ខេត្តព្រះសីហនុ ៖ នៅកន្លែងធ្វើកោសល្យវិច័យ សមត្ថកិច្ចរកឃើញមានលិខិតបណ្ដាំនៅក្នុងរថយន្ដដែលសរសេរថា «លាហើយ» ។ អក្សរនេះ ត្រូវបានប្រធានអង្គភាពរបស់ជនរងគ្រោះ និងមិត្ដរួមការងារទទួលស្គាល់ថា គឺជាអក្សររបស់ជនរងគ្រោះពិតប្រាកដ ។ នេះជាអ្វីដែលលោកស្នងការបានគូសបញ្ជាក់ ។
សូមបញ្ជាក់ថា សពមន្ត្រីនគរបាលម្នាក់ បានត្រូវគេប្រទះឃើញនៅខាងមុខរថយន្តរបស់ខ្លួន ហើយនៅក្នុងដៃមានកាន់កាំភ្លើងខ្លីទំនើបមួយដើមនិងមានស្នាមឈាមហូរចេញ ពីក្បាលដែលបង្ហាញថា នេះជាការបាញ់សម្លាប់ខ្លួន ។ ហេតុការណ៍នេះ កើតឡើងកាលពីវេលាម៉ោងប្រមាណ៦និង៥០នាទីព្រឹកថ្ងៃទី២១ ខែកក្កដា ខណៈប្រជាពលរដ្ឋធ្វើដំណើរឆ្លងកាត់តាមតីរវិថីសម្តេច ហ៊ុន សែន មកដល់ចំណុចព្រំប្រទល់រវាងក្រុងព្រះសីហនុ និងស្រុកស្ទឹងហាវ ជិតឆ្នេរព្រែកត្រែង ក្នុងភូមិ៤ ឃុំអូរត្រេះ ស្រុកស្ទឹងហាវ ។
មន្ត្រីនគរបាលស្រុកស្ទឹងហាវបានឲ្យដឹងថា មន្ត្រីនគរបាលដែលបាញ់សម្លាប់ខ្លួននេះឈ្មោះ ហេង សៅគីរី ភេទប្រុស អាយុ៤២ឆ្នាំ មានឋានន្តរស័ក្តិវរសេនីយ៍ត្រី ជាមន្ត្រីនគរបាលអន្តោប្រវេសន៍ច្រកកំពង់ផែអន្តរជាតិខេត្តព្រះសីហនុ និងមានទីលំនៅផ្ទះលេខT៦ ក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំ
ពេញ ។
ប្រភពដដែលបានឲ្យដឹងទៀតថា តាមការសន្និដ្ឋានរបស់សមត្ថកិច្ចជំហានដំបូង ការស្លាប់របស់ជនរងគ្រោះគឺជាការធ្វើអត្តឃាតដោយបាញ់សម្លាប់ខ្លួន ក្រោយពេលជិះរថយន្តម៉ាក ឡិចសុីស RX៣៣០ ពណ៌ខ្មៅ ពាក់ផ្លាលេខ ភ្នំពេញ ២AB-៨០២៩ មកឈប់នៅចំណុចខាងលើ ។ ក្រោយពីពិនិត្យរួច សពមន្ត្រីនគរបាលរូបនេះ ត្រូវបានយកទៅតម្កល់រង់ចាំក្រុមគ្រួសារមកទទួលយកទៅធ្វើបុណ្យទៅតាមប្រពៃណី ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត ថ្លែងថា ឆ្លងតាមការស្រាវជ្រាវ និងធ្វើកោសល្យវិច័យពីសំណាក់សមត្ថកិច្ចជំនាញបង្ហាញថា មន្ដ្រីនគរបាលដែលធ្វើអត្ដឃាតដោយបាញ់សម្លាប់ខ្លួននេះ ព្រោះតែមានជំងឺស្ដ្រេស្ត និងមួយទៀតមានជំងឺប្រចាំកាយព្យាបាល មិនជា ដែលមិត្តរួមការងារតែងតែឮការត្អូញត្អែរថាឈឺក្បាល ។
លោកស្នងការ ជួន ណារិន្ទ បញ្ជាក់ថា មន្ត្រីនគរបាលដែលបាញ់សម្លាប់ខ្លួននេះ មាន តួនាទីជានាយផ្នែកសេនាធិការនៅនាយកដ្ឋានច្រកទ្វារទី២ នៃអគ្គនាយកដ្ឋានអន្ដោប្រវេសន៍ ក្រសួងមហាផ្ទៃ ប្រើកាំភ្លើងម៉ាកTAURUS បាញ់សម្លាប់ខ្លួន ។ ជនរងគ្រោះមានទម្លាប់ប្រើដៃឆ្វេង គឺស៊ីសង្វាក់ទៅនឹងស្នាមរបួសត្រង់សៀតផ្កាខាងឆ្វេងធ្លាយទៅម្ខាង ដែលបណ្តាលឲ្យជនរងគ្រោះស្លាប់ ។ (សម្រួលដោយ៖ ស្រីណា)
ចែករំលែកព័តមាននេះ