រាធានីភ្នំពេញ ៖ ក្នុងរយៈពេល៦ខែដើមឆ្នាំនេះ ឬ គិតត្រឹមឆមាសទីមួយដើមឆ្នាំ ២០១៩ កម្ពុជាបានបញ្ចេញលក់កៅស៊ូ បានចំនួន១០៤.២៦១តោន កើនឡើងប្រមាណ២៤ភាគរយ ធៀបនឹងរយៈពេលដូចគ្នាកាលពីឆ្នាំ២០១៨កន្លងទៅ ។ ក៏ប៉ុន្តែបើងាកទៅតម្លៃកៅស៊ូវិញ គឺមានការធ្លាក់ចុះប្រមាណ ៩៣ ដុល្លារជាធម្យមក្នុងមួយតោន ។ នេះបើយោងតាមរបាយការណ៍របស់នាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់និងនេសាទចេញផ្សាយកាលពីពេលថ្មីៗនេះ។
តាមរបាយការណ៍បានបង្ហាញថា តម្លៃកៅស៊ូ ដែលលក់ក្នុងរយៈពេល៦ខែដើមឆ្នាំ ២០១៩នេះ គិតជាមធ្យមក្នុងតម្លៃ ប្រមាណ១,៣៣៩ដុល្លារអាមេរិកក្នុងមួយតោន ដូច្នេះក្នុងរយៈពេល៦ខែនេះកម្ពុជាបញ្ចេញលក់កៅស៊ូ និងបានប្រាក់ត្រលប់មកវិញនូវទឹកប្រាក់ប្រមាណ១៣៩លានដុល្លារអាមេរិក ។ យ៉ាងណាមិញ សម្រាប់តម្លៃលក់ចេញឆ្នាំនេះវិញមានការធ្លាក់ចុះ៩៣ដុល្លារអាមេរិកក្នុងមួយតោនបើធៀបនឹងឆ្នាំមុន ។
ប្រភពដដែលបានឲ្យដឹងថា បរិមាណកៅស៊ូដែលកម្ពុជាបានបញ្ចេញលក់នៅរយៈពេល៦ខែដើមឆ្នាំ ២០១៩ មានចំនួន១០៤.២៦១តោន បានកើនឡើងប្រមាណ ១៩.៨៤៣តោន ត្រូវនឹង២៤ភាគរយធៀបនឹងរយៈពេលដូចគ្នាក្នុងឆ្នាំ ២០១៨ ។ ដោយឡែកសម្រាប់ផលិតផលកៅស៊ូ ដែលកម្ពុជាផលិតបានទូទាំងប្រទេសក្នុងរយៈពេល៦ខែនេះ មានបរិមាណ ១០៥.៥៣៦ តោន កើនឡើងប្រមាណ២៦ភាគរយធៀបនឹងឆ្នាំ ២០១៨ ខណៈផ្ទៃដីចៀរជ័រកៅស៊ូមានចំនួន ២៣៣.២១២ហិចតា ស្មើនឹងជាងពាក់កណ្ដាលនៃផ្ទៃដីដំណាំកៅស៊ូទាំងអស់ទូទាំងប្រទេស ។
លោក ប៉ុល សុផា អគ្គនាយកនៃអគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់និងនេសាទ បានមានប្រសានស៍ថា ផលិតផលកៅស៊ូរបស់កម្ពុជា គឺត្រូវបាននាំចេញទាំងអស់ ដោយមិនមានលក់នៅក្នុងស្រុកឡើយ ព្រោះក្នុងប្រទេសកម្ពុជាមិនទាន់រោងចក្រកែច្នៃកៅស៊ូទៅផលិតផលសម្រេចផ្សេងៗនៅឡើយទេ ។ លោក ប៉ុល សុផា បានបន្តថា «កៅស៊ូយើងបាននាំចេញទៅកាន់ប្រទេសជាច្រើនលើពិភពលោក ដើម្បីកែច្នៃជាផលិតផលផ្សេងៗទៀត ដូចជាប្រទេសវៀតណាម ថៃ ម៉ាឡេស៊ី និងប្រទេសចិនជាដើម ដែលប្រទេសទាំងនេះជាប្រទេសបញ្ជាទិញពីកម្ពុជាច្រើនជាងគេ» ។
លោកបានបន្តថា បើទោះបីជាពេលនេះ តម្លៃកៅស៊ូហាក់មិនទាន់ខ្ពស់ដែលអាចធ្វើអោយអ្នកដាំដុះរកផលចំណេញខ្ពស់ក៏ដោយ តែក៏វាមិនខាតអីដែរ ។ ផលិតផលជ័រកៅស៊ូ មានឡើងមានចុះ ដូច្នេះហើយ វានឹងមិនចុះរហូតទេ វានឹងឡើងថ្លៃវិញនៅឆ្នាំខាងមុខនេះ អាចត្រឹមឆ្នាំ ២០២០ រឺ ២០២១នឹងអាចឡើងថ្លៃវិញ និងធ្វើអ្នកដាំអាចរកប្រាក់ចំណេញវិញបាន ។ សម្រាប់កៅស៊ូគ្រួសារ វាមិនចោទប៉ុន្មានទេនៅពេលនេះ ព្រោះក្នុងមួយតោនពួកគាត់អាចលក់បានត្រឹម១,១០០ដុល្លារអាមេរិកអីដែរ តែសម្រាប់កៅស៊ូក្រុមហ៊ុនដែលត្រូវកែច្នៃវិញ វាមានលក្ខណៈស្ទើចំណេញស្ទើរខាត តែយ៉ាងណាក៏មិនខាតរហូតដល់ទប់មិនជាប់ដែរ ។
លោកបានបន្ថែមថា ក្នុងនាមជាអាជ្ញាធរគ្រប់គ្រងលើដំណាំកសិ-ឧស្សាហកម្មមួយនេះ ក្រសួងតែងតែជំរុញអោយកសិករ ក៏ដូចជាក្រុមហ៊ុនពង្រីកការដាំដុះ បន្ថែមទៀត ហើយអ្នកដែលកាប់ចោលគួរដាំវិញ និងអ្នកដាំបានហើយគួរបន្ថែមការថែរក្សា ព្រោះលោកជឿជា កៅស៊ូនឹងឡើងវិញនៅពេលឆាប់ៗ ហើយបើសិនជាឡើងវិញ មិនមានកៅស៊ូលក់អោយគេនោះ គឺជាការបាត់បង់ឱកាសដ៏ល្អហើយ ។ លោកបាននិយាយថា « ការផ្លាស់ប្តូរមុខដំណាំ របស់កសិករ វាមិនមែនជារឿងល្អនោះទេ ពីព្រោះដំណាំដែលកសិករបំរុងនឹងដាំ ទំរាំតែបានផល វាមិនប្រាកដថារក្សាតម្លៃបានខ្ពស់រហូតនោះឡើយ អញ្ចឹងនៅពេលដែលកាប់បំផ្លាញដំណាំណាមួយហើយទៅដាំដំណាំផ្សេង គឺជាការខាតបង់មួយបាត់ទៅហើយ »។
គួរបញ្ជាក់ថា សម្តេចតេជោហ៊ុន សែន នាយករដ្ឋមន្ត្រីនៃកម្ពុជា បានដាស់តឿនដល់ក្រសួងស្ថាប័នពាក់ឱ្យបន្តបណ្តុះបណ្តាលនិងផ្សព្វផ្សាយបច្ចេកវិទ្យាដំណាំ កៅស៊ូដល់កសិករដាំកៅស៊ូឱ្យបានច្រើនថែមទៀត ត្រូវបន្តពង្រីកសហគមន៍កៅស៊ូគ្រួសារ ដើម្បីផ្ដល់ផលប្រយោជន៍កសិករ នៅពេលលក់ផលិតផលកៅស៊ូទាំងនោះ ។ សម្តេចក៏បានជំរុញការវិនិយោគលើការដាំដុះនិងកែច្នៃផលិតផលកៅស៊ូ ដើម្បីបង្កើនតម្លៃបន្ថែម បង្កើតការងារ និងកាត់បន្ថយភាពក្រីក្រផងដែរ ៕កែសម្រួលដោយ ៖ សុឃាក់
ចែករំលែកព័តមាននេះ