតាមដងផ្លូវសាធារណៈ តាមលំនៅឋាន និងផ្សារនានា ព្រោះគ្មានអ្នកដើរប្រមូលដឹកចេញប្រចាំថ្ងៃដូចរាល់ដង ។
នៅព្រឹកថ្ងៃទី៤ កុម្ភៈ ពួកគេបានធ្វើការតវ៉ានៅមុខទីស្នាក់ការក្រុមហ៊ុនស៊ិនទ្រី នៅទីតាំងក្នុងភូមិខ្វា សង្កាត់ដង្កោ ខណ្ឌដង្កោ បន្ដទៀត ។ ការបន្ដធ្វើកូដកម្មនេះ ខណៈពេលដែលគណៈកម្មការចម្រុះថ្នាក់ក្រសួងការងារ ថ្នាក់រាជធានីភ្នំពេញ និងអាជ្ញាធរខណ្ឌដង្កោ រួមជាមួយតំណាងកម្មករ និងតំណាងក្រុមហ៊ុនខាងលើកំពុងស្វះស្វែងរកដំណោះស្រាយដើម្បីបញ្ចប់បញ្ហា ប៉ុន្ដែមិនទាន់ត្រូវរ៉ូវគ្នានៅឡើយ ។ ការមិនទាន់ត្រូវគ្នានោះត្រូវបានគេដឹងតាមប្រភពខ្លះនិយាយថា ដោយសារតែភាគីតំណាងក្រុមហ៊ុន និងភាគីតំណាងកម្មករសុទ្ធតែជជែកវែកញែកយកតែត្រូវរៀងៗខ្លួន មិនមានការបន្ទន់ឥរិយាបទរកគ្នាទេ ។ ដូចជានៅព្រឹកថ្ងៃចុងក្រោយនេះជាដើម ការជជែកគ្នាមានការតឹងតែងដាក់គ្នាផងដែរ ហើយអ្នកដែលមានកង្វល់ខ្លាំងបំផុតដោយសារវិបត្ដិខាងលើនោះ គឺអាជ្ញាធរ និងអ្នករាជធានី ព្រោះមិនអាចទុកឱ្យសំរាមស្ថិតនៅពាសវាលពាសកាលដោយគ្មានអ្នកប្រមូលបែបនេះបានឡើយ ។ យោងតាមរបាយការណ៍របស់ក្រុមហ៊ុនស៊ិនទ្រីកន្លងមក បានឱ្យដឹងថា កាកសំណល់ និងសំរាមនៅរាជធានីភ្នំពេញក្នុង១ថ្ងៃមានចំនួនប្រមាណ១.៤០០តោនដែលត្រូវប្រមូលដឹកចេញទាំងថ្ងៃទាំងយប់ ដែលមិនមែនជាបរិមាណធម្មតា ។
ទាក់ទិននឹងហេតុការណ៍នោះត្រូវបានប្រភពជាក់លាក់មួយពីអាជ្ញាធរខណ្ឌដង្កោ ឱ្យដឹងថា នៅព្រឹកថ្ងៃទី៤ កុម្ភៈ គណៈកម្មការចម្រុះខាងលើបានហៅតំណាងក្រុមហ៊ុន និងតំណាងកម្មករជួបដោះស្រាយគ្នានៅក្នុងទីស្នាក់ការក្រុមហ៊ុនតែម្ដង ប៉ុន្ដែការដោះស្រាយមិនទាន់ត្រូវរ៉ូវគ្នានោះទេ ចាប់ពីព្រឹករហូតដល់ថ្ងៃត្រង់ក្នុងថ្ងៃដដែលនោះ ទើបផ្អាកសិន ដោយបន្ដធ្វើការដោះស្រាយនៅវេលាម៉ោង៣រសៀល នៅក្នុងសាលារាជធានីភ្នំពេញទៀត ។ ប្រភពដដែលបន្ដថា ខាងភាគីកម្មករបានទាមទារតាមផ្នែកៗ ក្នុងនោះមានផ្នែកអ្នកបោសសំរាម វេនថ្ងៃទាមទារដំឡើងប្រាក់ខែដល់១២០ដុល្លារ ដែលពីមុនប្រាក់ខែគោលពួកគេមានចំនួន៦៥ដុល្លារប៉ុណ្ណោះ ហើយពេលនេះត្រូវបានក្រុមហ៊ុនសម្រេចដំឡើងឱ្យត្រឹម៨០ដុល្លារ។ កម្មករផ្នែកអូសរទេះ និងអ្នកកើបវេនថ្ងៃពីមុនប្រាក់ខែគោលចំនួន៧៧.៥ដុល្លារ ពេលនេះទាមទារ១៣៥ដុល្លារ ។ ចំណែកក្រុមហ៊ុនសម្រេចដំឡើងឱ្យត្រឹម៩៥ដុល្លារ ។ សម្រាប់អ្នកវេនយប់ពីមុនប្រាក់ខែគោលចំនួន៩៧,៥ដុល្លារ ពេលនេះទាមទារ១៥០ដុល្លារ ខាងក្រុមហ៊ុនសម្រេចដំឡើងឱ្យត្រឹម១១០ដុល្លារ ។ ដោយឡែក ផ្នែកអ្នកបើករថយន្ដដឹកសំរាម និងជាងជួសជុលរថយន្ដសម្រាប់វេនថ្ងៃពីមុនប្រាក់ខែគោលចំនួន១១០ដុល្លារ ពេលនេះពួកគេទាមទារ១៥៥ដុល្លារ ក្រុមហ៊ុនសម្រេចដំឡើងឱ្យត្រឹមតែ១២០ដុល្លារ ។ សម្រាប់អ្នកធ្វើការវេនយប់ពីមុនប្រាក់ខែគោលចំនួន១២០ដុល្លារ ពេលនេះពួកគេបានទាមទារ១៧០ដុល្លារ ក្រុមហ៊ុនសម្រេចដំឡើងឱ្យត្រឹមតែ១៣៥ដុល្លារ ។
ប្រភពដដែលបន្តថា ខាងភាគីកម្មករបានទាមទារ ចំណែកឯភាគីក្រុមហ៊ុនបានដំឡើងដែរ ប៉ុន្តែឡើងមិនដល់កម្រិតដែលទាមទារ ទើបការដោះស្រាយនៅពេលនោះមិនបានត្រូវរ៉ូវគ្នា ហើយបន្តទៅដោះស្រាយនៅឯសាលារាជធានីភ្នំពេញទៀត នាវេលាម៉ោង៣រសៀល ថ្ងៃទី៤ កុម្ភៈ ។ ការចាល់កកស្ទះសំរាមនៅតាមដងផ្លូវនានា ពិសេសនៅតាមផ្សារ គំនរសំរាមរាប់តោនបានបន្សល់ទុកកាន់តែមានការកើនឡើង និងកំពុងតែជះក្លិនមិនល្អ ដែលអាចនឹងបំពុលបរិស្ថានធ្ងន់ធ្ងរ ហើយក៏ជាសំណាងល្អដែរ ព្រោះស្ថិតក្នុងរដូវប្រាំង ។ ប្រសិនបើមានភ្លៀងធ្លាក់វិញ ការកកស្ទះបែបនេះប្រាកដជារាជធានីមានក្លិនអសោចិ៍សាយភាយពេញអាកាសមិនខានឡើយ ។ ដោយសារតែមានការបារម្ភពីការទុកដាក់សំរាមនេះ គណៈកម្មការផ្សារអូរឫស្សី ក៏ដូចជាផ្សារធំថ្មី និងផ្សារដទៃទៀតបានផ្តល់សម្បកបាវចាស់ៗ និងបំផុសឱ្យមានការច្រកសំរាមក្នុងបាវទាំងនេះយកទៅរក្សាទុកឱ្យបានស្រួល ដោយមិនតម្រូវឱ្យមានការដាក់ចោលដោយគ្មានសណ្តាប់ធ្នាប់នោះឡើយ ៕
ចែករំលែកព័តមាននេះ