ខេត្តកំពត ៖ ការិយាល័យព្រហ្មទណ្ឌកំរិតធ្ងន់នៃស្នងការដ្ឋាននគរបាលខេត្តកំពតបានឲ្យកោះសន្តិភាពដឹងកាលពីព្រឹកថ្ងៃទី២៤ ខែកក្កដា ឆ្នាំ ២០១៩ ថា ដោយមានបញ្ជាពីលោកឧត្តមសេនីយ៍ទោ ម៉ៅ ចន្ទ័មធុរិទ្ឋ…
ខេត្តកំពត ៖ ការិយាល័យព្រហ្មទណ្ឌកំរិតធ្ងន់នៃស្នងការដ្ឋាននគរបាលខេត្តកំពតបានឲ្យកោះសន្តិភាពដឹងកាលពីព្រឹកថ្ងៃទី២៤ ខែកក្កដា ឆ្នាំ ២០១៩ ថា ដោយមានបញ្ជាពីលោកឧត្តមសេនីយ៍ទោ ម៉ៅ ចន្ទ័មធុរិទ្ឋ ស្នងការខេត្ត ជុំវិញករណីឃាតកម្មសម្លាប់បុរសម្នាក់នៅភូមិច្រេស ឃុំបឹងសាលាខាង ត្បូង ស្រុកកំពង់ត្រាច កាលពីថ្ងៃទី២ ខែកក្កដា ដែលជនសង្ស័យពីរនាក់ឪពុកនិងកូនបានព្រួតគ្នាសម្លាប់បុរសចំណាស់ម្នាក់រស់នៅក្នុងភូមិឃុំជាមួយគ្នាដោយសារតែរឿងគំនុំ ហើយជនសង្ស័យទាំង២នាក់បាននាំគ្នារត់គេចមកលាក់ខ្លួននៅភ្នំពេញតាំងពីថ្ងៃកើតហេតុកន្លងមកនោះ ។
លុះនៅវេលាម៉ោង៣និង៤០នាទីរសៀលថ្ងៃទី២៣ ខែកក្កដា ឆ្នាំ ២០១៩ កំ លាំងនគរបាលនៃស្នងការដ្ឋានខេត្តកំពតបានសហ ការជាមួយកំលាំងនគរបាលរាជធានីភ្នំពេញ បានស្រាវជ្រាវចុះទៅឃាត់ខ្លួនជនសង្ស័យជាកូន នៅចំណុចឌឹមេគង្គរ៉ូយ៉ាល់ ស្ថិតក្នុងភូមិខ្ទរ័ សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ និងនាំខ្លួនជនសង្ស័យជាកូនមកកាន់ស្នងការខេត្តកំពតដើម្បីធ្វើការសាកសួរ ។
ជនសង្ស័យ២នាក់ឪពុក និងកូនខាងលើ ក្នុងនោះជនដៃដល់ជាឪពុកឈ្មោះ ឡុង សារី អាយុ៥២ឆ្នាំ កំពុងរត់គេចខ្លួន រីឯជនសង្ស័យជាកូនដែលត្រូវសមត្ថកិច្ចចាប់ខ្លួនឈ្មោះ តេន សារ៉ូ ភេទប្រុស អាយុ២៥ឆ្នាំ ។ ចំណែកជនរងគ្រោះដែលស្លាប់ឈ្មោះ ឡី ផេង ភេទប្រុស អាយុ៥២ឆ្នាំ ។ ទាំងជនរងគ្រោះ និងជនសង្ស័យរស់នៅភូមិអ្នកជា ឃុំព្រែកក្រើស ស្រុកកំពង់ត្រាច ខេត្តកំពត ។
លោកវរសេនីយ៍ទោ ឈិន ឈាង នាយការិយាល យ័ព្រហ្មទណ្ឌកំរឹតធ្ងន់នៃស្នងការដ្ឋាននគរបាលខេត្ត កំពតបានថ្លែងប្រាប់កោះសន្តិភាពថា មូលហេតុឈានដល់ការវាយសម្លាប់បុរសម្នាក់យ៉ាងសាហាវខាងលើ កើតឡើង គឺដោយសារជនសង្ស័យទាំង២នាក់ឪពុកនិងកូនមានគំនុំជាមួយជនរងគ្រោះ ព្រោះតែជន រងគ្រោះបាននិយាយប្រាប់ញាតិជិតខាងថា ឈ្មោះ ឡុង សារី ចេះអំពើអាបធ្មប់ ហើយធ្វើអំពើមកលើក្រុមគ្រួសាររបស់ខ្លួន ។ ពេលជនសង្ស័យឮបែបនេះ ទើបធ្វើឱ្យមានគំនុំរហូតឈានដល់ការវាយសម្លាប់ជនរងគ្រោះយ៉ាងសាហាវដូច្នេះ។
ក្រោយពីសមត្ថកិច្ចធ្វើ ការសាកសួរ ជនសង្ស័យជាកូនបានឆ្លើយសារភាពថា ខ្លួនពិតជា បានព្រួតគ្នាពីរនាក់ឪពុកវាយជនរងគ្រោះរហូតដល់ស្លាប់ប្រាកដមែន ។ សមត្ថកិច្ចបានកសាងសំណុំរឿងបញ្ជូនជនសង្ស័យជាកូនទៅតុលាការដើម្បីចាត់ការ តាមផ្លូវច្បាប់ ចំណែកជនសង្ស័យជាឪពុកដែលកំពុងរត់គេចខ្លួន ត្រូវបានសមត្ថកិច្ចកំពុងស្រាវជ្រាវដើម្បីឃាត់ខ្លួនយកមកផ្តន្ទាទោសតាមច្បាប់ឲ្យខាងតែបាន។
គួររំលឹកថា ជនសង្ស័យទាំង២នាក់ឪពុកនិងកូនបានធ្វើសកម្មភាពស្ទាក់វាយជនរងគ្រោះនៅលើផ្លូវលំក្បែរផ្ទះរបស់ខ្លួន ដោយយកចបជីកវាយសម្លាប់ ។
តាមប្រភពពីសមត្ថកិច្ចបានឱ្យដឹងថា មុនពេលកើតហេតុ នៅពេលជនរងគ្រោះជិះម៉ូតូធ្វើដំណើរតែម្នាក់ឯងមកដល់ចំណុចកើតហេតុដែលជនជនសង្ស័យឈរចាំស្ទាក់នោះ ស្រាប់តែជនសង្ស័យឈ្មោះឡុង សារី បានទាញចបជីកវាយជនរងគ្រោះពីខាងមុខត្រូវក្រោម.កមួយចបជីក បណ្តាលឱ្យជនរងគ្រោះធ្លាក់ពីលើម៉ូតូ លុះពេលឃើញជនរងគ្រោះធ្លាក់ពីលើម៉ូតូហើយ ជនសង្ស័យឈ្មោះ ឡុង សារី ក៏ស្ទុះទៅវាយក្បាលជនរងគ្រោះបន្ថែមទៀត រួចយកចបជីកនោះទៅចាក់ត្រង់បំពង់កជនរងគ្រោះបន្ថែមទៀត ។
តាមប្រភពដដែលបានបន្ត ថា នៅពេលឃើញដែលជនសង្ស័យជាឪពុកវាយជនរងគ្រោះ មើលទៅមិនទាន់ស្លាប់ គ្រាន់តែសន្លប់នោះ ស្រាប់តែជនសង្ស័យជាកូនបានស្ទុះទៅទាញចបជីកពីឪពុកទៅវាយជនរងគ្រោះ ត្រង់ក្បាលជាច្រើនចបបន្ថែមទៀត បណ្តាលឲ្យស្លាប់ក្នុងថ្លុកឈាមនៅនឹងកន្លែងកើតហេតុតែម្តង ៕ (កែសម្រួលដោយ ៖ ធីតា)
ចែករំលែកព័តមាននេះ