ក្នុងនាមជាឪពុកម្តាយ ឬអាណាព្យាបាលរបស់កូនៗ អ្នកប្រហែលជាមានសម្ពាធក្នុងការបង្រៀនជំនាញសំខាន់ៗក្នុងជីវិតដល់កូនៗដែលក្នុងនោះមានជំនាញគ្រប់គ្រងលុយផងដែរ ។ កត្តាមួយដែលប៉ះពាល់ដល់ការគ្រប់គ្រងលុយរបស់មនុស្ស គឺគំនិត និងទស្សនៈដែលទាក់ទិននឹងលុយ ។ មិនថា កូនៗមានអាយុប៉ុន្មានទេ…
ក្នុងនាមជាឪពុកម្តាយ ឬអាណាព្យាបាលរបស់កូនៗ អ្នកប្រហែលជាមានសម្ពាធក្នុងការបង្រៀនជំនាញសំខាន់ៗក្នុងជីវិតដល់កូនៗដែលក្នុងនោះមានជំនាញគ្រប់គ្រងលុយផងដែរ ។
កត្តាមួយដែលប៉ះពាល់ដល់ការគ្រប់គ្រងលុយរបស់មនុស្ស គឺគំនិត និងទស្សនៈដែលទាក់ទិននឹងលុយ ។ មិនថា កូនៗមានអាយុប៉ុន្មានទេ ឪពុកម្តាយ និងអាណាព្យាបាលគួរតែបង្រៀនពីទស្សនៈខាងក្រោមដល់កូនៗឲ្យប្រកាន់ខ្ជាប់ ៖
១. សារៈសំខាន់នៃការសន្សំលុយ
យើងត្រូវតែទទួលស្គាល់ថា ពួកយើងកំពុងតែរស់នៅក្នុងសង្គមដែលមានការចាយវាយច្រើន ដូច្នេះវាពិតជាសំខាន់ក្នុងការបង្រៀនឲ្យកូនៗយល់ដឹងពីការសន្សំថវិកា ដើម្បីជៀសវាងបញ្ហាហិរញ្ញវត្ថុផ្សេងៗ ។ អត្ថប្រយោជន៍នៃការសន្សំថវិកាមានលើសពីជួយបង្កើនលុយក្នុងហោប៉ៅទៅទៀត គឺវាជួយឲ្យកូនៗមានទម្លាប់ល្អ និងមានភាពអត់ធ្មត់ជាងអ្នកដទៃ ។
២. សម្រេចចិត្តលើគោលដៅជីវិតមុនគេ
មនុស្សជាច្រើនធ្វើការសម្រេចចិត្តផ្សេងៗទាំងដែលមិនដឹងច្បាស់ពីគោលដៅជីវិតរបស់ខ្លួន ។ ការធ្វើដូច្នេះភាគច្រើនបង្កឲ្យពួកគេទទួលបានលទ្ធផលដែលមិនគួរឲ្យពេញចិត្ត ឬសម្រេចចិត្តខុសឆ្គងដែលបង្កឲ្យមានការខាតបង់ពេលវេលា និងធនធានផ្សេងៗជាដើម ។
ឪពុកម្តាយ និងអាណាព្យាបាលគួរតែបង្រៀនដល់កូនៗឲ្យគិតគូពីគោលដៅក្នុងជីវិតជាមុនសិន រួចធ្វើការសម្រេចចិត្តផ្សេងៗដោយយោងតាមគោលដៅនេះ ។ ជាមួយគ្នានេះផងដែរ ការសម្រេចចិត្តលើចំនួនលុយដែលអ្នកគួរសន្សំក៏អាស្រ័យលើគោលដៅក្នុងជីវិតរបស់អ្នកដែរ។
៣. លុយមិនមែនជារឿងដែលមិនគួរនិយាយទេ
ក្មេងជាច្រើនរស់នៅក្នុងគ្រួសារដែលមិនប្រាប់ ឬនិយាយប្រាប់កូនៗខ្លួនពីលុយកាក់ ។ កូនៗមិនដែលដឹងថា ឪពុកម្តាយរកប្រាក់ចំណូលបានប៉ុន្មាន ហើយពួកគេក៏មិនដឹងដែរថា របស់ដែលពួកគេប្រើប្រាស់ជារៀងរាល់ថ្ងៃមានតម្លៃប៉ុន្មាន ។ ការមិនឲ្យកូនៗចូលរួមក្នុងការសន្ទនាពីលុយ ឬការសម្រេចចិត្តផ្សេងៗអាចប៉ះពាល់ដល់ទម្លាប់ចាយវាយ និងសន្សំលុយរបស់កូនៗដែរ ព្រោះពួកគេមិនមានព័ត៌មាន និងបទពិសោធន៍គ្រប់គ្រាន់ក្នុងការធ្វើការសម្រេចចិត្តដែលត្រឹមត្រូវឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ