វាមិនមែនជារឿងលំបាកទេ ក្នុងការរក្សាទម្លាប់ចាយវាយលុយកាក់អោយបានល្អ ប្រសិនបើអ្នករស់នៅជីវិតដែលមិនពោរពេញទៅដោយកត្តាដែលជះឥទ្ធិពលឲ្យអ្នកចង់ចាយវាយ ។ ប៉ុន្តែជីវិតមនុស្សជាច្រើនក្នុងសម័យកាលនេះ គឺពោរពេញទៅដោយកត្តាជំរុញដល់ទម្លាប់ចាយវាយមិនល្អ ។ ខាងក្រោមនេះ គឺជាសត្រូវធំៗនៃទម្លាប់ចាយលុយដែលអ្នកគួរតែជៀសវាង ៖…
វាមិនមែនជារឿងលំបាកទេ ក្នុងការរក្សាទម្លាប់ចាយវាយលុយកាក់អោយបានល្អ ប្រសិនបើអ្នករស់នៅជីវិតដែលមិនពោរពេញទៅដោយកត្តាដែលជះឥទ្ធិពលឲ្យអ្នកចង់ចាយវាយ ។ ប៉ុន្តែជីវិតមនុស្សជាច្រើនក្នុងសម័យកាលនេះ គឺពោរពេញទៅដោយកត្តាជំរុញដល់ទម្លាប់ចាយវាយមិនល្អ ។ ខាងក្រោមនេះ គឺជាសត្រូវធំៗនៃទម្លាប់ចាយលុយដែលអ្នកគួរតែជៀសវាង ៖
១. ការលក់បញ្ចុះតម្លៃ
ទំនិញមួយដែលអ្នកមិនត្រូវការតែកំពុងមានការលក់បញ្ចុះតម្លៃនៅតែជាទំនិញដែលអ្នកមិនត្រូវការដដែល ដូច្នេះអ្នកមិនគួរធ្លាក់ក្នុងអន្ទាក់អ្នកលក់ និងទិញអ្វីដែលមិនចាំបាច់សម្រាប់អ្នកទេ ។ ដើម្បីជៀសវាងត្រូវបានបង្ខំឲ្យទិញអ្វី ដែលអ្នកមិនត្រូវការ ឬមិនចង់បាន អ្នកគួរតែកត់ទុកនូវអ្វីដែលអ្នកចង់ទិញ និងត្រូវការក្នុងបញ្ជីមួយរាល់ពេលដើរផ្សារ ។ មុនពេលសម្រេចចិត្តទិញអ្វីដែលកំពុងមានការលក់បញ្ចុះតម្លៃ អ្នកគួរតែមើលក្នុងបញ្ជីរបស់អ្នកសិនថា មានឈ្មោះទំនិញដែលអ្នកកំពុងចង់ទិញ ឬទេ ?
២. ប្រព័ន្ធសង្គម
ប្រព័ន្ធសង្គមដូចជា ហ្វេសប៊ុកផ្តល់អត្ថប្រយោជន៍ជាច្រើនដូចជា អនុញ្ញាតឲ្យមនុស្សរក្សាទំនាក់ទំនងជាមួយនឹងគ្រួសារ និងមិត្តភក្តិ ឬមិត្តរួមការងារ និងដៃគូអាជីវកម្មដទៃជាដើម ប៉ុន្តែវាក៏ជាឧបករណ៍មួយសម្រាប់អ្នកលក់ ដើម្បីទាក់ទាញចិត្តអតិថិជនដែរ ។ ប្រព័ន្ធសង្គមមានការផ្សាយពាណិជ្ជកម្មជាច្រើនដែលអ្នកលក់ព្យាយាមបង្ហាញដល់អ្នកប្រើប្រាស់ឲ្យមានចិត្តចង់ទិញផលិតផល ឬប្រើសេវាកម្មអ្វីមួយ បើទោះជាអ្នកប្រើប្រាស់មិនត្រូវការវាក៏ដោយ ។ អ្នកដែលឧស្សាហ៍ប្រើប្រព័ន្ធសង្គមងាយនឹងជួបការធ្លាក់ក្នុងអន្ទាក់នេះ និងចាយវាយខ្ជះខ្ជាយ ។
៣. ភាពទំនេរ និងធុញ
មនុស្សជាច្រើនមានទម្លាប់ដើរហាង ឬផ្សារទំនើបមើលទំនិញផ្សេងៗលេងពេលដែលពួកគេមិនមានការងារត្រូវធ្វើ ឬកម្មវិធីចូលរួម ។ មនុស្សដទៃទៀតក៏ចូលចិត្តចុចមើលហាងអនឡាញលក់ផលិតផល ឬផ្គត់ផ្គង់សេវាកម្មផ្សេងៗពេលដែលកំពុងសម្រាក ។ សកម្មភាពទាំងនេះអាចជួយឲ្យពួកគេធូរស្រាលពីអារម្មណ៍ធុញទ្រាន់ ពិតមែនក្តី តែវាក៏ផ្តល់ឱកាសឲ្យអ្នកលក់ក្នុងការទាក់ទាញអ្នកឲ្យទិញផលិតផល ឬប្រើសេវាកម្មរបស់ពួកគេដែរ ។ ដូច្នេះប្រសិនបើអ្នកមិនមានតម្រូវការទិញអ្វីទេនោះ អ្នកមិនគួរដើរមើលផលិតផល ឬចូលមើលហាងអនឡាញលេងទេ ៕ កែសម្រួលដោយ ៖ សុឃាក់
ចែករំលែកព័តមាននេះ