ខេត្តព្រះសីហនុ ៖ អភិបាលខេត្ត លោក គួច ចំរើន បានលើកទឹកចិត្តនិងបង្កលក្ខណៈងាយស្រួលដល់វិស័យឯកជនទាំងក្នុង និងក្រៅប្រទេស ចូលរួមវិនិយោគលើការចិញ្ចឹមបង្គា ក្តាមថ្ម និងត្រីសមុទ្រ ដែលមានតម្លៃខ្ពស់មានដូចជា ត្រីតុកកែ ត្រីស្ពង់ ត្រីផ្ទក់សមុទ្រ រួមទាំងការកែច្នៃផលិតផលសមុទ្រប្រកបដោយគុណភាព សុវត្ថិភាព ដើម្បីកាត់បន្ថយការនាំចូលពីប្រទេសជិតខាង ។
ក្នុងឱកាសអញ្ជើញចូលរួមក្នុងទិវាមច្ឆជាតិ១កក្កដា នៅបរិវេណបឹងត្រាវ ភូមិតាអោងធំ ឃុំសាមគ្គី ស្រុកព្រៃនប់ នាព្រឹកថ្ងៃទី២៦ ខែកក្កដា ឆ្នាំ២០១៩ លោក គួច ចំរើន ថ្លែងថា ទន្ទឹមនឹងការថែរក្សាត្រីធម្មជាតិឱ្យមាននិរន្តរភាព ការអភិវឌ្ឍវារីវប្បកម្មត្រូវតែជំរុញឱ្យបានខ្លាំងក្លា ទាំងខ្នាតតូច មធ្យម និងធំ ស្របតាមតម្រូវការទីផ្សារស្បៀងអាហារ និងសក្តានុពលនៃការអភិវឌ្ឍរបស់ខេត្តព្រះសីហនុនាពេលបច្ចុប្បន្ន ។
លោកអភិបាលខេត្តបន្តថា ស្ថាប័នពាក់ព័ន្ធ រដ្ឋបាលមូលដ្ឋាន ត្រូវរួមគ្នាយកចិត្តទុកដាក់ក្នុងការចុះបង្ក្រាបបទល្មើសជលផលគ្រប់ប្រភេទ ពិសេសទប់ស្កាត់ការប្រើប្រាស់ឧបករណ៍នេសាទខុសច្បាប់គ្រប់ប្រភេទ ដែលបំផ្លិចបំផ្លាញធ្ងន់ធ្ងរ ដល់មច្ឆជាតិ ការទន្ទ្រានដីព្រៃកោងកាងយកជាកម្មសិទ្ធិ ការចាក់ដីលុបបឹងជាពិសេស ខិតខំពង្រឹងសមត្ថភាពរបស់សហគមន៍នេសាទដែលបានបង្កើតឡើងរួចហើយឱ្យបានរឹងមាំ ប្រកប ដោយភាពម្ចាស់ការ ក្លាយជាសហគមន៍នេសាទគ្មានបទល្មើសជលផល ។
លោកបានសំណូមពរឱ្យប្រជាពលរដ្ឋក្នុងសហគមន៍ ចូលរួមថែរក្សាអភិរក្សធនជលផល ឱ្យកាន់តែសម្បូរបែប ដើម្បីពង្រឹងការគ្រប់គ្រង និងការពារកន្លែងអភិរក្សជលផលក្នុងកន្លែងនេសាទសហគមន៍ ព្រមទាំងថែរក្សាព្រៃលិចទឹក និងព្រៃកោងកាងឱ្យបានគង់វង្ស ដែលជាជម្រកមច្ឆជាតិពងកូនដ៏សំខាន់ ។
លោក គួច ចំរើន បានបន្តទៀតថា ទិវាមច្ឆជាតិ១ កក្កដា គឺជាយុទ្ធសាស្ត្រដ៏សំខាន់ដើម្បីរក្សាពូជត្រីក្នុង ស្រុកឱ្យបានគង់វង្ស ដើម្បីបន្តពូជនៅរដូវក្រោយៗថែមទៀត ស្របតាមអនុសាសន៍ប្រកបដោយគតិ បណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
លោក នេន ចំរើន ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត មានប្រសាសន៍ថា ទិវាមច្ឆជាតិ១ កក្កដា ឆ្នាំ២០១៩នេះ ប្រារព្ធឡើងនៅបឹងត្រាវ ភូមិតាអោងអំ ឃុំសាមគ្គី ស្រុកព្រៃនប់ ដោយបានលែងកូនត្រីចំនួន៥០.០០០ក្បាល និងមេត្រីពូជចំនួន២០គីឡូក្រាម ដើម្បីអភិរក្សឱ្យកាន់តែសម្បូរបែបថែមទៀត ៕ (សម្រួលដោយ៖ ស្រីណា)
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ