ខេត្តស្ទឹងត្រែង ៖ បើតាមសេចក្តីរាយការណ៍បឋមបានឱ្យដឹងថា បើតាមសកម្មភាពវីដេអូស្តែងៗពីត្រូវបានបងប្អូនប្រជាពលរដ្ឋនៅចំណុចភូមិសាស្ត្រ អូអាឡៃ ស្រុកសៀមប៉ាង ដែលថតបាននៅម៉ោង៨ព្រឹក ថ្ងៃទី២៤ ខែកក្កដា ឆ្នាំ២០១៩ ខណៈយុវជនរងគ្រោះ២នាក់ដែលជាយោធានៅអង្គភាពកងអនុសេនាធំទី៣ វរសេនាតូចកាំភ្លើងធំ យោធភូមិភាគទី១ បានធ្វើដំណើរឆ្លងកាត់ស្ពានឆ្លងអូរដែលទុកសម្រាប់ធ្វើការដំណើរបណ្តោះអាសន្ន នៅចំណុចស្ពានអូរម៉ា ក្នុងភូមិសាស្ត្រអូរអាឡៃ ព្រំដែនកម្ពុជា-ឡាវ ស្រាប់តែបាក់ស្រុតដីលិចជនរងគ្រោះទាំង២នាក់បាត់តែម្តង ។
សេចក្តីរាយការណ៍បឋមបន្តថា ជនរងគ្រោះទាំង២នាក់ខាងលើនេះ ម្នាក់ឈ្មោះ សុខ វណ្ណឌី និងប្អូនប្រុស ឈ្មោះ ភី នីដាលិ ជាយោធានៅអង្គភាព កងអនុសេនាធំទី៣ វរសេនាតូច កាំភ្លើងធំ យោធភូមិភាគទី១ (ប្រចាំការនៅភូមិសាស្ត្រអូរអាឡៃ) ។
តាមព័ត៌មានបានឱ្យដឹងថា មុនពេលកើតហេតុ ជនរងគ្រោះជាយោធាទាំងពីរនាក់ខាងលើនេះ បានធ្វើដំណើរតាមម៉ូតូឆ្លងកាត់ស្ពានឆ្លងអូរដែលទុកសម្រាប់ធ្វើដំណើរបណ្តោះអាសន្នដែលជាកន្លែងកើតហេតុនោះ ស្រាប់តែបាក់ស្រុតដីធ្លាក់ជនរងគ្រោះទាំង២នាក់ចូលក្នុងទឹកតែម្តង ខណៈដែលទឹកកំពុងតែហូរយ៉ាងខ្លាំង បណ្តាលឱ្យទាំងមនុស្ស និងម៉ូតូហូរទៅតាមខ្សែទឹកបាត់ លុះរហូតមកដល់ព្រឹកថ្ងៃទី25 ខែកក្កដា ឆ្នាំ2019នេះ ជនរងគ្រោះជាយោធាទាំងពីរខាងលើ នៅមិនទាន់រកឃើញនៅឡើយទេ ។
បើយោងតាមអធិការនគរបាលស្រុកសៀមប៉ាង បានឱ្យដឹងនៅព្រឹកថ្ងៃទី២៥នេះថា មូលហេតុដែលបណ្តាលឱ្យជនរងគ្រោះទាំង២នាក់ធ្លាក់ទឹកខាងលើនោះ គឺបណ្តាលមកពីភ្លៀងធ្លាក់ខ្លាំងធ្វើឱ្យអូរហូរច្រកទឹកស្ពាន ខណៈពេលស្ពានថ្មីធ្វើមិនទាន់រួចរាល់ ចំណែកស្ពានឆ្លងអូរជាកន្លែងកើតហេតុនេះ ដែលគេធ្វើឱ្យមានទឹកហូរខ្លះនៅខាងក្រោមស្ពានសម្រាប់ទុកឱ្យគេធ្វើដំណើរជាបណ្តោះអាសន្ននោះ គឺជាផ្លូវវាងស្ពាន ប៉ុន្តែយុវជនទាំង២នាក់ខាងលើនេះ ខណៈជិះមកដល់កន្លែងកើតហេតុ ហើយមើលឃើញស្ថានភាពខាងលើស្ពានមានដីខ្លះពីលើស្ពាន ដែលគេអាចទៅបានខ្លះនោះ យុវជនទាំង២នាក់ក៏ធ្វើដំណើរឆ្លងស្ពាននោះ ខណៈធ្វើដំណើរជិតផុតទៅហើយ ស្រាប់តែបាក់ស្រុតស្ពាននោះ បណ្តាលឱ្យលិចបាត់តែម្តង ។
លោកអធិការបន្តទៀតថា រហូតមកដល់ពេលនេះជនរងគ្រោះទាំង២នាក់ខាងលើនៅមិនទាន់រកឃើញនៅឡើយទេ ខណៈពេលនេះសមត្ថកិច្ចនៅកំពុងតែរុករកជនរងគ្រោះទាំង២នាក់នៅឡើយ ហើយជនរងគ្រោះទាំង២នាក់អាយុប្រហែលជាង២០ឆ្នាំប៉ុណ្ណោះ ។
ព័ត៌មានពិស្តារនឹងមានផ្សាយជូននៅកាសែតកោះសន្តិភាព៕ (កែសម្រួលដោយ ៖ បុប្ផា)
ចែករំលែកព័តមាននេះ