រាជធានីភ្នំពេញ ៖ សេចក្តីរាយការណ៍ឱ្យដឹងថា កម្លាំងសមត្ថកិច្ចនគរបាលខណ្ឌចំការមន សហការជាមួយនគរបាលជំនាញព្រហ្មទណ្ឌកម្រិតធ្ងន់រាជធានីភ្នំពេញ បានធ្វើការឃាត់ខ្លួនជនសង្ស័យម្នាក់ទៀត ពាក់ព័ន្ធករណីទទួលផលចោរកម្មលើទឹកប្រាក់ប្រមាណរាប់សែនដុល្លារ ដែលដឹកចេញពីធនាគារ ។ ជនសង្ស័យឈ្មោះ លី អុិន ភេទប្រុស អាយុ៤១ឆ្នាំ ជាមន្ត្រីនគរបាលជាតិ មានឋនន្ទរៈស័ក្តិអនុសេនីយ៍ឯកបម្រើការងារនៅការិយាល័យចរាចរជើងគោករាជធានីភ្នំពេញ និងមានអាសយដ្ឋានស្នាក់នៅភូមិប៉ប្រក សង្កាត់កាកាប ខណ្ឌពោធិសែនជ័យ ។ សូមបញ្ជាក់៖ បញ្ជូនបុរស២នាក់ទៅតុលាការពាក់ព័ន្ធប្រាក់ជិត៣០ម៉ឺនដុល្លារ (មានវីដេអូ)
បើតាមសេចក្តីរាយការណ៍បន្តថា ជនសង្ស័យជានគរបាលចរាចរណ៍រូបនេះ ពាក់ពន្ធទទួលបញ្ញើប្រាក់ដែលក្រុម វ៉ា សុខ និង អៀម សំអន យកទៅផ្ញើ ដែលប្រាក់រាប់សែនដុល្លារត្រូវគេប្រើល្បិចលួច និងប្លន់របស់ក្រុមហ៊ុនឆាយវ៉ាន់ ។ ជនសង្ស័យ និងត្រូវបញ្ជូនទៅសាលាដំបូង នៅរសៀលថ្ងៃទី២៤ កក្កដា នេះ ជាមួយជនសង្ស័យ២នាក់នោះដែរ ។
សូមរំលឹកថា កម្លាំងសមត្តកិច្ចនគរបាលខណឌចំការមន កាលពីព្រឹកថ្ងៃទី២៣ ែកក្កដា បានចាត់បញ្ជូនបុរស២នាក់ ទៅកាន់សាលាដំបូងរាជធានីភ្នំពេញ ពាក់ព័ន្ធករណីរកឃើញក្រដាសប្រាក់ប្រមាណជិត៣០ម៉ឺនដុល្លារអាមេរិក ដែលគ្មានប្រភពច្បាស់លាស់ និងអាវុទំនើបខ្លី១ ដើមទំនងអត់ច្បាប់ ។
ប្រភពបន្តថា បុរសទាំង២នាក់ ម្នាក់ឈ្មោះ វ៉ា សុខ អាយុ៣៨ឆ្នាំ ជាអ្នកបើកបររថយន្ត ស្នាក់នៅផ្ទះលេខ២០២E៣ ផ្លូវលេខ១៣០ ភូមិ២ សង្កាត់ ផ្សារចាស់ ខណ្ឌដូនពេញ និងម្នាក់ឈ្មោះ អៀម សំអន អាយុ៣៨ ឆ្នាំ មុខរបរជាមន្ត្រីយោធា ស្នាក់នៅផ្ទះគ្មានលេខ ផ្លូវលំ ភូមិប៉ាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ (សមគំនិតទទួលទិញផលចោរកម្ម) ។
ទាក់ទិន និងការនាំខ្លួនជនសង្ស័យ២នាក់ទៅកាន់សាលាដំបូងរាជធានីភ្នំពេញនោះ ត្រូវបានសមត្តកិច្ចបង្ហើបឲ្យដឹងថា ពួកគេជាប់ពាក់ពន្ធបទ.(លួចមានស្ថានទម្ងន់ទោស និងគំរាមប្លន់យកប្រាក់) ។ ដើមចម នៃបទល្មើសខាងលើនេះ យោងតាមពាក្យបណ្តឹងរបស់ជនរងគ្រោះឈ្មោះ សំ ឆាយវ៉ាន់ ភេទប្រុស អាយុ៧៨ឆ្នាំស្នាក់នៅផ្ទះលេខ៣១ ផ្លូវ២៨៦ ភូមិ២ សង្កាត់អូឡាំពិក ខណ្ឌចំការមន មុខរបរជាប្រធានក្រុមហ៊ុនឆាយវ៉ាន់ បានបញ្ជាក់ថា កាលពីវេលាម៉ោង៧ និង៤០ នាទីយប់ថ្ងៃទី១៦ កក្កដា ឆ្នាំ២០១៩ គណនេយ្យរបស់ក្រុមហ៊ុនឆាយវ៉ាន់ បានឲ្យសែកមួយសន្លឹកមានទឹកប្រាក់៥ លានដុល្លារអាមេរិក ទៅបុគ្គលិកឈ្មោះ នី សំអាត និងតៃកុងរថយន្តម្នាក់ឈ្មោះ វ៉ា សុខ ដើម្បីទៅបើកប្រាក់ពីធនាគារCIMB ដែលមានទីតាំងស្ថិតនៅជាប់អតីតៈក្រសួងពាណិជ្ជកម្ម តាមបណ្តោយមហាវិថីព្រនរោត្តម ខណ្ឌដូនពេញ ។
បន្ទាប់ពីបើកប្រាក់បានហើយឈ្មោះ នី សំអាត ក៏ដាក់លុយនោះច្រកចូលទៅក្នុងសាក់កាដូចំនួន២ និងថងខ្មៅមួយ រួចដាក់បាំងខាងក្រោយតៃកុងក្នុងរថយន្ត ហើយនាំគ្នាបើករថយន្តត្រឡប់ទៅវិញ និងបានទៅយកបុគ្គលិកម្នាក់ទៀតនៅចាំមុខកាស៊ីណូណាហ្គា២ ក៏ចេញដំណើរទៅទៀត និងបានដាក់បុគ្គលិកម្នាក់នោះឲ្យចុះវិញនៅមុខធនាគារABA តាមមហាវិថីព្រះសីហនុ កែងផ្លូវលេខ៦៣ សង្កាត់បឹងកេងកង២ ខណ្ឌបឹងកេងកង ។
ក្នុងពាក្យបានបន្តថា លុះពេលរថយន្តបើកទៅដល់មុខផ្ទះលេខ៤៥៧ ផ្លូវ៣១០ សង្កាត់បឹងកេងកង២ ជនសង្ស័យឈ្មោះ វ៉ា សុខ បានប្រើល្បិចធ្វើជាឈប់រថយន្តចូលទិញទឹកផឹក រួចត្រឡប់ទៅក្រោយវិញ និងបានបើកទ្វារថយន្ត ឆក់យកសាក់កាដូពណ៍ខ្មៅមួយដែលមានទឹកប្រាក់ចំនួន២ លាន៤ សែនដុល្លារអាមេរិក ហើយបានគំរាមមិនឲ្យឈ្មោះ នី សំអាត ស្រែក រួចរត់ឡើងជិះម៉ូតូបក្ខពួករបស់គេគេចបាត់ទៅ ។
រហូតដល់ថ្ងៃទី១៨ កក្កដា ក្រុមប្រតិបត្តការចម្រុះរួមមានកម្លាំងនាយកដ្ឋាននគរបាលព្រហ្មទណ្ឌក្រសួង មហាផ្ទៃ កម្លាំការិយាល័យនគរបាលព្រហ្មទណ្ឌកម្រិតធ្ងន់រាជធានីភ្នំពេញ និងកម្លាំងសមត្តកិច្ចនគរបាលខណ្ឌចំការមន កម្លាំងនគរបាលក្រុងបាវិត ខេត្តស្វាយរៀង បានធ្វើការស្រាវជ្រាវឈានដល់ការឃាត់ខ្លួនជនសង្ស័យឈ្មោះ វ៉ា សុខ ចំណុចកាស៊ីណូសុខសាន្ត ក្រុងបាវិត ខេត្តស្វាយរៀង ។ កម្លាំងសហការបានដកហូតរថយន្ត១គ្រឿងម៉ាកលុចស៊ីសNX២០០Tគ្មានពាក់ស្លាកលេខ និងប្រាក់ចំនួន១៣ ម៉ឺនដុល្លារអាមេរិក ហើយបានបញ្ជូនជនសង្ស័យមកកានរាជធានីភ្នំពេញ ។
នៅចំពោះមុខសមត្តកិច្ចជនសង្ស័យបានឆ្លើយសារភាពថា ខ្លួនបានយកលុយទៅផ្ញើនិងឈ្មោះ អៀម សំអន ចំនួន ២៥ម៉ឺនដុល្លារអាមេរិក និងផ្ញើម្នាក់ទៀត ៧០ ដុល្លារអាមេរិកផងដែរ ។ បន្ទាប់មានចម្លើយជាក់លាក់នោះហើយ សមត្តកិច្ចស្រាវជ្រាវទៅដល់ការឃាត់ខ្លួនឈ្មោះ អៀម សំអន នៅផ្ទះគ្មានលេខផ្លូវបេតុង ភូមិប៉ាយ៉ាប សង្កាត់ភ្នំពេញថ្មី ខណ្ឌសែនសុខ និងធ្វើការដកហូតបានប្រាក់២៤៣ ៣០០ ម៉ឺនដុល្លារអាមេរិ អាវុធខ្លីទំនើបម៉ាកKIMBER ពណ៍ទឹកប្រាក់១ដើម គ្រាប់៨គ្រាប់ វិទ្យុទាក់ទង៤ គ្រឿង និងទូរស័ព្ទដៃ១គ្រឿងម៉ាក0PP0 ។
អង្គហេតុដូចបានរៀបរាប់ខាងលើនេះ ទើបបានសមត្តកិច្ចនគរបាលខណ្ឌចំការមន កសាងសំណុំរឿងបញ្ជូនជនសង្ស័យទាំង២ នាក់ ទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ ៕ (សម្រួលដោយ៖ ស្រីណា)
ចែករំលែកព័តមាននេះ