Maserati បានផលិតរថយន្តស្ព័រ GranTurismo អស់រយៈពេលជាងមួយទសវត្សរ៍មកហើយ។ បើទោះបីជារាងរបស់វាមើលទៅនៅស្អាតក៏ដោយ តែវាហាក់បីដូចជាចាស់គម្រិលបន្តិចហើយ ពេលដែលចតនៅជិតរថយន្តថ្មីសព្វថ្ងៃនេះ។ អ្នកគាំទ្ររថយន្ត Maserati ក៏កុំអន់ចិត្តអី ព្រោះតែក្រុមហ៊ុននេះបានប្រកាសរួចទៅហើយថា នឹងបង្ហាញរថយន្តស្ព័រដែលបានប្រើប្រាស់ប្រព័ន្ធ Hybrid, ប្រើទាំង Hybrid និង ឌុយដោត និង ប្រភេទប្រើប្រាស់អគ្គិសនីសុទ្ធ នៅក្នុងការដាក់តាំងពិព័ររថយន្ត Geneva ឆ្នាំ២០២០។
លោក Maria Conti ប្រធានផ្នែកទំនាក់ទំនងបានថ្លែងថា៖ «យើងនឹងមានការភ្ញាក់ផ្អើលពិសេសនៅត្រីមាសទីមួយនៃឆ្នាំ២០២០ នៅទីក្រុងហ្សឺណែវ ដោយយើងនឹងបង្ហាញពីរថយន្តស្ព័រជំនាន់ថ្មីដែលនឹងត្រូវផលិតនៅ Modena»។
ប៉ុន្តែអ្វីដែលគួរឱ្យភ្ញាក់ផ្អើលនោះគឺ រថយន្តដែលនឹងបង្ហាញរូបរាងនោះ នឹងមិនមានរូបរាងដូចទៅនឹងរថយន្តគម្រូ Alfieri Concept ទេ បើទោះបីជាមនុស្សជាច្រើនចូលចិត្តការរចនារបស់រថយន្តនោះក៏ដោយ។
ពត៌មានលម្អិតផ្សេងទៀតអំពីរថយន្តគឺតិចតួចណាស់ ប៉ុន្តែកំណែអគ្គិសនីទាំងអស់ត្រូវបានគេរំពឹងថានឹងប្រើម៉ូទ័រផលិតថាមពលអគ្គិសនីដល់ទៅ៣គ្រាប់ ដែលអាចបើកបានពី ០ទៅ៦០ម៉ាយក្នុងមួយម៉ោង ត្រឹមតែ២វិនាទីប៉ុណ្ណោះ។ ម៉ូដែលរថយន្ត Hybrid និង ម៉ូដែលប្រើប្រាស់ឌុយដោត នឹងអាចប្រើប្រាស់ម៉ាស៊ីន V8 3.8-liter twin-turbo ស្រដៀងទៅនឹង Ferrari។
ស្របពេលជាមួយនឹងការចេញម៉ូដរបស់រថយន្តអគ្គិសនី ក្រុមហ៊ុន Maserati គ្រោងនឹងបញ្ចេញម៉ូដរបស់រថយន្តផ្សេងៗទៀតសម្រាប់ឆ្នាំ២០២២។ ម៉ូដែលទាំងនោះមានដូចជា៖ Ghibli, Quattroporte និង Levante។ ជាមួយគ្នានេះដែរ គេនឹងចេញម៉ូដែល SUV តូចមួយ ដែលនឹងក្លាយទៅជាគូប្រជែងជាមួយនឹងរថយន្ត Porsche Macan។ គេរំពឹងថា នឹងឃើញវានៅក្នុងការបង្ហាញរថយន្ត Frankfurt Motor Show ឆ្នាំ២០១៩ និង មានដាក់លក់នៅឆ្នាំ២០២១៕
ប្រភព ៖ carbuzz , កែសម្រួលដោយ ៖ សំណាង
ចែករំលែកព័តមាននេះ