រាជធានីភ្នំពេញ ៖ បច្ចុប្បន្នសហគ្រាសខ្នាតតូចនៅកម្ពុជាមានចំនួនជាង៥០ម៉ឺនសហគ្រាស ហើយការបង្កើតសមាគមសហគ្រិននៅមានសមាជិកតិចតួច។ ដោយមើលឃើញបែបនេះទើបប្រធានសភាមុខរបរនិងមីក្រូសហគ្រាសកម្ពុជា ជំរុញឱ្យមានការផ្សព្វផ្សាយនិងបានអំពាវនាវដល់សហគ្រិនក្នុងស្រុកចូលរួមក្នុងសមាគមតែមួយ ដើម្បីត្រៀមធ្វើការប្រកួតប្រជែងជាមួយសហគ្រិនបណ្តាប្រទេសជិតខាង ជាជាងធ្វើការប្រកួតប្រជាងគ្នាឯង។
ថ្លែងក្នុងពិធីប្រគល់ពានរង្វាន់សហគ្រិនវ័យក្មេងកម្ពុជា កាលពីថ្ងៃទី២០ កក្កដា លោក សុន គន្ធរ ទេសរដ្ឋមន្ត្រី រដ្ឋមន្ត្រីប្រតិភូអមនាយករដ្ឋមន្ត្រី និងប្រធានសភាមុខរបរនិងមីក្រូសគ្រាសកម្ពុជាក្រៅពីមានប្រសាសន៍កោតសរសើរទៅដល់សមាគមសហគ្រិនវ័យក្មេងកម្ពុជាលោកចង់ឱ្យសហគ្រិនវ័យក្មេងក្នុងស្រុករួបរួមគ្នាចងក្រងជាសហគមន៍តែមួយ ហើយការធ្វើបែបនេះនឹងធ្វើឱ្យសហគ្រិនកម្ពុជានឹងមានរីកចម្រើននៅថ្ងៃអនាគត។
លោក សុន គន្ធរ មានប្រសាសន៍ថា «នៅមានរឿងច្រើនទៀតដែលយើងត្រូវគិតគូរទៅដល់ ហើយបើយើងស្តាប់ សមាគមសហគ្រិនវ័យក្មេងលើកឡើង សមាគមទើបតែមានសហគ្រាសប្រមាណ៧០ជាសមាជិកប៉ុណ្ណោះ។យើងត្រូវគិតថាវានៅមានសហគ្រាសច្រើនទៀត នឹងត្រូវពង្រឹងសហគ្រាសយើង»។ លោកទេសរដ្ឋមន្ត្រីបានគូសបញ្ជាក់ថា «បើយើងយកទិន្នន័យមីក្រូសហគ្រាសនៅកម្ពុជាមានមកដល់បច្ចុប្បន្ននេះ គឺមានជាង៥០ម៉ឺនសហគ្រាសខ្នាតតូចនិងគ្រួសារ, សហគ្រាសខ្នាតធំមានប្រមាណ១.០០០សហគ្រាស ហើយបើធំបំផុតជាង១០០សហគ្រាស។ដូចនេះចំនួន៧០សហគ្រាសដែលជាសមាជិករបស់សមាគមសហគ្រិនវ័យក្មេងវានៅមានចំនួនតិចណាស់ គួរតែពង្រីកការផ្សព្វផ្សាយឱ្យមានការចូលរួមចងក្រងជាសមាគមជាមួយសមាគមសហគ្រិនវ័យក្មេង»។
លោកប្រធានសភាមុខរបរសង្កត់ធ្ងន់ថា« ខ្ញុំសូមអំពាវនាវឱ្យមានការចូលរួមចងក្រងជាសង្គមតែមួយ សហគមន៍តែមួយដើម្បីប្រកួតប្រជែងជាមួយនឹងប្រទេសជិតខាងយើង ដែលគេមានលទ្ធភាព សមត្ថភាពធំជាងយើង។បើយើងខំប្រឹង ចូលរួមជាមួយគ្នាបំបាត់ការប្រណាំងប្រជែងរវាងគ្នា យើងនឹងមានការរីកចម្រើននៅថ្ងៃអនាគត»។ បើតាមប្រធានសភាមុខរបររូបនេះបានលើកជាសុភាសិតខ្មែរមួយថា« ចង្កេះមួយបាច់កាច់មិនបាក់ តែបើចង្កេះតែមួយគេកាច់ងាយបាក់ណាស់»។យោងតាមប្រធានសមាគមសហគ្រិនវ័យក្មេងកម្ពុជា លោក ឧកញ៉ា គួច ផេង បានលើកឡើងថា «ការរៀបចំកម្មវិធីប្រគល់ពានរង្វាន់សហគ្រិនវ័យក្មេងរយៈពេល៥ឆ្នាំកន្លងមកនេះមាន ក្នុងគោលបំណងជួយលើកកម្ពស់សហគ្រិនភាពនៅកម្ពុជា។ គោលបំណងមួយផ្សេងទៀត ចង់ឱ្យសហគ្រិនវ័យក្មេងចូលរួមផ្សព្វផ្សាយអាជីវកម្មរបស់ខ្លួនឱ្យកាន់តែទូលំទូលាយជាមួយនិងឧត្តមភាពស្វែងរកដៃគូអាជីវម្មឬអ្នកវិនិយោគទាំងនៅក្នុងនិងក្រៅប្រទេសដែលជាផ្នែកមួយចូលរួមអភិវឌ្ឍន៍សេដ្ឋកិច្ចប្រទេសជាតិយើង។លើសពីនេះសហគ្រិនដែលបានចូលរួមនឹងទទួលបានបទពិសោធន៍នៃការចែករំលែកសំខាន់ៗទាក់ទងនិងអាជីវកម្ម»។
ទាក់ទងសហគ្រិននិងបង្កើតអាជីវកម្មតាមរយៈយុវជនកម្ពុជាមកដល់សព្វថ្ងៃនេះ បើតាមលោកឧកញ៉ាគួច ផេង« ពីមួយឆ្នាំទៅមួយឆ្នាំយើងទទួលបានសហគ្រិនដែលមានគំនិតអាជីវកម្មប្លែកៗនិងថ្មីៗជាច្រើនដែលបានដាក់ពាក្យចូលរួមប្រកួតប្រជែង។នេះបញ្ជាក់ថាយុវជនជំនាន់ក្រោយរបស់យើងជាធនធាន ប្រកបដោយសមត្ថភាពនិងជាទំពាំងស្នងឬស្សីសម្រាប់ប្រទេសយើង»។ តំណាង ប្រធានតំណាងប្រធានសភាពាណិជ្ជករអន្តរជាតិកម្ពុជាបានលើកឡើង កម្មវិធីនេះរៀបចំឡើងក្នុងគោលបំណងសំខាន់ៗគឺ លើកទឹកចិត្តទៅដល់សហគ្រិនវ័យក្មេងកម្ពុជា ឱ្យបង្ហាញពីសមត្ថភាពច្នៃប្រឌិតទៅតាមជំនាញរបស់ខ្លួន,ផ្តល់ឱកាសទាំងអស់ដល់សហគ្រិនទាំងអស់ដែលបានបង្កើតឡើងនូវទំនាក់ទំនងល្អៗជាមួយនឹងសហគ្រិនដទៃទៀតនិងចែករំលែកពីភាពជោគជ័យពីជំនាញទៅវិញទៅមក៕ កែសម្រួលដោយ ៖ សុឃាក់
ចែករំលែកព័តមាននេះ