ខឹ.ងទិញបានគ្រឿងញៀនក្លែងក្លាយ តម្លៃ១៥.០០០រៀល យកពូថៅកា.,ប់រងរបួសធ្ងន់ ត្រូវឃាត់ខ្លួនទាំងពីរនាក់
- បន្ទាយមានជ័យ
ខេត្តបន្ទាយមានជ័យ ៖ ជនសង្ស័យម្នាក់ខឹងនឹងការលក់គ្រឿងញៀនក្លែងក្លាយឱ្យ ទើបយកពូថៅកាប់បណ្តាលឱ្យរងរបួសធ្ងន់ និងត្រូវបានកម្លាំងកងរាជអាវុធហត្ថឃាត់ខ្លួនទាំងពីរនាក់បញ្ជូនទៅសាលាដំបូងខេត្តបន្ទាយមានជ័យ កាលពីថ្ងៃទី១៣ ខែកញ្ញា ឆ្នាំ២០២៦ ។
យោងតាមលោកអនុសេនីយ៍ឯក តិល តៃលីវ មេបញ្ជាការកងរាជអាវុធហត្ថក្រុងប៉ោយប៉ែតបានឱ្យដឹងថា ជនសង្ស័យទាំងពីរនាក់រួមមាន ឈ្មោះ ស៊ា សុវណ្ណ ភេទប្រុស អាយុ ៥៤ឆ្នាំ (ជនបង្ក) និងឈ្មោះ សន ចាន់ធី ភេទប្រុស អាយុ៤២ឆ្នាំ (អ្នកលក់គ្រឿងញៀន) អ្នកទាំងពីររស់នៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ។
សូមបញ្ជាក់ថា ហេតុការណ៍ហិង្សានេះ បានកើតឡើងតាំងពីយប់ថ្ងៃទី១០ ខែកញ្ញា ឆ្នាំ២០២៦ នៅចំណុចមុខកាស៊ីណូហ្គោលវើលដ៍ ស្ថិតក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ដោយជនបង្កបានយកពូថៅកាប់ទៅលើជនរងគ្រោះ បណ្តាលឱ្យរបួសធ្ងន់ធ្ងរ និងត្រូវបញ្ជូនទៅសង្គ្រោះបន្ទាន់នៅមន្ទីរពេទ្យ ។
ចំណែកឯលោកអនុសេនីយ៍ត្រី គង់ រិទ្ធា មន្ត្រីនគរបាលយុត្តិធម៌នៃកងរាជអាវុធហត្ថក្រុងប៉ោយប៉ែតបានបញ្ជាក់ថា ក្រោយពេលឃាត់ខ្លួនជនបង្កឈ្មោះ ស៊ា សុវណ្ណ បានសារភាពថា ខ្លួនពិតជាបានយកពូថៅកាប់ទៅលើឈ្មោះ សន ចាន់ធី ប្រាកដមែន ដោយសារខឹងរឿងទិញគ្រឿងញៀនប្រភេទទឹកកកក្លែងក្លាយក្នុងតម្លៃ១៥.០០០រៀល ។ បច្ចុប្បន្ន កម្លាំងជំនាញបានកសាងសំណុំរឿងបញ្ជូនជនសង្ស័យទាំងពីរនាក់ទៅកាន់សាលាដំបូងខេត្ត ដើម្បីចាត់ការបន្តតាមនីតិវិធីច្បាប់។
ចែករំលែកព័តមាននេះ