ខេត្តបាត់ដំបង ៖ គ្រប់បណ្ដាអធិការក្រុង និងស្រុកទាំងអស់ នៅក្នុងស្នងការដ្ឋានខេត្ត ត្រូវបានបញ្ជាឲ្យកាន់សន្លឹករូបថតរាប់សិបសន្លឹក ដែលមានរូបជនសង្ស័យចំនួន៣នាក់ ដោយភ្ជាប់ជាមួយនូវលេខទូរស័ព្ទសមត្ថ កិច្ចផង យកទៅបិទនៅតាមទីប្រជុំជនតាមទីផ្សារ ឬតាមទីតាំងនានាដែលមានបើកកន្លែងវេរលុយ ដើម្បីឱ្យអាជីវករ និងប្រជាពលរដ្ឋបានស្គាល់មុខក្រុមជនសង្ស័យទាំងនោះ ងាយស្រូលចូលរួមសហការទប់ស្កាត់និងផ្ដល់ដំណឹងដល់សមត្ថកិច្ចជួយអន្តរាគមន៍ នៅពេលប្រទះឃើញភិនភាគនៃក្រុមជនសង្គមងងិតទាំងនេះ។
លោកឧត្តមសេនីយត្រី ជេត វណ្ណនី ស្នងការរងខេត្ត បានប្រាប់កោះសន្តិភាព នៅព្រឹកថ្ងៃទី១៩ កក្កដា នេះថា នេះជាបទបញ្ជារបស់លោកស្នងការខេត្ត ដែលជម្រុញឲ្យលោកអធិការក្រុង និងស្រុកទាំងអស់ត្រូវមានវិធានការបែបនេះ ។ លោកស្នងការរងបានប្រាប់ថា មន្ត្រីជំនាញនៅតាមបណ្ដាស្រុកមួយចំនួនបាននិងកំពុងធ្វើការងារនេះហើយ។
ពួកគេត្រូវផ្ដិតយករូបភាពជនសង្ស័យទាំងនោះ ដោយមានភ្ញាប់ជាមួយនូវលេខទូរស័ព្ទរបស់សមត្ថកិច្ចជាច្រើនខ្សែរផង យកទៅបិតជាសាធារណ:នៅតាមទីផ្សារ ទីប្រជុំជន និង នៅតាមទីតាំង«វេរលុយ» នានា ដើម្បីឲ្យមហាជនបានស្គាល់មុខក្រុមជនទាំងនេះ ។ លោកជេត វណ្ណនី បានបញ្ជាក់ថា ផែនការនេះគឺក្នុងគោលបំណងដើម្បីសុំឲ្យប្រជាពលរដ្ឋចូលរួមជួយទប់ស្កាត់ ឬ ជួយផ្ដល់ព័ត៌មានភ្លាមៗដល់សមត្ថកិច្ច នៅពេលប្រទះឃើញមុខសញ្ញាជនសង្ស័យទាំង៣នាក់ដូចមានរូបភាពនៅក្នុងរូបថតដែលបិតនោះ ដើម្បីកម្លាំងសមត្ថកិច្ចចុះអន្តរាគមន៏និងបង្ក្រាបទាន់ពេលវេលា។
សូមបញ្ជាក់ថា នេះមិនមែនជាលើកដំបូងទេ ដែលសមត្ថកិច្ចមានវិធានការបិតបង្ហាញរូបភាពជនសង្ស័យ បង្ហាញឲ្យមហាជនបានស្គាល់ជាសាធារណ:នៅតាមទីប្រជុំជន ឬ នៅតាមទីផ្សារនានា ដើម្បីដាស់តឿនដល់អាជីវករ និង ប្រជាពលរដ្ឋឲ្យមានការប្រុងប្រយ័ត្នចំពោះមុខសញ្ញាជនសង្គមងងិតទាំងនោះ និង ត្រូវចូលរួមសហការជាមួយសមត្ថកិច្ចដើម្បីទប់ស្កាត់ ឬ ឈានដល់ការបង្ក្រាបតែម្ដង។
ពាក់ព័ន្ធនឹងមុខសញ្ញាក្រុមចោរសកម្មញី-ឈ្មោលនេះ បើតាមលោកឧត្តមសេនីយត្រី ជេត វណ្ណនី ស្នងការរងខេត្តបានប្រាប់ថា ក្រុមនេះជាមុខសញ្ញាយ៉ាងសកម្មក្នុងការប្រព្រឹត្តបទល្មើស ហើយក្រុមនេះដើរធ្វើសកម្ម ភាពស្ទើរគ្រប់ទីកន្លែង ហើយក៏ធ្លាប់ជាប់គុកផងដែរ ។
ទោះយ៉ាងណា ចំពោះការប្រកាសបិទរូបថតជនសង្គមងងិតទាំង៣នាក់ខាងលើនេះ លោកស្នងការរងខេត្តបានបញ្ជាក់ថា នៅព្រឹកថ្ងៃទី១៩ កក្កដា នេះមន្ត្រីជំនាញនៅតាមអធិការមួយចំនួនបានចុះអនុវត្តជាបណ្ដើរៗហើយ។ យើងសង្ឃឹមយ៉ាងមុតមាំថា ទាំងអាជីវករ និង ប្រជាពលរដ្ឋគ្រប់ទីកន្លែងទាំងអស់នឹងចូលរួមសហការជាមួយសមត្ថកិច្ច ដើម្បីទប់ស្កាត់ និងឈានដល់ការបង្ក្រាបក្រុមជនសង្គមងងិតទាំងនេះបានជាមិនខាន ។ (សម្រួលដោយ៖ ស្រីណា)
ចែករំលែកព័តមាននេះ